ސާބާ ޗެމްޕިއަންޝިޕް: ފަހަތުން އަރާ ލަންކާގެ މައްޗަށް ބަންގްލަދޭޝް ކުރިހޯދައިފި

ސައުތް އޭޝިއަން ބާސްކެޓްބޯލް އެސޯސިއޭޝަން (ސާބާ) ޗެމްޕިއަންޝިޕްގައި ފަހަތުންއަރާ ސްރީލަންކާގެ މައްޗަށް ބަންގަލަދޭޝް ކުރިހޯދައިފި އެވެ.

ހޮނިހިރު ދުވަހު ކުޅުނު މި މެޗު ލަންކާއާ ވާދަކޮށް ބަންގްލަދޭޝް އިން މެޗު ކާމިޔާބުކުރީ 90 ޕޮއިންޓް 80 ޕޮއިންޓުންނެވެ.

ފޯރިގަދަ ކުޅުމެއް ފެނިގެންދިޔަ މި މެޗުގެ ފުރަތަމަ ކުއާޓާ ނިމުނީ 28 ޕޮއިންޓް 25 ޕޮއިންޓުން ބަންގަލަދޭޝްގެ މައްޗަށް ލަންކާ ކުރީގައި އޮވެގެންނެވެ. އެހެންނަމަވެސް ދެވަނަ ކުއާޓާގައި ބަންގަލަދޭޝް އިން ވަނީ އެޓީމުގެ ކުޅުން ރަނގަޅުކޮށްފައެވެ. އެގޮތުން 50 ޕޮއިންޓް 46 ޕޮއިންޓުން ދެވަނަ ކުއާޓާގައި އެޓީމުން ވަނީ ލަންކާގެ މައްޗަށް ކުރިހޯދާފައެވެ.

ތިންވަނަ ކުއާޓާގައިވެސް ބަންގްލަދޭޝް އިން މޮޅު ކުޅުމެއް ދައްކާފައިވާއިރު، ތިންވަނަ ކުއާޓާ ނިމުނީ 74 ޕޮއިންޓް 66 ޕޮއިންޓެވެ. އެހެންނަމަވެސް ހަތަރުވަނަ ކުއާޓާގައި ލަންކާއިން ވަނީ ތިން ޕޮއިންޓަށް ފަރަގު ކުޑަކޮށްފައެވެ. އޭގެ ބަދަލުގައި ބަންގަލަދޭޝް އިން ވަނީ އެޓީމުގެ ކުޅުން ރަނގަޅުކޮށް ހަތަރުވަނަ ކުއާޓާ ނިމުމުގެ ކުރިން 90 ހަމަކޮށްފައެވެ.

މެޗުގައި ލަންކާއަށް އެންމެ ގިނަ ޕޮއިންޓް ހޯދައިދިނީ އަހުމަދު ސުދޭޝްއެވެ. އޭނާ ވަނީ 24 ޕޮއިންޓް ހަމަކޮށްފައެވެ. މީގެއިތުރުން އިރޭޝާ އަބީސޭކްރާ ވަނީ 21 ޕޮއިންޓް ހޯދާފައެވެ. ބަންގްލަދޭޝްގެ ޝަމްސުޒަމާން 28 ޕޮއިންޓް ހަމަކުރިއިރު، ކުމާރް ބިސްވަސް ވަނީ 24 ޕޮއިންޓް ހަމަކޮށްފައެވެ. މެޗުގެ މޮޅު ކުޅުންތެރިޔަކަށް ހޮވިފައިވަނީވެސް ކުމާރު ބިސްވަސް އެވެ.

މިއީ މުބާރާތުގައި ބަންގަލަދޭޝް ކުޅުނު ދެވަނަ މެޗެވެ. އެޓީމު މުބާރާތުގައި ކުޅުނު ފުރަތަމަ މެޗުގައި ނޭޕާލްގެ މައްޗަށް ވަނީ ކުރިހޯދާފައެވެ. މިއީ މުބާރާތުގައި ލަންކާ ކުޅުނު ދެވަނަ މެޗެވެ.

މުބާރާތުގައި ބަންގަލަދޭޝް އިން އާދީއްތަ ދުވަހުގެ ރޭ ރާއްޖެއާ ދެކޮޅަށް ނިކުންނައިރު، ލަންކާ ނިކުންނާނީ އާދީއްތަ ދުވަހު ހަވީރު އިންޑިއާއާ ދެކޮޅަށެވެ. އިންޑިއާ ވަނީ އެޓީމު ކުޅުނު ފުރަތަމަ މެޗު ރާއްޖެއާ ވާދަކޮށް މޮޅުވެފައެވެ.