ނަޕޯލީއާއި އޭސީ މިލާންވެސް މޮޅުވެ 14 ޕޮއިންޓްގައި

ނަޕޯލީއާއި, އޭސީ މިލާންވެސް މޮޅުވެ އިޓާލިއަން ސެރީ އޭ ތާވަލްގެ ކުރީގައި ހިފަހައްޓައިފިއެވެ. ދެޓީމްވެސް އޮތީ ހަ މެޗުން 14 ޕޮއިންޓާއެކުއެވެ. ފައިދާ ތިން ގޯލްގެ ތަފާތުން ކުރީގައި އޮތީ ނަޕޯލީއެވެ.

އޭސީ މިލާން ހޮނިހިރު ދުވަހުގެރޭ ސަމްޑޯރިއާ އަތުން މޮޅުވީ 2-1 ނެވެ. މި ފުޓުބޯޅަ މެޗުގައި މިލާނސް ފުރަތަމަ ލަނޑު ޖަހާ ކުރި ހޯދައިދިނީ ހަވަނަ މިނެޓުގައި ޖޫނިއަރ މެސިއަސްއެވެ. މިއީ ލީގުގައި އޭނާގެ ފުރަތަމަ ގޯލެވެ. ހާފް ނިމުމުގެ ކުރިން މިލާނުން އިތުރު ލަނޑެއް ޖެހިނަމަވެސް ވިއޭއާރުން ނިންމީ އޮފްސައިޑްކަމަށެވެ. ދެވަނަ ހާފް ފަށައިގެން ދެވަނަ މިނެޓުގައި އޭސީ މިލާނަށް މައްސަލަ ކުރިމަތިވީ ދެވަނަ ރީނދޫ ކާޑާއެކު ރަފައެލް ލެއާއޯއަށް ރަތްކާޑް ދެއްކުމުންނެވެ. ލެއާއޯ އަކީ ފުރަތަމަ ގޯލް ޖަހަން ފުރުޞަތު ފަހިކޮށްދިން ކުޅުންތެރިޔާއެވެ. މިލާނުގެ އެއް ކުޅުންތެރިއަކު މަދުވުމުގެ ފައިދާ ނަގައި އޭގެ 10 މިނެޓުފަހުން ސަމްޑޯރިއާއިން ނަތީޖާ ހަމަހަމަކުރިއެވެ. ނަތީޖާ ހަމަހަމަކޮށްދިނީ ފިލިޕް ޖުރިޗިޗްއެވެ. އޭސީ މިލާން މެޗުން މޮޅުވީ 67 ވަނަ މިނެޓުގައި ލިބުނު ޕެނަލްޓީއަކުން ޖިރޫޑް ކާމިޔާބުކުރި ގޯލުންނެވެ. މިއީ އޭރިޔާ ތެރެއިން ކުޅުންތެރިއަކު އަތުގައި ޖެހުމުން ދިން ޕެނަލްޓީއެކެވެ.

އޭސީ މިލާން މެޗުގެ ކުރިން ނަޕޯލީން ވަނީ 1-0 ން ސްޕެޒިއާ ބަލިކޮށް އެއްވަނައަށް ޖެހިލާފައެވެ. ނަޕޯލީގެ ހަމައެކަނި ލަނޑު ޖެހީ ރަސްޕަޑޯރީއެވެ. އޭނާ ލަނޑު ޖެހީ މެޗުގެ ފުރިހަމަ ވަގުތުގެ ފަހު މިނެޓުގައެވެ.

އިންޓަރ މިލާން ވަނީ 1-0 ން ޓޮރީނޯ ބަލިކޮށްފައެވެ. މެޗުގައި އިންޓަރ މިލާންގެ ލަނޑު ޖަހައިދިނީ ބުރޮޒޮވިޗްއެވެ. އޭނާވެސް ލަނޑު ޖެހީ މެޗުގެ ފަހު މިނެޓުގައެވެ. މިމޮޅާއެކު އިންޓަރ މިލާން އޮތީ 12 ޕޮއިންޓާއެކު ހަތަރު ވަނާގައެވެ.