ރާނީ އެލިޒަބަތު އަވަހާރަވުމާއި ގުޅިގެން ރައީސުލްޖުމްހޫރިއްޔާ ތައުޒިޔާ ވިދާޅުވެއްޖެ
ރައީސް ތައުޒިޔާ ވިދާޅުވީ އެމަނިކުފާނު ކުރެއްވި ޓްވީޓެއްގައި
ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް
އިނގިރޭސިވިލާތުގެ ރާނީ އެލިޒަބަތު ދޭއް އަވަހާރަވުމާއި ގުޅިގެން ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙު ތައުޒިޔާ ވިދާޅުވެއްޖެއެެވެ.
ރައީސް ކުރެއްވި ޓްވީޓެއްގައި ވިދާޅުވީ، ރާނީ އެލިޒަބަތު އަވަހާރަވި ޚަބަރު އެއްސެވީ ފުން ހިތާމައާއެކުގައި ކަމަށެވެ. ރާނީ އެލިޒަބަތަކީ އިނގިރޭސިވިލާތަށްޓަކައި އަގުހުރި ޚިދުމަތްތަކެއް ކޮށްދެއްވި ނަމޫނާ ކަނބަލެއްކަަމަށް އެމަނިކުފާނު ވިދާޅުވިއެވެ.
ރާނީ އަވަހާރަވެފައިވަނީ ބަލްމޯރަލްގައި ހުންނަ ޝާހީ ގަނޑުވަރުގައި، އާއިލާ ބޭފުޅުންގެ ހާޒިރުގައިކަމަށް، ރާނީ އަވަހާރަވިކަން އިއުލާންކުރުމަށް ބަކިންހަމް ޕެލެސްއިން ކުރި އިއުލާނުގައި ވަނީ ބުނެފައެވެ. އިނގިރޭސި ރާނީ އަވަހާރަވި ޚަބަރު އިއުލާންކޮށްފައިވަނީ ބުރާސްފަތި ދުވަހުގެ ރޭ ރާއްޖޭ ގަޑިން 9.30ހާއިރުއެވެ.
ރާނީގެ ސިއްޙީ ހާލުކޮޅު ގޯސްކަމަށް ޚަބަރު ލިބުމާއެކު، ބުރާސްފަތި ދުވަހުގެ ހަވީރުން ފެށިގެން ޝާހީ ގަނޑުވަރު ދޮށަށް، އެކަމަނާއަށް ތާއީދުކުރާ މީހުން ދިޔައީ އެއްވަމުންނެވެ. ރާނީ އެލިޒަބަތު އަވަހާރަވިއިރު އުމުރުފުޅުން 96 އަހަރުފުޅެވެ. އެކަމަނާ ރަނިކަމާ ހަވާލުވެވަޑައިގަތީ އުމުރުފުޅުން 25 އަހަރުފުޅުގައެވެ.
