ޔުވެންޓަސްއާ ދެކޮޅަށް ކުޅޭ މެޗަށް ވިޓީނިއާ ފިޓު

މިސީޒަންގެ ޔުއެފާ ޗެމްޕިއަންސް ލީގުގައި ޕެރިސް ސެއިންޓް ޖާމަން (ޕީއެސްޖީ)އިން ޔުވެންޓަސްއާ ދެކޮޅަށް ކުޅޭ މެޗަށް މިޑްފީލްޑަރު ވިޓީނިއަ ފިޓުކަމަށް ކޯޗު ކްރިސްޓޮފް ގަލްޓިއޭ ބުނެފިއެވެ.

ގްރޫޕް އެޗްގައި އަންގާރަ ދުވަހުގެ ރޭ ޕީއެސްޖީން ޔުވެންޓަސްއާ ދެކޮޅަށް ނުކުންނާނީ އަމިއްލަ ދަނޑުގައެވެ. މެޗުގެ ކުރިން އޮތް ޕްރެސް ކޮންފަރެންސްގައި ކޯޗު ގަލްޓިއޭ ބުނީ، މެޗުގެ ފުރަތަމަ 11 ގައި ހިމެނޭ ވަަރަށް ވިޓީނިއާ ފިޓު ކަމަށެވެ. ފްރާންސް ލީގުގައި ޕީއެސްޖީން ނަންޓެސްއާ ދެކޮޅަށް ކުޅުނު މެޗުގައި އޭނާ އަށް ވަނީ އަނިޔާވެގެން ބަދަލުކޮށްފައެވެ. އެއާއެކު ޕީއެސްޖީން ޗެމްޕިއަންސް ލީގުގައި ކުޅޭ ފުރަތަމަ މެޗު އޭނާ އަށް ގެއްލިދާނެ ކަމުގެ ބިރު އޮތީ ބޮޑުވެފައެވެ. ނަމަވެސް ގަލްޓިއޭ ބުނީ ވިޓީނިއާ ޓީމުގެ ފަރިތަކުތުންތަކުގައި ވެސް ބައިވެރިވެފައިވާ ކަމަށެވެ.

މީގެ އިތުރުން ގަލްޓިއޭ ބުނީ ޕީއެސްޖީގައި މިވަގުތު ސީރިއަސް އަނިޔާގެ މައްސަލަތަކެއް ނޫޅޭ ކަމަށެވެ. މުހިންމު ކުޅުންތެރިން ތިބީ ފިޓުކޮށް ކަން ފާހަގަކޮށް އޭނާ ވަނީ މުޅި ޓީމު މެޗަށް ތައްޔާރަށް އޮތް ކަމަށް ވެސް ބުނެފައެވެ. ގަލްޓިއޭ ބުނީ ޔުވެންޓަސް އަކީ ވަރުގަދަ ޓީމެއް ކަމަށާއި، އެ ޓީމުގައި ހައި ކޮލެޓީގެ ކުޅުންތެރިން ތިބި ކަމަށެވެ.

ޕީއެސްޖީގެ އެންމެ ބޮޑު ޓާގެޓަކީ ޗެމްޕިއަންސް ލީގު ކާމިޔާބުކުރުމެވެ. މި ސީޒަންގެ ޗެންޕިއަންސް ލީގުގެ ފުރަތަމަ މެޗުގައި ޔުވެންޓަސްއާ ދެކޮޅަށް ނުކުންނައިރު، ނިމުނު ސީޒަންގެ ޗެމްޕިއަންސް ލީގުގެ ފެށުން ޕީއެސްޖީއަށް ދިޔައީ އުނދަގޫކޮށެވެ.

ޕީއެސްޖީ އާއި ޔުވެންޓަސް ބައްދަލުކުރާ މެޗު ފަށާނީ މިރޭ ރާއްޖެ ގަޑިން 12 ޖަހާއިރުއެވެ.