ސާއުތް އޭޝިއަން ބާސްކެޓްބޯލް އެސޯސިއޭޝަން (ސާބާ) ޗެމްޕިއަންޝިޕްގައި ރާއްޖެ އަތުން ނޭޕާލް ހަނި މޮޅެއް ހޯދައިފި އެވެ.

ހޮނިހިރު ދުވަހުގެ ރޭ ކުޅުނު މެޗު ރާއްޖެއާ ވާދަކޮށް ނޭޕާލް އިން ކާމިޔާބުކުރީ 61 ޕޮއިންޓް 59 ޕޮއިންޓުންނެވެ.

މި މެޗު ރާއްޖެއިން ފެށީ ވަރަށް ވަރުގަދަކޮށެވެ. އެގޮތުން މެޗުގައި ފުރަތަމަ ރާއްޖެއަށް ޕޮއިންޓް ހޯދައިދީފައިވަނީ އިބްރާހިމް ރަޝްވާން (ޗިކު) އެވެ. އެއަށްފަހުވެސް ރާއްޖެ އިން ވަނީ ލީޑު ނަގާފައެވެ. އެހެންނަމަވެސް ފުރަތަމަ ކުއާޓާ ނިމުނީ ފަހުވަގުތު ނޭޕާލް އިން ކާމިޔާބުކުރި ޕޮއިންޓްތަކާއެކު 16 ޕޮއިންޓް 16 ޕޮއިންޓުން ދެޓީމު އެއްވަރުވެގެންނެވެ.

ދެވަނަ ކުއާޓާގައި ރާއްޖެއިން ކުޅުން ރަނގަޅުކޮށް ވަރުގަދަކަމާއެކު ނިކުމެފައިވާއިރު، މި ކުއާޓާގައި ރާއްޖޭގެ ހުސެއިން ހަލީމް (ޗިކަނޭ) ވަނީ މޮޅު ކުޅުމެއް ދައްކާފައެވެ. އެގޮތުން ދެވަނަ ކުއާޓާ ނިމުނީ 36 ޕޮއިންޓް 29 ޕޮއިންޓުން ރާއްޖެ ކުރީގައި އޮވެގެންނެވެ.

އެހެންނަމަވެސް ތިންވަނަ ކުއާޓާގައި ރާއްޖޭގެ ޓީމުގެ ފަރާތުން ގޯސްތަކެއް ފެނިގެންގޮސްފައިވާއިރު، ވަކި ހިސާބަކުން ނޭޕާލުން ވަނީ މެޗުގެ ލީޑު ނަގާފައެވެ. މި ކުއާޓާގައި ނޭޕާލްގެ ރަބިން ކަތްރީ ވަނީ މޮޅު ކުޅުމެއްދައްކާ ގިނަ ޕޮއިންޓްތަކެއްވެސް އެޓީމަށް ހޯދައިދީފައެވެ. ތިންވަނަ ކުއާޓާ ނިމުނީ 49 ޕޮއިންޓް 49 ޕޮއިންޓުން ދެޓީމު އެއްވަރުވެގެންނެވެ.

ހަތަރުވަނަ ކުއާޓާގައި ނޭޕާލްގެ ކުޅުންތެރިން ވަރުގަދަ ޑިފެންސެއްކޮށްފައިވާއިރު، ރާއްޖޭ ކުޅުންތެރިން ވަނީ ފުލުފުލުގައި އެޓޭކްކޮށްފައެވެ. އެގޮތުން ނޭޕާލް ފަސް ޕޮއިންޓްގެ ލީޑަކާއެކު އޮއްވާ ރާއްޖެއިން ވަނީ މި ކުއާޓާގައި އެއް ޕޮއިންޓަށްވެސް ލީޑު ކުޑަކޮށްފައެވެ. އެހެންނަމަވެސް ނޭޕާލުން ވަނީ ފަހުވަގުތު ހޯދި ޕޮއިންޓްތަކަކާއެކު 61 ޕޮއިންޓް 49 ޕޮއިންޓުން މެޗު ކާމިޔާބުކޮށްފައެވެ.

މުބާރާތުގައި ރާއްޖެ ނިކުންނާނީ އާދީއްތަ ދުވަހު ބަންގްލަދޭޝްއާ ދެކޮޅަށެވެ. މި ދެޓީމު އެންމެ ފަހުން ބައްދަލުކޮށްފައިވަނީ މި މުބާރާތުގައެވެ. އެފަހަރު ރާއްޖެއިން ވަނީ ބަންގްލަދޭޝް ބަލިކޮށްފައެވެ.