އެޕްސްޓީން މައްސަލައިގައި ޕްރިންސް އެންޑްރޫ ޑިއުކް އޮފް ޔޯކް ގެ ޓައިޓްލް ދޫކޮށްލައިފި
ޖިންސީ ކުށްވެރިޔާ އެޕްސްޓީނާ ގުޅުން އޮތް ކަމަށް ތުހުމަތު ކުރެވޭ ޕްރިންސް އެންޑްރޫ، ރަސްގެފާނުގެ ރުހުމާއެކު، އޭނާގެ ޝާހީ މަޤާމުތަކާއި ޝަރަފުތައް ދޫކޮށްލައިފި. ރާނީ އެލިޒަބަތުގެ ކިބައިން ލިބުނު ޑިއުކް އޮފް ޔޯކްގެ ޓައިޓަލް ވެސް ދޫކޮށްލުމަށްފަހު، އޭނާ މިހާރު ހުންނާނީ ހަމައެކަނި ޕްރިންސެއްގެ ގޮތުގައި.
މެލާނިއާ ޓްރަމްޕް، ޕްރިންސް އެންޑްރޫ، ގްވެންޑޮލިން ބެކް އަދި ޖެފްރީ އެޕްސްޓީން މާ-އޭ-ލަގޯ ކްލަބް، ޕާމް ބީޗް، ފްލޮރިޑާ، ފެބްރުއަރީ 12، 2000 ގައި ބޭއްވި ޕާޓީއެއްގައި.
އިނގިރޭސި ޝާހީ ޚާންދާނުގެ ޕްރިންސް އެންޑްރޫ ޑިއުކް އޮފް ޔޯކް ގެ ޓައިޓްލް ދޫކޮށްލައިފި ކަމަށް އަމިއްލަ ބަޔާނެއްގައި އިޢުލާނުކޮށްފިއެވެ.
އެންޑްރޫ މިކަން އިއުލާނު ކުރި އިރު ޖިންސީ ކުށްވެރިޔާ ޖެފްރީ އެޕްސްޓީނާ ދެމެދު އޮތް ގުޅުމުގެ ސަބަބުން އޭނާގެ މައްޗަށް އިތުރުވަމުންދާ ފިއްތުންތަކާ އެކު، ބަކިންހަމް ޕެލަސް އިން އޭނާ އަށް ފިޔަވަޅު އެޅުމަށް ގޮވާލުންތައް ވަނީ އިތުރުވެފައެވެ.
އެއާއެކު އޭނާގެ ބަޔާނުގައި ބުނެފައިވަނީ އޭނާގެ މައްޗަށް ކުރެވޭ ތުހުމަތުތަކަށް އިންކާރު ކުރާ ކަމަށެވެ.
އެންޑްރޫގެ ބަޔާނުގައި އިތުރަށް ބުނެފައި ވަނީ އެ ގޮތައް ނިންމީ ރަސްގެފާނާއި ޢާއިލާއާއެކު މަޝްވަރާކުރުމަށްފަހު ގައި ކަމަށެވެ. އަދި އޭނާގެ މައްޗަށް ކުރެވެމުންދާ ތުހުމަތުތަކުން ރަސްގެފާނާއި ރަސްކަމުގެ ޢާއިލާގެ މަސައްކަތަށް އުނދަގޫވާ ކަމަށް ގަބޫލު ކުރެވޭތީ މި ނިންމުން ނިންމީ ކަމަށް ބަޔާނުގައި ބުނެފައިވެއެވެ.
"ރަސްގެފާނުގެ ރުހުމާއެކު، އަޅުގަނޑު މިހާރު އިތުރު ފިޔަވަޅެއް އަޅަންޖެހޭ ކަމަށް އަޅުގަނޑު ދެކެމެވެ. އެހެންކަމުން، އަޅުގަނޑުގެ މަޤާމު ނުވަތަ އަޅުގަނޑަށް ދީފައިވާ ޝަރަފުތައް މީގެ ފަހުން ބޭނުމެއް ނުކުރާނަމެވެ."
