އާ ސީޒަންގެ ކުރިން މުނޯޒްއާއި އެހެން ކުޅުންތެރިންގެ މުސާރަ މައްސަލަ ހައްލުވާނެ- ގްރީން ސްޓްރީޓްސް
ހައްލު ހޯދަން ގްރީންއިން ވަނީ އެފްއޭގެ ރައީސްއާ ބައްދަލުކޮށްފައި
އެންޖެލް މުނޯޒް ގްރީންއަށް ކުޅެނީ
އާ ސީޒަން ފެށުމުގެ ކުރިން އެންޖެލް މުނޯޒްއާއި, އެހެން ކުޅުންތެރިންގެ މުސާރައިގެ މައްސަލަވެސް ހައްލުވާނެކަމަށް ކްލަބް ގްރީން ސްޓްރީޓްސްއިން ބުނެފިއެވެ.
ގްރީންއިން މިކަމާ ގުޅޭ ބަޔާނެއް އާއްމުކުރީ މުސާރަ ނުދީ އޮތުމުން ސްޕެއިންގެ މިޑްފީލްޑަރ އެންޖެލް މުނޯޒް ފީފާއަށް މައްސަލަ ހުށަހެޅުމުންނެވެ. އަދި އެކަމާ ގުޅިގެން ފީފާއިން ގްރީންއަށް ކުޅުންތެރިން ނުގެނެވޭ ގޮތަށް އަދަބު ދީފައިވަނިކޮށެވެ. ގްރީންއިން އާއްމުކުރި ބަޔާނުގައި ބުނެފައިވަނީ އެފްއޭއެމްއިން ކްލަބަށް ދޭން ބުނި ފައިސާވެސް ބަރާބަރަށް ލިބިފައި ނުވާކަމަށާއި, އެކަމުގެ ސަބަބުން މުސާރައިގެ ކަންކަން ހަމަޖެއްސުމަށް އުނދަގޫވެފައިވާކަމަށެވެ. އެކަމާ ގުޅިގެން އެފްއޭއެމްގެ ޖެނެރަލް ސެކެޓްރީއާއި, އެއިދާރާގެ ރައީސްއާ ބައްދަލުކޮށްފައިވާކަން ބަޔާނުގައި ފާހަގަކޮށްފައިވެއެވެ. އަދި ދެތިން ހަފްތާއެއްގެ ތެރޭގައި އެކަން ހަމަޖައްސައިދޭނެކަމުގެ ޔަޤީންކަން އެއިދާރާއިން ދީފައިވާކަންވެސް ބަޔާނުގައި ވަނީ ފާހަގަކޮށްފައެވެ. އެހެންކަމުން އާ ސީޒަންގެ ކުރިން މުސާރައިގެ ކަންކަން ހައްލުވެގެންދާނެކަމަށް ގްރީން އިން ބުނެފައިވެއެވެ.
މީގެ އިތުރުން ދާދިފަހުން ކްލަބަށް ހަމަޖެހުންު ސްޕޮންސަރޝިޕެއްގެ ސަބަބުންވެސް ކަންކަން ހަމަޖެއްސުމުގައި އިތުރުގޮތްތަކެއް ފަހިވެފައިވާކަމަށް ކްލަބްގެ ބަޔާނުގައި ބުނެފައިވެއެވެ. "އިރާދަކުރެއްވިއްޔާ 20220/20223 ވަނަ އަހަރުގެ ސީޒަން ފެށުމުގެ ކުރިން ކަންކަން ހަމަޖެހިގެންދާނެ" ކްލަބްގެ ބަޔާން ނިންމާލަމުން ބުނެފައިވެއެވެ.
