މި މަހުގެ 19 ވަނަ ދުވަހު ރާއްޖޭގައި ފެށުމަށް ހަމަޖެހިފައިވާ ސާބާ ޗެމްޕިއަންޝިޕް ބާސްކެޓް މުބާރާތަކީ މި ސަރަހައްދުގެ ވޯލްޑް ކަޕް ކަމަށާއި އެގޮތުން އަމިއްލަ ގައުމުގައި ބާއްވާ މި މުބާރާތް ކާމިޔާބުކުރުމަކީ ބާސްކެޓުން ކުރިއަށްދިއުމަށް ރާއްޖެއަށް ލިބޭނެ އިތުރު ހިތްވަރެއް ކަމަށް ގައުމީ ބާސްކެޓް ޓީމުގެ ކެޕްޓަން މުހައްމަދު ޒިލާލް (ޒިލާ) ބުނެފިއެވެ.
މި މުބާރާތަށް ރާއްޖޭގެ ޓީމު ތައްޔާރުވަމުން އަންނަ އިރު، ޓީމުގެ ހުރިހާ ކުޅުންތެރިންނާއި އޮފިޝަލުން ވަނީ މާލޭގެ ބޮޑު ހޮޓަލެއްގައި ކޭމްޕް ކޮށްފައެވެ.
މުބާރާތަށް ވަމުންދާ ތައްޔާރީތަކާ ބެހޭ ގޮތުން ރާއްޖެއެމްވީ އަށް މައުލޫމާތު ދެމުން ޒިލާ ބުނީ މި މުބާރާތް ކާމިޔާބުކުރުމަށް ހުރިހާ ކުޅުންތެރިންވެސް ތިބީ ކެތްމަދުވެފައި ކަމަށާއި އެގޮތުން ފަރިތަކުރުންތައް ކުރިއަށްދާއިރު ކުޅުންތެރިންގެ ފަރާތުން ކާމިޔާބީ ހޯދުމަށް ބޭނުންވެފައިވާ މިންވަރު އެނގިގެންދާ ކަމަށެވެ.
މި ސަރަހައްދުގެ ފަސް ގައުމަކާއެކު ފެށުމަށް ހަމަޖެހިފައިވާ މި މުބާރާތުގައި ވާދަކުރާ އިންޑިއާ ޓީމަކީ އެންމެ ވަރުގަދަ ޓީމު ކަމަށް އެހެން ހުރިހާ ޓީމުތަކުން ވެސް އެއްބަސްވެއެވެ. އެގޮތުން ރާއްޖެއަށް ވެސް އެންމެ އުނދަގޫވާނެ ޓީމެއްގެ ގޮތުގައި ބެލެވެނީ އިންޑިއާ އެވެ.
މިކަމާ ގުޅޭ ގޮތުން ޒިލާ ބުނީ މުބާރާތުގައި ވާދަކުރާ ފަސް ޓީމުގެ ތެރެއިން އިންޑިއާ އަދި ލަންކާއަކީ ނިސްބަތުން ވަރުގަދަ ދެ ޓީމް ކަމަށެވެ. އަދި މި މުބާރާތް އަމިއްލަ ގައުމުގައި ބާއްވާއިރު އެއީ އެހެން ޓީމުތައް ބަލިކުރަން ލިބޭނެ އިތުރު ހިތްވަރެއް ކަމަށް ވެސް ޒިލާ ބުންޏެވެ.
ޒިލާ ބުނީ މިހުރިހާ ޓީމުތަކެއްގެ ތެރެއިންވެސް އިންޑިއާ އަކީ ވަރުގަދަ ޓީމެއް ކަމުން އެޓީމު ނޫން އެހެން ހުރިހާ ޓީމެއްގެ މައްޗަށް ކުރި ހޯދުމަކީ ގައުމީ ޓީމުގެ އަޒުމެއް ކަމަށެވެ.
މި މުބާރާތުގައި ރާއްޖެގެ އިތުރުން ދެން ވާދަކުރަނީ އިންޑިއާ، ބަންގްލަދޭޝް، ނޭޕާލް އަދި ސްރީ ލަންކާއެވެ.
މިފަހަރުގެ މުބާރާތައް ރާއްޖެއިން އެކުލަވާލި ބާސްކެޓް ޓީމުގައި ޒުވާން ކުޅުންތެރިންތަކެއް ހިމެނިފައިވާ އިރު، އެ ކުޅުންތެރިންގެ ފަރާތުން ތަފާތު މޮޅު ކުޅުމެއް ފެންނަމުން އަންނަ ކަމަށް ޒިލާ ބުންޏެވެ. ޒިލާ ބުނީ ޓީމުގައި ހިމެނޭ ސީނިއާ ކުޅުންތެރިންގެ އިރުޝާދާއި ކޯޗުގެ އިރުޝާދާ އެކު ޒުވާން ކުޅުންތެރިން އަންނަނީ ފަރިތަކުރުންތަކުގައި ވަރަށް ރަނގަޅަށް ޕާފޯމް ކުރަމުން ކަމަށެވެ.
ކޮންމެ ކުޅިވަރެއް ކުޅޭ އިރު ވެސް އެ ކުޅިވަރަކަށް ބޭނުންވާނެ އެންމެ ބޮޑު އެހީއަކީ ސަޕޯޓަރުން ދެމުން އަންނަ އެއްބާރުލުމެވެ. އެގޮތުން އަމިއްލަ ފަސްގަނޑުގައި ބާއްވާ މުބާރާތެއްގައި ގައުމީ ޓީމުތައް ތަމްސީލުކުރަމުން އަންނަ އިރު އެ ގައުމެއްގެ ސަޕޯޓަރުން ޓީމަށް ދޭ ސަޕޯޓަކީ ކުޅުންތެރިންނަށް ލިބިގެންދާނެ އިތުރު ހިތްވަރެކެވެ.
ޒިލާ ބުނީ މި މުބާރާތަކީ ރާއްޖޭގައި ބާއްވާ މިފަދަ ބާސްކެޓްގެ ބޮޑު މުބާރާތެއް ކަމުން ގައުމުގައި ތަށި ބެހެއްޓުމަށްޓަކައި ޓީމުގެ ކުޅުންތެރިންނާ އެއްވަރަށް ސަޕޯޓަރުންގެ ވެސް އެއްބާރުލުން ވަރަށް މުހިންމު ކަމަށެވެ. އަދި ރާއްޖެ ކުޅޭ ކޮންމެ މެޗެއްގައި ދިވެހި ޓީމަށް ސަޕޯޓްކޮށްދިނުމަށް ވީހާވެސް ގިނަ ބޭފުޅުން އިންޑޯ ހޯލަށް އައުމަކީ ކެޕްޓަނެއްގެ ހައިސިއްޔަތުން އެދޭ ވަރަށް ބޮޑު އެދުމެއް ކަމަށެވެ.
މި މުބާރާތުގައި ވާދަކުރާ ޓީމުތައް މި މަހުގެ 18 ވަނަ ދުވަހު ރާއްޖެ އައުމަށް ހަމަޖެހިފައިވާ އިރު، މުބާރާތް ކުރިއަށްދާނީ މި މަހުގެ 19 އިން 25 އަށް ޒުވާނުންގެ މަރުކަޒު އެތެރޭ ކޯޓުގައެވެ.
