ބާސެލޯނާގެ ސްޕޯޓިންގ ޑިރެކްޓަރަކަށް ޖޯޑި ކްރައިފް

ސްޕެއިންގެ ބާސެލޯނާގެ އައު ސްޕޯޓިންގ ޑިރެކްޓަރުގެ މަގާމަށް ނެދަލެންޑްސްގެ ޖޯޑި ކްރައިފް ހަމަޖައްސައިފިއެވެ.

ކްރައިފްއަކީ ބާސެލޯނާއަށް ކުރިން ކުޅެދީ އަދި އެ ކުލަބަށް ކޯޗުކަންކޮށްދިން، ނެދަލެންޑްސްގެ ލެޖެންޑު ޔޯހަން ކްރައިފްގެ ދަރިއެވެ. ބާސެލޯނާގެ ސްޕޯޓިން ޑިރެކްޓަރުގެ މަގާމަށް ކްރައިފް ހަމަޖައްސާފައިވާކަން ރަސްމީކޮށް އިއުލާންކޮށްފައިވަނީ ހުކުރު ދުވަހުގެ ވަގުތެއްގައެވެ. ނަމަވެސް ޖުލައި މަހުގެ ފުރަތަމަ ދުވަހުން ފެށިގެން އޭނާ އަންނަނީ އެ މަގާމު އަދާކުރަމުންކަމަށް ބޭރުގެ މީޑިއާތަކުގައި ރިޕޯޓުކޮށްފައިވެއެވެ. އަދި ބާސެލޯނާއިން އައު ސީޒަނަށް ކުޅުންތެރިން ހޯދުމުގައިވެސް އޭނާ މަސައްކަތްކޮށްފައިވާ ކަމަށްވެސް ރިޕޯޓުތައް ބުނެއެވެ.

އުމުރުން 48 އަހަރުގެ ކްރައިފް ވަނީ މީގެ ކުރިން ގިނަ ކުލަބުތަކަށް ކުޅެފައެވެ. އޭގެ ތެރޭގައި ބާސެލޯނާ ވެސް ހިމެނެއެވެ. އޭނާ ވަނީ 1994ން 1996ށް ބާސެލޯނާއަށް ކުޅެފައެވެ. ބާސެލޯނާގެ އިތުރުން އޭނާ ވަނީ ޑިޕޯޓިވޯ އަލަވޭސް، ސެލްޓަ ވިގޯ އެސްޕަންޔޯލް އަދި މެންޗެސްޓަރ ޔުނައިޓެޑަށްވެސް ކުޅެފައެވެ.