ޔުއެފާ ޗެމްޕިއަންސް ލީގުގެ ސެމީ ފައިނަލްގެ ފުރަތަމަ ލެގުގައި ސްޕެއިންގެ ބާސެލޯނާއާ ދެކޮޅަށް، އިންޓަރ މިލާންގެ ކުޅުންތެރިން ދެއްކި ކުޅުމާާ މެދު ހިތްހަމަ ޖެހޭ ކަމަށް އެ ޓީމުގެ ކޯޗު ސިމޯން އިންޒާގީ ބުނެފި އެވެ.

އޭނާ މިހެން ބުނީ ބާސެލޯނާގެ އަމިއްލަ ދަނޑުގައި ކުޅުނު ސެމީ ފައިނަލްގެ ފުރަތަމަ ލެގަށް ފަހު ނޫސްވެރިންނާ ވާހަކަ ދައްކަމުންނެވެ. އެ މެޗުގައި އިންޓަރ މިލާނުން ވަނީ ފުރަތަމަ ދެ ލަނޑު ޖަަހައިގެން ލީޑު ނަަގައިފަ އެވެ. ނަމަވެސް، ބާސެލޯނާ އިން ވަނީ ފަހަތުން އަރައި ލަނޑު ޖަހައިގެން ނަތީޖާ ހަމަހަމަ ކޮށްފަ އެވެ.

އިންޒާގީ ބުނީ، ފުރަތަމަ ލެގު ނިންމާލިއިރު ވެސް އޭނާ އަށް ބޮޑު ހިތްހަމަ ޖެހުމެއްގެ އިޙުސާސް ކުރެވޭ ކަމަށެވެ. ޚާއްސަކޮށް އިންޓަރ މިލާނުން ކުޅުނީ ވަރަށް ރަނގަޅު މެޗެއް ކަމަށާއި، މެޗުގައި އެ ޓީމުން ލީޑު ވެސް ނެގި ކަމަށެވެ.

ބާސެލޯނާ އަކީ މިވަގުތު ދުނިޔޭގައި އޮތް އެންމެ މޮޅު އަދި އެންމެ ވަރުގަދަ އެއް ޓީމު ކަމަށާއި، އެ ޓީމާ ދެކޮޅަށް އިންޓަރ މިލާންގެ ކުޅުންތެރިން ދެއްކި ކުޅުމާ މެދު އިންތިހާ އަށް ފަޚުރުވެެރިވާ ކަމަށް ވެސް އޭނާ ބުންޏެވެ.

މީގެ އިތުރުން އިންޒާގީ ބުނީ، މި ފެންވަރުގެ މެޗުތަކުގައި ކުރެވޭ އެންމެ ކަމެއްގެ ސަބަބުން ވެސް މުޅި މެޗުގެ މިސްރާބު ބަދަލުވާނެ ކަމަށެވެ. ނަމަވެސް، އިންޓަރ މިލާންގެ ކުޅުންތެރިންނާ މެދު އޭނާ ދެކެމުން އަންނަ ގޮތާއި، ކުރަމުން އަންނަ އިތުބާރު ބަދަލު ނުވާނެ ކަމަށް ވެސް އޭނާ ބުންޏެވެ.

މެޗުގެ ފުރަތަމަ ހާފަށް ފަހު، ދެ ވަނަ ހާފުގައި އިންޓަރ މިލާނަށް ކޮންމެ ވެސް ވަރެއްގެ އުނދަގޫ ތަކެއް ކުރިމަތިވި ކަމަށާއި، ނަމަވެސް މުޅި ޓީމު މަސައްކަތް ކުރީ ހަމަޖެހިގެން ކުޅެން ކަމަށް ވެސް އޭނާ ބުންޏެވެ. އެހެން ނަމަވެސް، ބާސެލޯނާ އިން އޭނާ އަށް ފެނުނީ ނުވަ އަހަރުގެ ތެރޭގައި ވެސް އޭނާ އަށް ފެނިފައި ނުވާާ ފެންވަރުގެ ކުޅުންތެރިޔެއްގެ އުނދަގޫ ކުރިމަތިވަމުން އައި މަންޒަރު ކަމަށް އިންޒާގީ ބުންޏެވެ.

އިތުރަށް އިންޒާގީ ބުނީ، އަމިއްލަ ދަނޑުގައި ކުޅޭ ދެ ވަނަ ލެގަށް ވެސް ނިކުންނާނީ ފުރިހަމަ އަށް ތައްޔާރުވެގެން ކަމަށެވެ. އަމިއްލަ ދަނޑުގައި ކުޅެން ޖެހުނު ނަމަވެސް، ބާސެލޯނާއާ ދެކޮޅަށް ކުޅެން އުނދަގޫ ވާނެ ކަމަށާއި، މެެޗު ރާވަން ޖެހޭނީ އެކަން ކަމަށް ވިސްނައިގެން ކަމަށް އޭނާ ވަނީ ބުނެފަ އެވެ.