މާލޭ ލީގުގެ ކުޅުން އެޕްރީލް ހަތްވަނަ ދުވަހު ފަށަން ނިންމައިފި

އެޗްވަންއެންވަންއާ ގުޅިގެން މެދުކަނޑާލި އެސްޓީއޯ މާލޭ ލީގު އަންނަ އެޕްރީލް މަހުގެ ހަތްވަނަ ދުވަހު ފަށަން ފުޓުބޯޅަ އެސޯސިއޭޝަން އޮފް މޯލްޑިވްސް (އެފްއޭއެމް) އިން ނިންމައިފި އެވެ.

އެފްއޭއެމް އިން ނެރުނު އާ ޝެޑިއުލްގައިވާ ގޮތުން މާލޭ ލީގުގެ ކުޅުން އަލުން ފަށާނީ އެޕްރީލް މަހުގެ ހަތް ވަނަ ދުވަހު ޓީސީ ސްޕޯޓްސް ކްލަބް އަދި ޔުނައިޓެޑް ވިކްޓްރީގެ މެޗުންނެވެ.

މާލޭ ލީގުގެ ކުޅުން ފަށާނީ ގައުމީ ޓީމު ފަލަސްތީނާ ދެކޮޅަށް ކުޅޭ މެޗަށްފަހުއެވެ.

ފަލްސްތީނާ ދެކޮޅަށް މި މަހު 28 ވަނަ ދުވަހު ރާއްޖެ މެޗު ކުޅޭއިރު، އެ މެޗަށް ގައުމީ ސްކޮޑުވެސް މިހާރު ވަނީ އެކުލަވާލާފައެވެ.

އެހެންނަމަވެސް މާލޭ ލީގު ފެށުމުގެ ކުރިން އޭއެފްސީ ކަޕްގެ ގްރޫޕް ސްޓޭޖުގައި އިންޑިއާގެ ބެންގްލޫރް އެފްސީއާ ދެކޮޅަށް ރާއްޖޭގެ މާޒިޔާ ސްޕޯޓްސް އެންޑް ރެކްރިއޭޝަން މާލޭގައި އެޕްރީލް ހަތަރު ވަނަ ދުވަހު ނިކުންނާނެއެވެ.

އެފްއޭއެމް އިން މާލޭ ލީގުގެ ކުޅުން މެދުކަނޑާލާފައިވާއިރު، އިންޓަ ސްކޫލް ފުޓުބޯޅަ މުބާރާތްވެސް ވަނީ އެޗްވަންއެންވަންއާ ގުޅިގެން ފަސްކޮށްފައެވެ. އެގޮތުން އެ މުބާރާތް ދެން އަލުން ފަށާނެ ދުވަހެއް އަދި އެފްއޭއެމް އިން ހާމައެއް ނުކުރެއެވެ.

އިންޓަ ސްކޫލް ފުޓުބޯޅަ މުބާރާތ މެދު ކަނޑާލާފައިވާއިރު، ނުކުޅެވެނީ ހަމައެކަނި ފައިނަލް މެޗެވެ.

ފައިނަލް މެޗުގައި ވާދަކުރަނީ މަޖީދިއްޔާ ސްކޫލް އަދި އިސްކަންދަރު ސްކޫލެވެ.