ސޮންގެ ހެޓްރިކާއެކު ޓޮޓެންހަމަށް ބޮޑު މޮޅެއް
18 ސެޕްޓެމްބަރު 2022 | އާދީއްތަ 02:30ޓޮޓެންހަމްގެ އަމިއްލަ ދަނޑުގައި ކުޅުނު މެޗުން އެ ޓީމު މޮޅުވީ 2-6 އިން
ޓޮޓެންހަމުން ކުޅުނު މެޗުގެ ތެރެއިން
އިނގިރޭސި ޕްރިމިއަރ ލީގުގައި ލެސްޓާ ސިޓީއާ ދެކޮޅަށް ކުޅުނު މެޗުން ޓޮޓެންހަމް މޮޅުވެއްޖެއެވެ.
ޓޮޓެންހަމްގެ އަމިއްލަ ދަނޑުގައި ކުޅުނު ފުޓުބޯޅަ މެޗުން އެ ޓީމު މޮޅުވީ 2-6 އިންނެވެ. މެޗުގައި ފުރަތަމަ ލަނޑު ޖަހައި ލީޑު ނެގީ ލެސްޓާ އިންނެވެ. އެއީ މެޗުގެ ހަވަނަ މިނެޓުގައި އެ ޓީމަށް ލިބުނު ޕެނަލްޓީއެއްގައި ޔޫރީ ޓީލަމަންސް ޖެހި ލަނޑެކެވެ. އޭގެ ދެ މިނެޓު ފަހުން ޓޮޓެންހަމަށް ނަތީޖާ ހަމަހަމަކޮށްދިނީ އިންގްލެންޑުގެ ފޯވާޑް ހެރީ ކޭންއެވެ. ޓޮޓެންހަމަށް ލީޑު ނަގައިދިނީ މެޗުގެ 21 ވަނަ މިނެޓުގައި އެރިކް ޑަޔާއެވެ. އެއީ އިވާން ޕެރިސިޗް ނަގައިދިން ކޯނަރެއްގައި ބޯޅަ ގޯލަށް ފޮނުވާލައިގެންނެވެ. ނަމަވެސް ފުރަތަމަ ހާފު ނިމުމުގެ ކުރިން ލެސްޓާ އިން ވަނީ ލަނޑެއް ޖަހައި ނަތީޖާ ހަމަހަމަކޮށްފައެވެ. 41 ވަނަ މިނެޓުގައި އެ ލަނޑު ޖެހީ ޖޭމްސް މެޑިސަންއެވެ.
ދެވަނަ ހާފު ފަށައިގެން ދެވަނަ މިނެޓުގައި ޓޮޓެންހަމަށް ދެވަނަ ފަހަރަށް ލީޑު ނަގައިދިނީ ރޮޑްރީގޯ ބެންޓަންކޫރުއެވެ. މެޗުގައި ޓޮޓެންހަމްގެ ފަހު ތިން ލަނޑު ޖެހީ ސޮން ހެއުން މިންއެވެ. މެޗުގެ 59 ވަނަ މިނެޓުގައި އޭނާ ކުޅެން ނުކުތީ ރިޗާލިސަންގެ ބަދަލުގައެވެ. ސޮންގެ ފުރަތަމަ ލަނޑު އޭނާ ޖެހީ 73 ވަނަ މިނެޓުގައެވެ. ދެވަނަ ލަނޑު އޭނާ ޖެހީ 84 ވަނަ މިނެޓުގައެވެ. އޭގެ ދެ މިނެޓު ފަހުން ސޮން ވަނީ ތިންވަނަ ލަނޑު ޖަހައި ހެޓްރިކް ހަމަކޮށްފައެވެ.
މެޗުން މޮޅުވެ ލިބުނު ތިން ޕޮއިންޓާއެކު ޖުމުލަ 17 ޕޮއިންޓު ހޯދައިގެން ޓޮޓެންހަމް އޮތީ ތާވަލްގެ ދެވަނަ މަގާމުގައެވެ. އެއްވަަނާގައި އޮތް ޗެމްޕިއަން މެންޗެސްޓަރ ސިޓީއަށް ވެސް ލިބެނީ 17 ޕޮއިންޓެވެ. ސިޓީން ކުރި ހޯދަނީ ފައިދާ ގޯލުންނެވެ.
