މިހާރު ކުރިއަށްދާ އޭޝިއަން ނެޓްބޯލް ޗެމްޕިއަންޝިޕްގައި ވާދަކުރާ ދިވެހިރާއްޖޭގެ ޓީމާ ރައީސުލްޖުމްހޫރިއްޔާގެ ނައިބު ފައިޞަލް ނަސީމް ބައްދަލުކުރައްވައިފިއެވެ.

ރައީސުލްޖުމްހޫރިއްޔާގެ ނައިބު ނެޓްބޯޅަ ޓީމާ ބައްދަލުކުރައްވާފާއިވަނީ މިހާރު އެމަނިކުފާނު ސިންގަޕޫރަށް ކުރައްވަމުން ގެންދަވާ ދަތުރުފުޅުގެ ތެރެއިންނެވެ. ޓީމާ ބައްދަލުކުރައްވައި ރައީސުލްޖުމްހޫރިއްޔާގެ ނައިބު ވަނީ، ކުޅުންތެރިންނަށް ހިތްވަރުދެއްވައި، ކާމިޔާބަށް އެދިވަޑައިގެންފައެވެ. މީގެ އިތުރުން ރައީސުލްޖުމްހޫރިއްޔާގެ ނައިބު ވަނީ، ރާއްޖެއިން އޭޝިއަން އިންޑޯރ ގޭމްސްއަށް ކޮލިފައިވެފައިވާތީ މަރުހަބާ ވިދާޅުވެފައެވެ.

މުބާރާތުގެ ފުރަތަމަ ބުރުގައި ވާދަކޮށް ރާއްޖެއިން ވަނީ ޖަޕާން ބަލިކޮށް، އޭޝިއަން އިންޑޯރ ގޭމްސްއަށް ކޮލިފައިވެފައެވެ. ދެ ވަނަ ބުރުގައި ރާއްޖެއިން ވަނީ މިހާތަނަށް ދެ މެޗެއްވެސް ކުޅެފައެވެ. ފުރަތަމަ މެޗުގައި ފިލިޕީންސް އަތުން ރާއްޖެ ބަލިވީ 59-41ންނެވެ. އަދި ދެވަނަ މެޗުގައި ބުރުނާއި އަތުން ބަލިވީ 50-40ންނެވެ. ދެ މެޗުން ބަލިވި ނަމަވެސް ރާއްޖެއިން ވަނީ ރަނގަޅު ކުޅުމެއް ދައްކާފައެވެ. މުބާރާތުގައި ރާއްޖެއަށް ބާކީ އޮތީ ދެ މެޗެވެ. އެސީ ފިލިޕީންސާ ދެކޮޅަށް ކުޅޭ މެޗާއި ބުރުނާއީއާ ދެކޮޅަށް ކުޅޭ މެޗެވެ.

ޖުމުލަ 11 ގައުމަކުން ވާދަކުރާ މި މުބާރާތް ކުރިއަށްދާނީ ސެޕްޓެމްބަރު މަހުގެ 11އާ ހަމައަށެވެ. މުބާރާތުގައި ވާދަކުރާ ގައުމުތަކަކީ: ރާއްޖެ، ސްރީލަންކާ، އިންޑިއާ، ސިންގަޕޫރު، މެލޭޝިއާ، ފިލިޕީންސް، ޖަޕާން، ޗައިނީސް ތައިޕޭ، ބުރުނާއި، ހޮންގކޮންގ އަދި ތައިލެންޑެވެ.