ޑޯޓްމަންޑާ ދެކޮޅަށް ކުޅޭ މެޗަށް ސިޓީގެ ޑިފެންޑަރު ސްޓޯންސް ފިޓު
ގާޑިއޯލާ ބުނީ ޑޯޓްމަންޑު މެޗުގެ ކުރިން އޮތް ހުރިހާ ފަރިތަކުރުންތަކެއްގައި ސްޓޯންސް ބައިވެރިވި ކަމަށާއި، މެޗުގެ ސްކޮޑުގައި އޭނާ ހިމެނޭ ކަމަށް
ސްޓޯންސް އަދި ގާޑިއޯލާ
ޔުއެފާ ޗެމްޕިއަންސް ލީގުގެ ގްރޫޕް ސްޓޭޖުގެ ދެ ވަނަ މެޗުގައި ބޮރޫޝިއާ ޑޯޓްމަންޑާ ދެކޮޅަށް ކުޅޭ މެޗަށް މެންޗެސްޓަރ ސިޓީގެ ޑިފެންޑަރު ޖޯން ސްޓޯންސް ފިޓުވެއްޖެއެވެ.
އިނގިރޭސި ޑިފެންޑަރަށް އަނިޔާވެފައިވަނީ ޗެމްޕިއަންސް ލީގުގެ ފުރަތަމަ މެޗުގެ ކުރިން، ޕްރިމިއަރ ލީގުގައި ސިޓީން އެސްޓަން ވިލާއާ ދެކޮޅަށް ކުޅުނު މެޗުގައެވެ. އެ މެޗުގައި ލިބުނު އަނިޔާގެ ސަބަބުން ސިޓީން ސެވިއްޔާއާ ދެކޮޅަށް ކުޅުނު މެޗުގައި ސްޓޯންސް ނުކުޅެއެވެ.
ޑޯޓްމަންޑު މެޗުގެ ކުރިން އޮތް ޕްރެސްގައި ސިޓީގެ ކޯޗު ޕެޕް ގާޑިއޯލާ ބުނީ، އަނިޔާއިން ރަނގަޅުވެ ސްޓޯންސް މިހާރު ޓީމާ ގުޅިއްޖެ ކަމަށެވެ. ގާޑިއޯލާ ބުނީ ކުރިއަށް މުހިންމު މެޗުތަކެއް އޮއްވާ، ކުރު މުއްދަތެއްގައި އަނިޔާ އިން ރަނގަޅުވެ ސްޓޯންސް އެނބުރި އައުމުން ހިތްހަމަ ޖެހޭ ކަމަށެވެ. މީގެ އިތުރުން ގާޑިއޯލާ ބުނީ ޑޯޓްމަންޑު މެޗުގެ ކުރިން އޮތް ހުރިހާ ފަރިތަކުރުންތަކެއްގައި ސްޓޯންސް ބައިވެރިވި ކަމަށާއި، މެޗުގެ ސްކޮޑުގައި އޭނާ ހިމެނޭ ކަމަށެވެ.
މީގެ އިތުރުން ގާޑިއޯލާ ވަނީ ސިޓީގެ ސްޕެއިންގެ ފުލްބެކް އައިމެރިކް ލަޕޯޓޭ އާއި އިނގިރޭސި ރައިޓް ބެކް ކައިލް ވޯކާގެ އެންމެ ފަހުގެ މައުލޫމާތު ވެސް ދީފައެވެ. ގާޑިއޯލާ ބުނީ މި ދެ ކުޅުންތެރިންގެ ތެރެއިން ލަޕޯޓޭ ވަނީ ފަރިތަކުރުންތަކުގައި ބައިވެރިވާން ފަށާފައި ކަމަށާއި، ނަމަވެސް އޭނާ މުޅިން އެއްކޮށް ފިޓު ނޫން ކަމަށެވެ. އަދި ވޯކާ ހުރީ އަދިވެސް އަނިޔާގައި ކަމަށް ގާޑިއޯލާ ވަނީ ބުނެފައެވެ.
ޗެމްޕިއަންސް ލީގުގެ ގްރޫޕް ސްޓޭޖުގައި ކުޅުނު ފުރަތަމަ މެޗުން މި ދެ ޓީމު ވެސް ވަނީ މޮޅުވެފައެވެ. އެހެންކަމުން ގްރޫޕްގެ އެއް ވަނަ ހޯދުމަށް މި މެޗަކީ ދެ ޓީމަށް ވެސް މުހިންމު މެޗެކެވެ. ސިޓީގެ އަމިއްލަ ދަނޑުގައި ކުޅޭ މި މެޗު ފަށާނީ ބުދަ ދުވަހުގެ ރޭ ރާއްޖެ ގަޑިން 12 ޖަހާއިރުއެވެ.