ޕްރިންސް އެންޑްރޫ ވަނީ ފާއިތުވި އަހަރުތަކުގައި ތަފާތު މައްސަލަތަކާ ކުރިމަތިލާން ޖެހިފައެވެ. އޭގެ ތެރޭގައި ވަރޖީނިއާ ގިއުފްރޭ އާއެކު ހައްލު ކުރި ކޯޓު ކޭސް އާއި، އޭނާގެ މާލީ ކަންކަމާ ގުޅޭ ސުވާލުތަކާއި، ޗައިނާގެ ޖާސޫސެއް ކަމަށް ބެލެވޭ މީހަކާ އޮތް ގުޅުން ހިމެނެއެވެ.
ޓައިޓްލްތައް ދޫކޮށްލުމަށް ފަހު އޭނާ ދެން ހުންނާނީ ހަމަ އެކަނި ޕްރިންސެއްގެ ގޮތުގައެވެ. ނަމަވެސް، އޭނާގެ މަންމާފުޅު ރާނީ އެލިޒަބަތުގެ ފަރާތުން ލިބިފައިވާ ޑިއުކް އޮފް ޔޯކް ގެ ޓައިޓްލް ބޭނުމެއް ނުކުރާނެއެވެ.
އެންޑްރޫ ވަނީ މީގެ ކުރިން އޭނާގެ ހިޒް ރޯޔަލް ހައިނެސް (އެޗްއާރްއެޗް) ޓައިޓްލް ބޭނުން ކުރުން ހުއްޓާލާ، ރަސްކަމުގެ ރަސްމީ ޙަފްލާތަކުގައި ބައިވެރިވުން ހުއްޓާލާފައެވެ. މިހާރު އޭނާގެ ދައުރު އިތުރަށް ކުޑަވެގެންދާނެއެވެ.
އޭނާގެ ކުރީގެ އަނބިމީހާ ސާރާ ފަރގިއުސަން ގެ ނަމުގެ ކުރިއަށް އޮތް ޓައިޓްލް، ޑަޗެސް އޮފް ޔޯކް ބޭނުމެއް ނުކުރާނެއެވެ. ނަމަވެސް އެ ދެމީހުންގެ ދެ ދަރިން ޕްރިންސެސްގެ ޓައިޓްލް ދަމަހައްޓާނެއެވެ.
ޕްރިންސް އެންޑްރޫ ވަނީ އަގުވެއްޓިފައިވާ ވިޔަފާރިވެރިޔާ އެޕްސްޓީނާ ދެމެދު އޮތް ގުޅުމާ ގުޅިގެން ގިނަ ސުވާލުތަކާ ކުރިމަތިލާން ޖެހިފައެވެ. އޭގެ ތެރޭގައި ފަހަކަށް އައިސް، އޭނާ އެޕްސްޓީނާ ގުޅުން ކަނޑާލީ ހަޤީޤަތުގައި ކޮން އިރަކުތޯ ވެސް ވަނީ ސުވާލު އުފެދިފައެވެ.
ބީބީސީ ނިއުސްނައިޓްގެ އިންޓަވިއުގައި، ޕްރިންސް އެންޑްރޫ ބުނެފައި ވަނީ 2010 ވަނަ އަހަރުގެ ޑިސެމްބަރު މަހު ނިއުޔޯކުގައި އެޕްސްޓީނާ އެކު ނެގި ފޮޓޯ ގެ ފަހުން އޭނާއާ ހުރިހާ ގުޅުމެއް ކަނޑާލިކަމަށެވެ.
ނަމަވެސް ފަހުން ހާމަވި 2011 ވަނަ އަހަރުގެ ފެބްރުއަރީ މަހުގެ އީމެއިލްތަކުން ދައްކާގޮތުގައި އެންޑްރޫ ވަނީ އަމިއްލަ ގޮތުން އެޕްސްޓީނާ ގާތް ގުޅުމެއް ބަހައްޓާފައެވެ.
ޕްރިންސް އާ ގުޅޭ ގޮތުން ދެމިގެންދާ މައްސަލަތަކާ ހެދި ބަކިންގަމް ޕެލަސްގައި ކަންބޮޑުވުން އިތުރުވަމުން ގޮސްފައިވެއެވެ.
