އަމާޒަކީ ރައްޔިތުންގެ މަޖިލީހުގެ މެޖޯރިޓީހޯދުމާއި 2028 ގައި އެމްޑީޕީ ވެރިކަމަށް ގެނައުން: ރައީސް ޞާލިހު
ރައީސް ވިދާޅުވީ އެމްޑީޕީން ބައެއް ފަހަރު އިދިކޮޅުގައި އޮވެ މާ ރަނގަޅު މަސައްކަތްތަކެއްކުރާކަމަށް
ރައީސުލްޖުމްހޫރިއްޔާ އިބްރާހިމް މުހައްމަދު ސާލިހު
ކުރިޔަށްއޮތް ތަނުގައި އަމާޒަކީ ކުރިޔަށް އޮތް ރައްޔިތުންގެ މަޖިލީހުގެ މެޖޯރިޓީ އެމްޑީޕީއަށް ހޯދައިދިނުމާއި 2028 ވަނަ އަހަރު އެމްޑީޕީ ވެރިކަމަށް ގެނައުމަށްކަމަށް އެމްޑީޕީގެ އެންމެ އިސްލީޑަރ އަދި ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު ވިދާޅުވެއްޖެއެވެ.
މިހާރު ކުރިޔަށްދާ އެމްޑީޕީގެ ގައުމީ މަޖިލީހުގައި ވާހަކަދައްކަވަމުން ރައީސް ޞާލިހު ވިދާޅުވީ އެމްޑީޕީގެ އަމާޒަކަށްވާނީ އަނެއްކާވެސް ޒިންމާދާރު އިދިކޮޅު ޕާޓީއެއްގެ ގޮތުގައި މަސައްކަތްކުރުންކަމަށެވެ. އެކަމަކީ އެމްޑީޕީއަށް އައު ކަމެއްނޫންކަން ފާހަގަކުރައްވާ ރައީސް ވިދާޅުވީ އެމްޑީޕީން ބައެއް ފަހަރު އިދިކޮޅުގައި އޮވެ މާ ރަނގަޅު މަސައްކަތްތަކެއްކުރާކަމަށެވެ. އެކަން މިފަހަރުވެސް ފެނިގެންދާނެކަމަށް ރައީސް ވިދާޅުވިއެވެ.
ރައީސް ޞާލިހު ވިދާޅުވީ އެހެން ޕާޓީތަކާއި ޚިލާފަށް އެމްޑީޕީ އަކީ އިންތިޚާބުތަކުން ނާކާމިޔާބުވުމުން މަޑުން ތިބޭ ބައެއް ނޫންކަމަށެވެ. 2018 ވަނަ އަހަރު އިންތިޚާބުން ނާކާމިޔާބީ އާ ކުރިމަތިވި ފަރާތުން އަމަލުކުރިގޮތަށް ރައީސް އަލިއަޅުވާލެއްވިއެވެ.
ރައީސް ވިދާޅުވީ އެމްޑީޕީ ވަރުގަދަ އޮޕަޒިޝަނެއްގެ ގޮތުގައި އޮތުމަށް ބޭނުންވާ ހުރިހާ އެހީތެރިކަމަކާއި އެއްބާރުލުމެއް ދެއްވާނެކަމަށެވެ. ރައީސް ވިދާޅުވީ ޑިމޮކްރަސީގައި ވެރިކަމުގައި ތިބެ މަސައްކަތްކުރުމާއި އިދިކޮޅުގައި ތިބެ މަސައްކަތްކުރުން އެއީ ވެރިކަމުގެ ތެރޭގައި އޮންނަކަމެއްކަމަށެވެ.
