އިޓާލިއަން ކަޕްގެ ކުއާޓާ ފައިނަލްގައި ލާޒިއޯއާ ދެކޮޅަށް ކުޅުނު މެޗުން މޮޅުވެ، އިންޓަރ މިލާނުން މުބާރާތުގެ ސެމީ ފައިނަލްގެ ޖާގަ ހޯދައިފި އެވެ.

އަންގާރަ ދުވަހުގެ ރޭ ކުޅުނު ކުއާޓާ ފައިނަލް މެޗު އިންޓަރ މިލާނުން ކާމިޔާބު ކުރީ 2-0 އިންނެވެ. މެޗުގެ ފުރަތަމަ ހާފުގައި އިންޓަރ މިލާނުން އެއް ލަނޑު ޖެހިއިރު، އަނެއް ލަނޑު ޖެހީ ދެ ވަނަ ހާފުގަ އެވެ.

މެޗުގެ ފުރަތަމަ ހާފުގެ 39 ވަނަ މިނެޓުގައި އިންޓަރ މިލާނަށް ކުރި ހޯދައިދިނީ މާކޯ އާނައުޓޮވިޗް އެވެ. އޭގެ ފަހުން ދެ ވަނަ ހާފުގައި އިންޓަރ މިލާނުން ދެ ވަނަ ލަނޑެއް ޖެހީ، އެ ޓީމަށް ލިބުނު ޕެނަލްޓީ ކާމިޔާބުކޮށްގެންނެވެ. މެޗުގެ 77 ވަނަ މިނެޓުގައި އިންޓަރ އަށް ލީޑު ފުޅާ ކޮށްދިނީ ހަކަން ޗަނޮގްލޫ އެވެ.

މޮޅާއެކު އިންޓަރ މިލާނުން އިޓާލިއަން ކަޕްގެ ސެމީ ފައިނަލަށް ދަތުރު ކޮށްފައިވާއިރު، ސެމީ ފައިނަލްގައި އެ ޓީމު ނިކުންނާނީ ވާދަވެރި އޭސީ މިލާނާ ދެކޮޅަށެވެ. އިންޓަރ މިލާނުން ވަނީ ނުވަ ފަހަރެއްގެ މަތިން އިޓާލިއަން ކަޕް ކާމިޔާބު ކޮށްފަ އެވެ.