ހާލާންޑްގެ ލަނޑަކާއެކު 3-0 ން ވުލްވްސް ބަލިކޮށް, މެންޗެސްޓަރ ސިޓީން ޕްރިމިއަރ ލީގު ތާވަލްގެ އެއްވަނައަށް ޖެހިލައިފިއެވެ.

ވުލްވްސްގެ ދަނޑުގައި ކުޅުނު މެޗުގެ ފުރަތަމަ މިނިޓްގައި ސިޓީން ވަނީ ލީޑް ނަގާފައެވެ. ކެވިން ޑި ބުރައިނާ ތަނަވަސްކޮށްދިން ފުރުޞަތަކުން ގޯލް ޖަހައިދިނީ ގްރީލިޝްއެވެ. ހާލާންޑް މެޗުގައި ލަނޑު ޖެހީ 16 ވަނަ މިނިޓްގައެވެ. އެއީ ބާނާޑޯ ސިލްވާ ތަނަވަސްކޮށްދިން ފުރުޞަތަކުންނެވެ. މިއީ ލީގުގައި ހާލާންޑް ކުޅުނު ހަތް މެޗުން ޖެހި 11 ވަނަ ގޯލެވެ. މިސީޒަންގައި ޕްރިމިއަރ ލީގުގެ ލަނޑު ލިސްޓްގެ ކުރީގައިވެސް ހުރީ ހާލާންޑެވެ, ސިޓީގެ ތިންވަނަ ލަނޑު ޖެހީ ފިލް ފޮޑެންއެވެ. ފޮޑެންއަށްވެސް ފުރުޞަތު ތަނަވަސްކޮށްދިނީ ޑި ބުރައިނާއެވެ. ސިޓީން ތިންވަނަ ލަނޑު ޖެހުމުގެ ކުރިން ވުލްވްސްގެ ޑިފެންޑަރ ނަތަން ކޮލިންސްއަށް ވަނީ ސީދާ ރަތްކާޑެއް ދައްކާފައެވެ. 33 ވަނަ މިނިޓްގައި އޭނާއަށް ރަތްކާޑް ދެއްކީ ގްރީލިޝްއަށް ކުރި ފައުލަކަށެވެ.

މެޗުގެ ފަހު 20 މިނިޓްގެ ތެރޭގައި ކޯޗު ޕެޕް ގާޑިއޯލާ ވަނީ ސިޓީއަށް ފަސް ބަދަލު ގެނެސްފައެވެ. އެގޮތުން 72 ވަނަ މިނިޓްގައި ތިން ބަދަލެއް ގެނައެވެ. ފޮޑެންއާއި, ބާނާޑޯ ސިލްވާއާއި, ޑި ބުރައިނާގެ ބަދަލުގައި ފުރުޞަތު ދިނީ ގުންޑޮގާންއާއި, އަލްވާރޭޒްއާއި, ރިޔާދު މާރޭޒްއަށެވެ, 77 ވަނަ މިނިޓްގައި ގްރީލިޝްގެ ބަދަލުގައި ކޯލް ޕަލްމާއަށް ފުރުޞަތުދިނެވެ. އަދި އޭގެފަހުން ރޮޑްރީގެ ބަދަލުގައި ފުރުޞަތު ދިނީ ސާޖިއޯ ގޮމޭޒްއަށެވެ.

މިމޮޅާއެކު ސިޓީ އެއްވަނައަށް ޖެހިލީ ހަތް މެޗުން 17 ޕޮއިންޓް ހޯދައިގެންނެވެ. އާދިއްތަ ދުވަހު ހަވީރު ބްރެންޓްފޯޑް ބަލިކޮށްގެން އާސެނަލްއަށް އަލުން އެއްވަނައަށް ޖެހިލެވޭނެއެވެ.