އޮޅުކަމަކުން ވެސް ރޮބާޓް ލެވަންޑޯސްކީއަށް ބޯޅަ ނުދިނުމަށް ސާޑިއޯ މާނޭ އޭނާ ގާތު ބުނި ކަމަށް ބަޔާން މިއުނިކްގެ ތަރި ތޯމަސް މުލާ ބުނެފިއެވެ.
މުލާ މިހެން ބުނެފައިވަނީ ގިނަ ދުވަސްތަކެއް އެކުގައި ހޭދަކުރުމަށްފަހު ލެވަންޑޯސްކީ ބަޔާން ދޫކޮށް، ބާސެލޯނާއަށް ބަދަލުވުމާ ގުޅިގެންނެވެ. ލެވަންޑޯސްކީ ބަޔާންގައި ހުރި ދުވަސްވަރު، މި ދެ ފުޓުބޯޅަ ކުޅުންތެރިންނަކީ ވަރަށް ރަނގަޅު ކޮމްބިނޭޝަނެއް އޮތް ދެ ކުޅުންތެރިންނެވެ. ބަޔާން ދޫކޮށް ބާސެލޯނާއަށް ބަދަލުވުމަށްފަހު، ފުރަތަމަ ފަހަރަށް އެ ޓީމާ ދެކޮޅަށް ލެވަންޑޯސްކީ ކުޅޭނީ އަންގާރަ ދުވަހުގެ ރޭއެވެ. އެއީ ޔުއެފާ ޗެމްޕިއަންސް ލީގުގެ ގްރޫޕް ސްޓޭޖުގެ ދެ ވަނަ މެޗުގައެވެ.
އެ މެޗުގެ ކުރިން މުލާ ބުނީ ފާއިތުވި 10 ވަރަކަށް ދުވަހު މާނޭ އޭނާ ގާތު ބުނަމުން އައީ ލެވަންޑޯސްކީއަށް ބޯޅަ ޕާސް ނުކުރުމަށެވެ. އަދި އެއީ މާނޭ ޖޯކެއްގެ ގޮތުގައި ދައްކާ ވާހަކައެއް ކަަމަށް ވެސް މުލާ ބުންޏެވެ. މީގެ އިތުރުން މުލާ ބުނީ، ބާސެލޯނާއާ ދެކޮޅަށް މުހިންމީ ބަޔާންގެ ގޭމް ކުޅެން ކަމަށެވެ. ޚާއްސަކޮށް ބާސެލޯނާއިން މި ސީޒަންގައި ކުޅެމުން އަންނަ ކުއްލި ކައުންޓަ އެޓޭކާ ދެކޮޅަށް، ބަޔާންގެ ގޭމް ކުޅެން ޖެހޭ ކަމަށެވެ.
އިތުރަށް ވާހަކަ ދައްކަމުން މުލާ ބުނީ ލެވަންޑޯސްކީ އަކީ މޮޅު ކުޅުންތެރިއެއް ކަމަށާއި، ލެވަންޑޯސްކީގެ ގޭމް ކުޅުމުގެ ފުރުސަތު ބަޔާނުން އޭނާ އަށް ދީގެން ނުވާނެ ކަމަށެވެ. މުލާ ފާހަގަ ކުރި ގޮތުގައި ލެވަންޑޯސްކީ އަކީ އޭރިޔާ ބޭރުން އަދި އެތެރޭގައި ވެސް ނުރައްކާތެރި ކުޅުންތެރިޔެކެވެ. މުލާ ބުނީ ލެވަންޑޯސްކީ އަށް ޝޫޓު ކުރުމުގެ ފުރުސަތު ނުދީ، ހުއްޓުވަން ޖެހޭނެ ކަމަށެވެ.
ބަޔާންގެ ދަނޑުގައި ބާސެލޯނާއިން އެ ޓީމާ ދެކޮޅަށް ނުކުންނާނީ އަންގާރަ ދުވަހުގެ ރޭ ރާއްޖެ ގަޑިން 12 ޖަހާއިރުއެވެ.
