ރާއްޖެއަށް އެންމެ ރަނގަޅު ނިޒާމަކީ ރިޔާސީ ނިޒާމު، އަޅުގަނޑުގެ ތާއީދު އޮތީވެސް ރިޔާސީ ނިޒާމަށް: ރައީސް ޞާލިހު
ނިޒާމީ ވޯޓަކަށް ގޮސްފިކަމަށްވާނަމަ ރިޔާސީ ނިޒާމު ރާއްޖޭގައި ބޭއްވުމަށްޓަކައި ކުރަންޖެހޭ މަސައްކަތްކުރައްވާނެކަމަށް ރައީސް ޞާލިހު ވިދާޅުވި
ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު
ރާއްޖެއަށް އެންމެ ރަނގަޅު ނިޒާމަކީ ރިޔާސީ ނިޒާމުކަމަށާއި ހުދު އެމަނިކުފާނުވެސް ތާއީދުކުރައްވަނީ ރިޔާސީ ނިޒާމަށްކަމަށް އެމްޑީޕީގެ އެންމެ އިސްލީޑަރު އަދި ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު ވިދާޅުވެއްޖެއެވެ.
މިހާރު ކުރިޔަށްދާ އެމްޑީޕީގެ ގައުމީ މަޖިލީހުގެ ޖަލްސާގައި މަޖިލީހަށް ހުށަހަޅާފައިވާ ނިޒާމުގެ ވޯޓާއި ގުޅޭގޮތުން ވާހަކަދައްކަވަމުން ރައީސް ވިދާޅުވީ ރިޔާސީ ނިޒާމާއި ބަރުލަމާނީ ނިޒާމުގައިވެސް ރަނގަޅު ކަންތައްތަކާއި ގޯސްކަންތައްތަކެއް އެބަހުރިކަމަށެވެ. ނަމަވެސް ރާއްޖެއަށް އެންމެ ރަނގަޅު ނިޒާމަކީ ރިޔާސީ ނިޒާމުކަމަށް ރައީސް ވިދާޅުވިއެވެ.
ގައުމީ މަޖިލީހުގައި ވާހަކަދައްކަވަމުން ގެންދަވާ އެމްޑީޕީގެ އެހެން މެމްބަރުންވެސް ގެންދަވަނީ ރިޔާސީ ނިޒާމަށް ތާއީދުކުރައްވާ ވާހަކަދައްކަވަމުންނެވެ. އަދި އެމްޑީޕީ ދެން އޮންނާނީ ޒިންމާދާރު އިދިކޮޅު ޕާޓީއެއްގެ ގޮތުގައި ކަމަށް އެމްޑީޕީގެ މެމްބަރުން ގެންދަވަނީ ވިދާޅުވަމުންނެވެ.
