ބަޔާނާ ދެކޮޅަށް ބާސެލޯނާގައި އޮތް ތާރީޚު ބަދަލުކުރަން ޒަވީ ހުރީ ތައްޔާރަށް

ޔުއެފާ ޗެމްޕިއަންސް ލީގުގެ ގްރޫޕް ސްޓޭޖުގެ ދެ ވަނަ މެޗުގައި ބަޔާން މިއުނިކާ ދެކޮޅަށް ނުކުންނައިރު، އެ ޓީމާ ދެކޮޅަށް ބާސެލޯނާގައި އޮތް ތާރީޚު ބަދަލުކުރަން ތައްޔާރަށް ހުރި ކަމަށް ކޯޗު ޒަވީ ހެނާންޑޭޒް ބުނެފިއެވެ.

އެންމެ ފަހުން ބަޔާނާ ދެކޮޅަށް ކުޅުނު ހަތަރު ފުޓުބޯޅަ މެޗުން ވެސް ބާސެލޯނާ ވަނީ ބަލިވެފައެވެ. އެންމެ ފަހުން ބަޔާނާ ދެކޮޅަށް ކުޅުނު އަށް މެޗުގެ ތެރެއިން ބާސެލޯނާ މޮޅުވެފައިވަނީ އެންމެ މެޗަކުންނެވެ. އަދި ބަޔާންގެ ދަނޑުގައި މިހާތަނަށް ބާސެލޯނާ އަށް މޮޅެއް ހޯދިފައެއް ނުވެއެވެ.

ނަމަވެސް ބާސެލޯނާގެ ކޯޗު ޒަވީ ޤަބޫލުކުރާ ގޮތުގައި އެ ތާރީޚު ބަދަލު ކުރެވޭނެ ފެންވަރު މިހާރު ބާސެލޯނާގައި އެބަ އޮތެވެ. ހުނަރުވެރި ޒުވާން ކުޅުންތެރިންނާއެކު ބާސެލޯނާ އޮތީ ބަޔާނާ ދެކޮޅަށް ތައްޔާރަށް ކަމަށް ވެސް ޒަވީ ވަނީ ބުނެފައެވެ.

މީގެ އިތުރުން ޒަވީ ބުނީ ކުރިއާ ބަލާއިރު، އެތައް ކަމެއް މިހާރު ބަދަލުވެފައިވާ ކަމަށެވެ. ޚާއްސަކޮށް އެންމެ ފަހުން ބަޔާނާ ދެކޮޅަށް ކުޅުނު މެޗަށްފަހު ގިނަ ކަންކަން ބަދަލުވެފައިވާކަމަށާއި، ކުޅުންތެރިންގެ މެންޓާލިޓީގެ ބަދަލު ޒަވީ ފާހަގަކުރިއެވެ. ޒަވީ ބުނީ މިއީ ބާސެލޯނާ ކަމަށް އޭނާ ކުޅުންތެރިން ގާތު ބުނާ ކަމަށާއި، ޓީމުގެ ފެންވަރު ދައްކަން ޖެހޭ ކަމަށެވެ. ކުޅުންތެރިންގެ މެންޓާލިޓީއަށް އައި ބަދަލާއެކު، ބާސެލޯނާއަށް އެންމެ އުސް ފެންވަރު ދެއްކޭނެ ކަމަށް ޒަވީ ޤަބޫލުކުރެއެވެ.

އިތުރަށް ވާހަކަ ދައްކަމުން ޒަވީ ބުނީ އަލަށް ގެނައި ކުޅުންތެރިންނާއި، މި ސީޒަންގެ މިހާތަަނަށް ޓީމު ހޯދާފައިވާ ކާމިޔާބުތަކުން ވެސް ވަރަށް ބޮޑު ކޮންފިޑެންސްއެއް ލިބޭ ކަމަށެވެ. އަދި ޒަވީ ބުނީ ބާސެލޯނާ އޮތީ ރަނގަޅު ރޫޙެއްގައި ކަމަށާއި، ބަޔާނާ ދެކޮޅަށް ކުޅޭ މެޗުން މޮޅުވެ ތާރީޚު ބަދަލުކުރުމަކީ ޓީމަށް ކުރެވޭނެ ކަމެއް ކަމަށެވެ.

މި ސީޒަންގައި ބާސެލޯނާ އިން އަންނަނީ ރަނގަޅު ކުޅުމެއް ދައްކަމުންނެވެ. ޓްރާންސްފާ މާކެޓުގައި އެ ޓީމުން ހޯދި ކުޅުންތެރިންނާއެކު ބާސެލޯނާ އޮތީ ވަރުގަދަ ކޮށެވެ. ޚާއްސަކޮށް ބަޔާން ދޫކޮށް ބާސެލޯނާއަށް ބަދަލުވި ލެވަންޑޯސްކީ އަންނަނީ ތަފާތު މޮޅު ކުޅުމެއް ދައްކަމުންނެވެ. ޒަވީ ބުނީ މަދު ދުވަސްކޮޅެއްގެ ތެރޭގައި ލެވަންޑޯސްކީ ބާސެލޯނާގެ ސްޓައިލަށް ފިޓުވެއްޖެ ކަމަށާއި، އޭނާއާ މެދު އިތުބާރު އޮންނަ ކަމަށެވެ.