ނަދީމްގެ މަރު: ސެޕްޓެމްބަރު 26ގައި ޙުކުމްކުރަނީ

ހއ. ތަކަންދޫ އިބްރާހީމީ ހިޔާ، އުމުރުން 23 އަހަރުގެ ނަދީމު ޢަބްދުއްރަޙީމް އަށް ތޫނު އެއްޗަކުން ހަމަލާދީ މަރާލި މައްސަލައިގެ ޙުކުމް ކުރުމަށް ތާވަލުކޮށްފިއެވެ.

ކްރިމިނަލް ކޯޓުގައި މި މައްސަލައިގެ ޙުކުމް ކުރުމުގެ އަޑުއެހުން ތާވަލުކޮށްފައިވަނީ ސެޕްޓެމްބަރު މަހުގެ 26 ވާ ހޯމަ ދުވަހުގެ ހެނދުނު 09:00 އަށެވެ.

މި މައްސަލައިގައި އެންމެ ފަހުން އަޑުއެހުމެއް ބާއްވާފައިވަނީ 21 އޯގަސްޓު 2022 ގައެވެ. އެއީ މި މައްސަލައިގެ ޙުކުމުގެ ކުރިން ޝަރީއަތުން ސާފުކުރަން ބޭނުންވާ ކަންކަން ސާފު ކުރުމަށް ކުރިއަށް ގެންދިޔަ އަޑުއެހުމެކެވެ.

ކްރިމިނަލް ކޯޓުގައި މި މައްސަލަ ބައްލަވަނީ އެ ކޯޓުގެ ގާޒީ ހުސައިން ފާއިޒު ރަޝާދެވެ.

އެންމެ ފަހުން ބޭއްވި އަޑުއެހުމުގައި ގާޒީ ވަނީ ދައުލަތުން ހުށައަޅާފައިވާ ވީޑިއޯ ފުޓޭޖްތަކާއި ގުޅޭ ސީޑީތަކާއި ގުޅިގެން ބައެއް ކަންކަން ސާފު ކުރައްވާފައެވެ. އެގޮތުން "ކުއެޝަނަަބަލް އެވިޑެންސް" ގޮތުގައި ހުށައެޅިފައިވާ ބައެއް ފުޓޭޖްތަކާއި ގުޅޭގޮތުން ގާޒީ ވަނީ ސުވާލު ކުރައްވާފައެވެ. އޭގެ ތެރެއިން ބައެއް ފުޓޭޖް ޝަރީއަތަށް ލިބިފައިނުވާކަންވެސް ގާޒީ ފާހަގަ ކުރެއްވިއެވެ.

އެކަމާ ގުޅޭގޮތުން ދައުލަތުގެ ވަކީލު ވިދާޅުވީ، އެ މައުލޫމާތުތައް ވެރިފައި ކުރުމަށްފަހު ދައުލަތުން ޝަރީއަތަށް ހުށައަޅާނެ ކަމަށެވެ. ދައުލަތުން ވަނީ އެކަންކަން ކަށަވަރު ކުރުމަށްފަހު އެކަމަށް ވާހަކަ ދެއްކެވުމަށް ފުރުސަތެއް ދެއްވުމަށް އެދިފައެވެ.

ދައުލަތުން ވަނީ އެ ފުޓޭޖްތައް ހުށައެޅުމަށް އެކަށީގެންވާ ވަގުތު ދިނުމަށް އެދިލައްވާފައެވެ.

ދައުލަތުގެ ޚުލާސާ ބަޔާނުގައި ގ.މަސްއޮޑިގޭ ކައިރީގެ ވީޑިއޯ ފުޓޭޖެއްގެ ވާހަކަ ބަޔާންކޮށްފައިވެއެވެ. އެެއީ މި މައްސަލައިގެ ދައުވާލިބޭ މަފާޒް އެތަނުގައި ހުރި ކަމާއި، އޭނާގެ ޖީބުން މާސްކެއް ނަގާ މަންޒަރު ދައްކުވައިދޭ ފުޓޭޖެއްކަން ދައުލަތުން ވަނީ ބަޔާންކޮށްފައެވެ. ނަމަވެސް އެކަމާއި ގުޅިގެން ދައުލަތުން ހުށައަޅާފައިވާ ފުޓޭޖުގައި ބަޔާންކޮށްފައިވާ ގަޑިއާއި ގުޅިގެން ޝަރީއަތުން ވަނީ އިތުރަށް ސާފު ކޮށްދިނުމަށް ދަންނަވާފައެވެ.

