އޭޝިއަން ނެޓުބޯޅަ މުބާރާތުން ރާއްޖެއަށް ހަތްވަނަ

އޭޝިއަން ނެޓުބޯޅަ ޗެމްޕިއަންޝިޕްގައި ރާއްޖެއިން ކުޅުނު ފަހު މެޗުން ބަލިވެއްޖެއެވެ.

ފަހު މެޗުގައި ރާއްޖެ ވާދަކޮށްފައިވަނީ ބުރުނާއީއާއެވެ. އެ މެޗުން ބަލިވުމާއެކު ރާއްޖެއަށް ވަނީ އޭޝިއާ ސަރަހައްދުގެ ހަތް ވަނައެވެ.

ފަހު މެޗުގައި ބުރުނާއީ އަތުން ރާއްޖެ ބަލިވެފައިވަނީ 42-51 އިންނެވެ. ކުރީ މެޗާއި އެއްގޮތަށް މި މެޗުގެ ފުރަތަަމަ ކުއާޓާއިން ފެށިގެން ބުރުނާއީ ދިޔައީ ރަނގަޅަށް ކުޅެމުންނެވެ. ދެވަނަ ކުއާޓާގައި ރާއްޖެއިން ވަނީ ލީޑު ފަރަގު ކުޑަކޮށްފައެވެ. ނަމަވެސް ޖެހިގެން އައި ދެ ކުއާޓާގައި ބުރުނާއީއިން ވަނީ ލީޑު ފުޅާކޮށްފައެވެ. ޖުމުލަ ގޮތެއްގައި މުބާރާތުގައި ރާއްޖެއިން ވަނީ އުންމީދީ ކުޅުމެއް ދައްކާފައެވެ.

ރާއްޖެއަށް ހަތްވަނަ ލިބުނު އިރު، ހަވަނަ ހޯދީ ބުރުނާއީއެވެ. އަދި ފަސްވަނަ ހޯދީ ފިލިޕީންސްއެވެ. މިއަހަރުގެ މުބާރާތުގައި ރާއްޖޭގެ ޓާގެޓަކަށްވީ ގަދަ އަށަކުން ޖާގަ ހޯދައި، އޭޝިއަން އިންޑޯ ގޭމްސްއަށް ކޮލިފައިވުމެވެެ. ރާއްޖެއިން ވަނީ އެ ޓާގެޓަށް ވާސިލްވެފައެވެ.

މި މުބާރާތުގައި ވާދަކޮށް ޗެމްޕިއަންކަން ހޯދާފައިވަނީ ސްރީލަންކާއެވެ. ލަންކާ ޗެމްޕިއަންކަން ހޯދީ ފައިނަލްގައި ސިންގަޕޫރު ބަލިކޮށްގެންނެވެ. އެއާއެކު ސްރީލަންކާ އާއި ސިންގަޕޫރު ވަނީ ނެޓުބޯޅަ ވޯލްޑް ކަޕުން ޖާގަ ހޯދާފައެވެ. މުބާރާތް އޮންނާނީ އަންނަ އަހަރު ސައުތު އެފްރިކާގައެވެ.

ޖުމުލަ 11 ޤައުމަކުން ވަނީ މުބާރާތުގައި ވާދަކޮށްފައެވެ. އެއީ ރާއްޖެ، ސްރީލަންކާ، އިންޑިއާ، ސިންގަޕޫރް، މެލޭޝިއާ، ފިލިޕީންސް، ޖަޕާން، ޗައިނީސް ތައިޕޭ، ބުރުނާއި، ހޮންކޮންގ އަދި ތައިލެންޑެވެ.