މިހާރު ކުރިއަށްދާ ދިރާގު ދިވެހި ޕްރިމިއާ ލީގުގައި ކުލަބު ގްރީން ސްޓްރީޓްސްއާ ދެކޮޅަށް ކުޅުނު މެޗުން، އެންމެ ފަހުގެ ޗެމްޕިއަން މާޒިޔާ ސްޕޯޓްސް އެންޑް ރެކްރިއޭޝަން ބޮޑު މޮޅެއް ހޯދައިފި އެވެ.

ހޮނިހިރު ދުވަހުގެ ހަވީރު ގަލޮޅު ރަސްމީ ދަނޑުގައި ކުޅުނު މެޗު މާޒިޔާ އިން ކާމިޔާބު ކުރީ 9-0 އިންނެވެ. މެޗުގެ ފުރަތަމަ ހާފުގައި މާޒިޔާ އިން ފަސް ލަނޑު ޖެހިއިރު، ދެ ވަނަ ހާފުގައި އެ ޓީމުން ވަނީ ހަތަރު ލަނޑު ޖަހައިފަ އެވެ.

މެޗު ފަށައިގެން 20 ވަނަ މިނެޓުގައި މާޒިޔާ އިން ވަނީ ލަނޑު ޖަހައި ލީޑު ނަގައިފަ އެވެ. އެ ލަނޑު އެ ޓީމަށް ޖަހައިދިނީ ބިދޭސީ ކުޅުންތެރިޔާ ސާޖިއޯ އިގްލީސިއަސް އެވެ. އޭގެ ހަ މިނެޓު ފަހުން މާޒިޔާގެ ދެ ވަނަ ލަނޑު ޖަަހައި ލީޑު ފުޅާ ކޮށްދިނީ ހަމްޒާ މުޙައްމަދު (ހަމްޕު) އެވެ.

މެޗުގައި މާޒިޔާގެ ތިން ވަނަ ލަނޑު، 32 ވަނަ މިނެޓުގައި ޖަހައިދިނީ ނާއިޒް ޙަސަން (ދާދު) އެވެ. ދާދު ތިން ވަނަ ލަނޑު ޖެހިތާ ފަސް މިނެޓު ފަހުން އިގްލީސިއަސް ވަނީ މާޒިޔާގެ ހަތަރު ވަނަ ލަނޑު ޖަހައިފަ އެވެ. އަދި ފުރަތަމަ ހާފުގެ ފުރިހަމަ ވަގުތު ހަމަވާން މިނެޓަކަށް ވެފައި ވަނިކޮށް، މާޒިޔާގެ ފަސް ވަނަ ލަނޑު ޖެހީ ބިދޭސީ ކުޅުންތެރިޔާ ލުއިސް ޕައުލޯ އަލްމެއިޑާ އެވެ.

މެޗުގެ ދެ ވަނަ ހާފު ފަށައިގެން އަށް ވަނަ މިނެޓުގައި އިބްރާހީމް އައިސަމް ވަނީ މާޒިޔާގެ ހަ ވަނަ ލަނޑު ޖަހައިފަ އެވެ. އޭގެ ތިން މިނެޓު ފަހުން އިގްލީސިއަސް ވަނީ މާޒިޔާގެ ހަތް ވަނަ ލަނޑު ޖަހައި މެޗުގައި އޭނާގެ ހެޓްރިކް ހަމަ ކޮށްފަ އެވެ.

އޭގެ ފަހުން މެޗުގެ 59 ވަނަ މިނެޓުގައި މާޒިޔާގެ އަށް ވަނަ ލަނޑު ޖެހީ ޒުވާާން ކުޅުންތެރިޔާ މުޙައްމަދު އިލާާން އިމްރާން އެވެ. އަދި މެޗުގެ 77 ވަނަ މިނެޓުގައި އިލާން ވަނީ އިތުރު ލަނޑެއް ޖަހައި މާޒިޔާ އަށް ނުވަ ލަނޑުގެ ލީޑެއް ހޯދައިދީފަ އެވެ.

މޮޅާއެކު މާޒިޔާ އިން ވަނީ އަނެއްކާ ވެސް ލީގު ތާވަލްގެ އެއް ވަނަ މަގާމަށް ޖެހިލައިފަ އެވެ. މިހާތަނަށް ލީގުގައި ކުޅެފައިވާ ފަސް މެޗުން ވެސް މޮޅުވެ، މާޒިޔާ އަށް ލިބެނީ 15 ޕޮއިންޓެވެ. ދެ ވަަނައިގައި އޮތް ނިއު ރޭޑިއަންޓް ސްޕޯޓްސް ކުލަބުން ހަތަރު މެޗު ކުޅެފައިވާއިރު، އެ ޓީމަށް ލިބެނީ 12 ޕޮއިންޓެވެ.

ލީގުގައި ހޮނިހިރު ދުވަހުގެ ރޭ ކުލަބު ވެލެންސިއާ އާއި، ޔުނައިޓެޑު ވިކްޓަރީ ބައްދަލު ކުރި މެޗު ނިމުނީ އެއްވެސް ޓީމަކަށް ލަނޑެއް ނުޖެހި އެއްވަރު ވެގެންނެވެ.