އޭޝިއަން އެޓްލެޓިކްސް ޗެމްޕިއަންޝިޕްގެ ފައިނަލަށް ސާއިދު ދަތުރުކޮށްފި

މިހާރު ކުރިޔަށްދާ 22 ވަނަ އޭޝިއަން އެޓްލެޓިކްސް ޗެމްޕިއަންޝިޕްގެ 100 މީޓަރު ދުވުމުގެ ފައިނަލަށް ރާއްޖޭގެ ބާރު ދުވުންތެރިޔާ ހަސަން ސާއިދު ދަތުރުކޮށްފި އެވެ.

މުބާރާތުގެ ފައިނަލަށް ސާއިދު ދަތުރުކުރީ އޭނާ ވާދަކުރި އެއްވަނަ ހީޓްގެ ރޭސް 10.40 ސިކުންތުން ނިންމައިގެންނެވެ. އޭނާ އަށް ވާދަކުރި ހީޓުން ލިބުނީ ތިންވަނައެވެ.

ސާއިދު ވާދަކުރި ހީޓުގައި މެލޭޝިއާ، ތައިލޭންޑް، ޖަޕާން، އިރާގް، ހޮންކޮންގްގެ ދުވުންތެރިންވެސް ވާދަކުރި އެވެ. އެހެންނަމަވެސް ގިނަ ދުވުންތެރިން ފަހަތަށް ޖައްސާލުމަށްފަހު ސާއިދު ވަނީ ތިންވަނަ ހޯދާފައެވެ. އެއްވަނަ ގަތަރުގެ ދުވުންތެރިޔަކު ހޯދިއިރު، ދެވަނަ ހޯދީ ޗައިނާގެ ދުވުންތެރިޔެކެވެ.

ސާއިދު ސެމީ އަށް ދަތުރުކުރި ހީޓް ހައެއްގެ އެއްވަނަ ހޯދައިގެންނެވެ. ޖަޕާން، އަފްއާނިސްތާން އަދި ކަޒަކިސްތާންގެ ދުވުންތެރިން ފަހަތަށް ޖައްސާލުމަށްފަހު ސާއިދު ސެމީން ޖާގަ ހޯދީ 10.43 ސިކުންތުން ރޭސް ނިންމައިގެންނެވެ.

މި މުބާރާތުގެ 100 މީޓަރު ދުވުމުގެ އަންހެން ސެމީފައިނަލުގައި ރާއްޖޭގެ އަފާ އިސްމާއިލްވެސް ވަނީ ވާދަކޮށްފައެވެ. އެހެންނަމަވެސް އޭނާ ދިޔައީ ވާދަކުރި ހީޓުގެ 8 ވަނަ އަށެވެ. އަފާ ރޭސް ނިންމާފައިވަނީ 12.79 ސިކުންތުންނެވެ.

އެތްލެޓިކްސް އިން ގައުމީ ގިނަ ރެކޯޑުތަކެއް އާކޮށްފައިވާ ސާއިދު ވަނީ ދެކުނު ކޮރެއާގައި ކުރިއަށްދިޔަ އޭޝިއަން ގޭމްސްގެ 100 މީޓަރު ދުވުމުގެ ސެމީ ފައިނަލުގައި ވާދަކޮށްފަ އެވެ. މީގެއިތުރުން އޭނާ ވަނީ 2015 ވަނަ އަހަރުގެ އިންޑިއަން އޯޝަން އައިލެންޑް ގޭމްސްގައި ރާއްޖެ އަށް 100 މީޓަރު ދުވުމުން ރަން މެޑަލް ހޯދައިދީ އެ ގޭމްސްގެ 200 މީޓަރު ދުވުމުންނާއި މިދިޔަ އަހަރުގެ ސައުތު އޭޝިއަން ގޭމްސްގެ 100 މީޓަރު އަދި 200 މީޓަރު ދުވުމުން ރިހި މެޑަލް ހޯދައިފަ އެވެ.

މީގެ އިތުރުން ދުނިޔޭގެ އެންމެ ބޮޑު ކުޅިވަރު ހަރަކާތް ކަމަށްވާ އޮލިމްޕިކް ގޭމްސްގެ ޕްރިލިމިނަރީ ބުރު ފަހަނަ އަޅައި އެއްވަނަ ބުރުގައި މިދިޔަ އަހަރު ސާއިދު ވަނީ ވާދަކޮށްފަ އެވެ.