ފުރަތަމަ ލެގުގައި ބާސެލޯނާ އާއި އިންޓަރ އެއްވަރު

ޔުއެފާ ޗެމްޕިއަންސް ލީގުގެ ސެމީ ފައިނަލްގެ ދެ ވަނަ ލެގުގައި ބާސެލޯނާ އާއި އިންޓަރ މިލާންގެ ކުރިމަތިލުން އެއްވަރުވެގެން ނިމިއްޖެ އެވެ.

ބާސެލޯނާގެ އަމިއްލަ ދަނޑުގައި ބުދަ ދުވަހުގެ ރޭ ދަންވަރު ކުޅުނު މެޗު ނިމުނީ ދެ ޓީމު 3-3 އިން އެއްވަރު ވެގެންނެވެ. މެޗުގައި އިންޓަރ މިލާނުން ދެ ލަނޑު ޖަހައިގެން ކުރި ހޯދާފައި ވަނިކޮށް، ބާސެލޯނާ އިން ނަތީޖާ ހަމަހަމަ ކުރި އެވެ.

މެޗު ފަށައިގެން ފުރަތަމަ މިނެޓުގައި އިންޓަރ މިލާނަށް ކުރި ހޯދައިދިނީ މާކަސް ތުރަމް އެވެ. އެއީ ޑެންޒެލް ޑަމްފްރީސް ތަނަވަސްކޮށްދިން ފުރުސަތެއްގައި އޭނާ ޖެހި ލަނޑެކެވެ. އޭގެ ފަހުން މެޗުގެ 21 ވަނަ މިނެޓުގައި ޑަމްފްރީސް ވަނީ އިންޓަރ މިލާންގެ ދެ ވަނަ ލަނޑު ޖަހައި ލީޑު ފުޅާ ކޮށްފަ އެވެ.

އޭގެ ތިން މިނެޓު ފަހުން ސްޕެއިންގެ ޒުވާން ކުޅުންތެރިޔާ ލަމީން ޔަމާލް ޖެހި ލަނޑުން ބާސެލޯނާ ވަނީ އުންމީދެއް ހޯދައިފަ އެވެ. އަދި ފުރަތަމަ ހާފު ނިމުމުގެ ކުރިން ބާސެލޯނާ އަށް ނަތީޖާ ހަމަހަމަ ކޮށްދިނީ ފެރާން ޓޮރޭސް އެވެ.

ދެ ވަނަ ހާފުގައި، މެޗުގެ 64 ވަނަ މިނެޓުގައި އަލުން އިންޓަރ މިލާނުން ވަނީ ލީޑު ނަގައިފަ އެވެ. އެއީ ޑަމްފްރީސް ޖެހި ލަނޑުންނެވެ. ނަމަވެސް އޭގެ މިނެޓެއް ފަހުން އިންޓަރ މިލާންގެ ގޯލު ކީޕަރު ޔަން ސޮމާ އަތުންް ބައި ކޮޅަށް ވަތް ލަނޑާ އެކު، ބާސެލޯނާ އަށް ވަނީ މެޗުގެ ނަތީޖާ ހަމަހަމަ ވެފަ އެވެ.

މި ދެ ޓީމު ބައްދަލު ކުރާ ސެމީ ފައިނަލްގެ ދެ ވަނަ ލެގު އޮންނާނީ އަންނަ އަންގާރަ ދުވަހުގެ ރޭ ދަންވަރު އެވެ. އިންޓަރ މިލާންގެ އަމިއްލަ ދަނޑުގައި ކުޅޭ އެ މެޗުން މޮޅުވާ ޓީމަކަށް މުބާރާތުގެ ފައިނަލްގެ ޖާގަ ލިބޭނެ އެވެ.