މި މައްސަލައިގައި ހިމެނޭ ސިއްރު ހެކިންގެ ބަޔާންތަކަށް ބުރަދަން ދިނުމަށްވެސް ދައުލަތުން އެދިފައިވެއެވެ. މި މައްސަލައިގައި ދައުލަތުން 11 ސިއްރު ހެކިވެރިއެއް ހުށައެޅި ނަމަވެސް އެ ހުރިހާ ހެކިންގެ ހެކިބަސް ނެގިފައެއް ނުވެއެވެ. ދައުލަތުން އެކަމުގެ ސަބަބެއްގެ ގޮތުގައި ފާހަގަކުރެއްވީ ހެކި ވެރިންނަށް ނުފޫޒު ފޯރުވާ ކަމާއި، އެކަމުގެ އިންޓެލިޖެންސް މައުލޫމާތުވެސް ލިބިފައިވާކަމެވެ. 

ސިއްރު ހެކިވެރިން ތަހުގީގަށް ދީފައިވާ ބަޔާންތަކާއި އެއާއި ގުޅުވާލެވޭ ހެކިތަކަށް މި މައްސަލަ ނިންމަވާއިރު ރިއާޔަތް ކޮށްދެއްވުމަށް ދައުލަތުން ޚުލާސާ ބަޔާނުގައި ވަނީ އެދިލައްވާފައެވެ.

ގާޒީ ވަނީ އެ ފަރާތްތަކުގެ ބަޔާންތައް ހެކީގެ ގޮތުގައި ހުށައަޅާފައިވޭތޯ ސުވާލު ކުރައްވާފައެވެ. ދައުލަތުން ބުނާ ގޮތުގައި އެ ފަރާތްތަކުގެ ބަޔާންތައް ހެކީގެ ގޮތުގައި ހުށައެޅިއިރު، ކިތާބީ ހެކީގެ ގޮތުގައި ހުށައަޅާފައެއް ނުވާނެއެވެ. ނަމަވެސް ޝަފަހީ ހެކި ހުށައެޅިއިރު އެ ބައި ހިމަނާފައިވާނެކަން ދައުލަތުން ފާހަގަކުރިއެވެ.

މައްސަލަ ބައްލަވާ ގާޒީ ވަނީ ޝަރީއަތުން ފާހަގަކުރި ކަންކަމާއި ގުޅިގެން ލިއުމުން ޖަވާބު ހުށައެޅުމަށް އޭރު 5 ދުވަހުގެ މުއްދަތެއް ދެއްވާފައެވެ. 

ނަދީމް މަރާލި މައްސަލައިގައި، ގ. ޝާރާޒް، މުޙައްމަދު މަފާޒު ޙުސައިން ސަލީމްގެ މައްޗަށް ވަނީ ތޫނު އެއްޗަކުން ހަމަލާދީ މީހަކު މެރުމުގެ ކުށުގެ ދައުވާ އުފުލާފައެވެ. އަދި ތޫނު އެއްޗެއް ބޭނުންކޮށްގެން، ގަސްތުގައި މީހަކު މަރާލުމުގައި ބައިވެރިވި ކަމުގެ ކުށުގެ ދައުވާ, ރ. އިންނަމާދޫ ސަމަންތާ, ޙުސައިން ޝާމިންއާއި ގއ. ގެމަނަފުށި ހަވާސް, މުޙައްމަދު ކަރަމް ސުހައިލް, އަދި ލ. ގަން ވިދާތަރި, ޢަލީ ނިފާޒުގެ މައްޗަށް އުފުލާފައިވެއެވެ. މި ހަތަރު މީހުން ވެސް ވަނީ ދައުވާއަށް އިންކާރުކޮށްފައެވެ.