ރައީސް މުއިއްޒުގެ ސަރުކާރުން އެންމެ ފުރަތަމަ ހަމަލާ ދީފައިވަނީ ނޫސްވެރިންނަށް: ރައީސް ސާލިހު
މިސަރުކާރުގެ ފުރަތަމަ ދުވަހު ވެސް ނޫސްވެރިންނަށް ބިރު ދައްކަން ވަނީ ފަށާފައި
ގާނޫނު އަސާސީގެ ދިފާއުގެ ނަމުގައި ބޭއްވި ޖަލްސާގައި ކުރީގެ ރައީސް އިބްރާހިމް މުހައްމަދު ސާލިހު ވާހަކަފުޅު ދައްކަވަނީ
ރައީސުލްޖުމްހޫރިއްޔާ ޑރ.މުހައްމަދު މުއިއްޒުގެ ސަރުކާރާއެކު އެންމެ ފުރަތަމަ ހަމަލާ ދީފައިވަނީ ނޫސްވެރިންނަށް ކަމަށް ކުރީގެ ރައީސް އިބްރާހިމް މުހައްމަދު ސާލިހު ވިދާޅުވެއްޖެއެވެ.
އަންގާރަ ދުވަހުގެ ރޭ ކާނިވާ ސަރަހައްދުގައި އެމްޑީޕީން ކުރިއަށް ގެންދާ ''ގާނޫނު އަސާސީގެ ދިފާއުގައި ރައްޔިތުންގެ'' ޖަލްސާގައި ރައީސް ސާލިހު ވިދާޅުވީ، މިސަރުކާރު ވެރިކަމަށް އައުމާއެކު އެންމެ ފުރަތަމަ ހަމަލާ ދިނީ ނޫސްވެރިންނަށް ކަމަށާއި، ފުރަތަމަ ދުވަހު ވެސް ނޫސްވެރިންނަށް ބިރު ދައްކަން ފަށާފައިވާ ކަމަށެވެ.
އެގޮތުން ނޫސްތައް ބަންދުކޮށް، ނޫސްވެރިން ލިޔާ ލިޔުންތަކާއި ގުޅިގެން ބަންދު ކުރާ ހިސާބަށް ކަންކަން ގެންގޮސްފައިވާ ކަމަށް އެމަނިކުފާނު ވިދާޅުވިއެވެ. ނަމަވެސް އެދުވަހު ވެސް ގިނަ ނޫސްވެރިން އެކަމާއި ކެރިގެން ކުރިމަތިލައި މަސައްކަތް ކުރި ކަމަށް ރައީސް ސާލިހު ވިދާޅުވިއެވެ. އަދި ވިދާޅުވީ ނަތީޖާއެއް ގޮތުން ސަރުކާރު ފަހަތަށް ޖެހުނު ކަމަށެވެ.
މީގެ އިތުރުން ރައީސް ސާލިހު ވިދާޅުވީ ގައުމުގައި ރައްޔިތުން ބޭނުންވާ ކަންކަން ބަދަލު ކުރުމަށް ކެރިގެން ނުކުންނަން ޖެހޭ ކަމަށާއި، އަޑު އުފުލަންޖެހޭ ކަމަށެވެ. ރައްޔިތުން ނުކުތުމުން ސަރުކާރަށް އަޑު އަހަން މަޖުބޫރުވާނެ ކަމަށް އެމަނިކުފާނު ވިދާޅުވިއެވެ.
ގާނޫނު އަސާސީގައި ހައްގުތައް ލިޔެފައިވާކަން ފާހަގަކުރައްވައި ރައީސް ސާލިހު ވިދާޅުވީ ބަސް ބުނުމުގެ މިނިވަންކަން، މައުލޫމާތު ހޯދާ ލިބިގަތުމުގެ މިނިވަންކަން ކަށަވަރުކޮށްފައިވާ ކަމަށާއި، ޕެންޝަން ލިބުމުގެ ހައްގާއި، ހިލޭ ބޭސްފަރުވާ ސަރުކާރުން ދޭންޖެހޭނެކަން ކަށަވަރުކޮށްފައިވާ ކަމަށެވެ. ނަމަވެސް މިދިޔަ ދުވަސްތަކުގައި މިހުރިހާ ހައްގުތަކެއް ނިގުޅައިގަތުމަށް މިސަރުކާރުން މަސައްކަތް ކޮށްފައިވާ ކަމަށް ރައީސް ސާލިހު ވިދާޅުވިއެވެ.
