ރާއްޖޭގައި ބޭއްވުމަށް ހަމަޖެހިފައިވާ ސާބާ ވިމަންސް ޗެމްޕިއަންޝިޕްގެ ލޯގޯ ރަސްމީކޮށް ލޯންޗުކޮށްފިއެވެ.
މި ބާސްކެޓް ބޯޅަ މުބާރާތް ކުރިއަށްދާނީ މި މަހުގެ 24 އިން 30 ގެ ނިޔަލަށް މާލޭގައެވެ. މި މުބާރާތާއި، މުބާރާތުގެ ލޯގޯ ރަސްމީކޮށް ލޯންޗުކޮށްފައިވަނީ އެޑިއުކޭޝަން މިނިސްޓްރީގައި އޮތް ޚާއްސަ އިވެންޓެއްގައި ޔޫތު މިނިސްޓަރު އަޙުމަދު މަޚްލޫފާއި، އެޑިއުކޭޝަން މިނިސްޓަރު ޑރ. އައިޝަތު އަލީއެވެ. މުބާރާތުގެ ރަސްމީ ލޯގޯއަކީ ދިވެހިވަންތަ ލޯގޯއެކެވެ.
ލޯގޯ ލޯންޗުކުރުމަށް ބޭއްވި އިވެންޓަށްފަހު މިނިސްޓަރު މަޚްލޫފް ވަނީ މުބާރާތުގައި ވާދަކުރާ ދިވެހި ޓީމަށް ހިތްވަރުދެއްވައި، ކާމިޔާބަށް އެދިވަޑައިގެންފައެވެ. އަދި މުޅި ޤައުމު ފަޚުރުވެރިވާފަދަ ނަތީޖާއެއް ހޯދުމަށް ވެސް މަޚްލޫފް ވަނީ އެދިވަޑައިގެންފައެވެ.
މިއީ ދެކުނު އޭޝިއާގެ ޤައުމުތަކުގެ މެދުގައި ބާއްވާ އަންހެން އެންމެ ފޯރިގަދަ ބާސްކެޓު މުބާރާތެވެ. މިއަހަރުގެ މުބާރާތުގައި ޖުމުލަ ހަ ޤައުމުކަމުން ވާދަކުރާނެއެވެ. އެއީ ދިވެހިރާއްޖޭގެ އިތުރުން، އިންޑިއާ، ބޫޓާން، ނޭޕާލް، ބަންގްލަދޭޝް އަދި ސްރީ ލަންކާއެވެ. މުބާރާތް ކުރިއަށް ގެންދިޔުމަށް ހަމަޖެހިފައިވަނީ ރައުންޑް ރޮބިން އުސޫލުންނެވެ.
މި މުބާރާތަށް ތައްޔާރުވުމުގެ ގޮތުން ދިވެހި ޓީމުން ވަނީ ކޭމްޕުތަކެއް ވެސް ކުރިއަށް ގެންގޮސްފައެވެ. އެގޮތުން އަވައްޓެރި އިންޑިއާ އަދި ތައިލެންޑުގައި ދިވެހި ޓީމު ވަނީ ކޭމްޕުކޮށް، އެކުވެރިކަމުގެ މެޗުތަކެއް ވެސް ކުޅެފައެވެ.
