ސާބާ ޗެމްޕިއަންޝިޕް: ބަންގްލަދޭޝް އަތުން ވެސް ބަލިވެ ރާއްޖެއަށް ރިހި މެޑަލްގެ ފުރުސަތު ގެއްލިއްޖެ

ސައުތު އޭޝިއަން ބާސްކެޓްބޯލް އޭސޯސިއޭޝަން (ސާބާ) ޗެމްޕިއަންޝިޕްގައި ބަންގްލަދޭޝް އަތުން ވެސް ބަލިވެ، ރާއްޖެއަށް ރިހި މެޑަލް ހޯދުމުގެ ފުރުސަތު ގެއްލިއްޖެ އެވެ.

އާދީއްތަ ދުވަހުގެ ރޭ ކުޅުނު މެޗުން ބަންގްލަދޭޝްއާ ވާދަކޮށް ރާއްޖެ ބަލިވީ 86 ޕޮއިންޓް 52 ޕޮއިންޓުންނެވެ.

ޒުވާނުންގެ މަރުކަޒު އެތެރޭ ކޯޓުގައި ކުޅުނު މި މެޗުގެ ފުރަތަމަ ކުއާޓާ ނިމުނީ 12 ޕޮއިންޓް ނުވަ ޕޮއިންޓެވެ. ދެވަނަ ކުއާޓާ 41 ޕޮއިންޓް 17 ޕޮއިންޓާއެކު ބަންގްލަދޭޝް ކުރީގައި އޮވެ ނިމުނުއިރު، ތިންވަނަ ކުއާޓާ ބަންގްލަދޭޝް އިން ގެންދިޔައީ 59 ޕޮއިންޓް 26 ޕޮއިންޓުންނެވެ. އަދި ހަތަރު ވަނަ ކުއާޓާ ނިމިފައިވަނީ 86 ޕޮއިންޓް 52 ޕޮއިންޓާއެކު ބަންގްލަދޭޝް ކުރީގައި އޮވެގެންނެވެ.

މި މެޗުގައި ރާއްޖޭގެ ޒަބީރު އަހުމަދު އަދި ފަޒްލީ އަލީ ހަތް ޕޮއިންޓް ހޯދާފައިވާއިރު، ރަޝްވާން އިބްރާހިމް ވަނީ އަށް ޕޮއިންޓް ހޯދާފައެވެ. ބަންގްލަދޭޝް ޓީމަށް އެންމެ ގިނަ ޕޮއިންޓް ހޯދައިދިނީ ހާން ޝަމްސުއްޒަމާން އެވެ. އޭނާ ވަނީ މެޗުގައި 39 ޕޮއިންޓް ހޯދާފައެވެ. ދެވަނަ އަށް އެންމެ ގިނަ ޕޮއިންޓް ހޯދީ ރަހްމާން އެވެ. އޭނާ ވަނީ 24 ޕޮއިންޓް ހޯދާފައެވެ.

ސާބާ ޗެމްޕިއަންޝިޕްގައި ރާއްޖެ ކުޅުނު ތިން މެޗުން ވެސް ވަނީ ބަލިވެފައެވެ. ފުރަތަމަ މެޗުގައި އިންޑިއާ އަތުން އަދި ދެވަނަ މެޗުން ނޭޕާލް އަތުން ރާއްޖެ ވަނީ ބަލިވެފައެވެ. ބަންގްލަދޭޝް ވަނީ އެޓީމު ކުޅުނު ތިން މެޗު ވެސް ކާމިޔާބުކޮށްފައެވެ. އެޓީމު މުބާރާތުގައި ކުޅޭ ފަހު މެޗުގައި ނިކުންނާނީ ވަރުގަދަ އިންޑިއާއާ ދެކޮޅަށެވެ.