ޖޯ ބައިޑަންއަކީ ދައުލަތުގެ ދުޝްމަނެއް: ޓްރަމްޕް
4 ސެޕްޓެމްބަރު 2022 | އާދީއްތަ 11:492020ގެ އިންތިޚާބު ވަގަށްނެންގެވީކަމަށް ޓްރަމްޕް ކުރައްވާ ދައުވާ އަދިވެސް ހުއްޓަވާނުލައްވާ
ޓްރަމްޕް ކެމްޕެއިން އެއްވުމެއްގައި
ރައީސް ޖޯ ބައިޑަންއަކީ ދައުލަތުގެ ދުޝްމަނެއްކަމަށް އެމެރިކާގެ ކުރީގެ ރައީސް ޑޮނަލްޑް ޓްރަމްޕް ވިދާޅުވެއްޖެއެވެ. ޓްރަމްޕް މިހެން ވިދާޅުވީ ޕެންސިލްވޭނިޔާގައި ބޭއްވި ކެމްޕެއިން އެއްވުމެއްގައި ވާހަކަފުޅުދައްކަވަމުންނެވެ. މިއީ ޓްރަމްޕްގެ މަރަލާގޯ އެސްޓޭޓް ބަލައި ފާސްކުރުމަށް އެފްބީއައި ވަތްފަހުން ޓްރަމް އާންމު ތަނެއްގައި ވާހަކަފުޅުދެއްކެވި ފުރަތަމަފަހަރެވެ.
ސެނެޓްގެ ގޮޑިއަކަށް ވާދަކުރައްވާ އެމެރިކާގެ ޓީވީ ތަރި މެހްމެޓް އޮޒް (ޑޮކްޓަރ އޮޒް)އާއި ޕެންސިލްވޭނިޔާގެ ގަވަރުނަރުކަމަށް ވާދަކުރައްވާ ބޭފުޅާއަށް ކެމްޕެއިންކޮށްދެއްވުމަށް ބޭއްވި އެއްވުމުގައި ވާހަކަފުޅުދައްކަވަމުން ޓްރަމްޕް ވަނީ، ބައިޑަން ހަތިޔާރެއްގެ ގޮތުގައި އެފްބީއައި އޭނާއާ ދެކޮޅަށް ބޭނުންފުޅުކުރެއްވިކަމަށް ތުހުމަތުކުރައްވާފައެވެ. އަދި އެފްބީއައިގެ ރެއިޑްއަކީ މުޅި އެމެރިކާގެ ތާރީޚުގައިވެސް އެއްވެސް ސަރުކާރަކުން ނަހަމަގޮތުގައި ބާރުގެ ބޭނުން އެންމެ ބޮޑަށް ކުރި ފަހަރު ކަމަށް ވިދާޅުވެފައެވެ.
ކެމްޕެއިން އެއްވުން ބޭއްވުނީ ވަކި ދެ ކެންޑިޑޭޓުންނަށް ކަމަށް ވިޔަސް، އެ ދެ ބޭފުޅުން ވާހަކަފުޅުދެއްކެވީ ވަރަށް ކުޑަވަގުތު ކޮޅަކަށެވެ. ޑޮނަލްޑް ޓްރަމްޕް ޕޯޑިއަމްގައި ހޭދަކުރެއްވި ދެގަޑިއެއްހާއިރުގެ ބޮޑުބައި ފޯކަސްކުރެއްވީ އެފްބީއައި ރެއިޑަށް ފާޑުވިދާޅުވުމަށެވެ. އެއަށްފަހު އާންމުކޮށް ވިދާޅުވާގޮތަށް 2020ގެ އިންތިޚާބު އޭނާގެ ކިބައިން ވަގަށް ނެގުނީ ކަމަށާއި، ގައުމު ސަލާމަތްކުރުން މުހިންމުކަމަށް ވިދާޅުވެ ގިނަ ވާހަކަފުޅުތަކެއް ދެއްކެވިއެވެ.
އަނެއްކޮޅުން ޚަބަރުލިބޭގޮތުގައި، ޓްރަމްޕްގެ މަރަލާގޯ އެސްޓޭޓުން އެފްބީއައި ގެންދިޔަ ލިއުންތަކުގެ ތެރޭގައި "ޓޮޕް ސީކްރެޓް" ލިއުންތަކަކާއި އަދި "ކްލެސިފައިޑް"ކަމަށް ޖަހާފައިވާ ހުސް ވިއްސަކަށް ފޯލްޑަރު ހިމެނޭކަމަށް ޚަބަރުލިބެއެވެ.
ސަރުކާރުގެ އެހާ ޚާއްސަ ލިޔުންތަކެއް ޓްރަމްޕްގެ އަމިއްލަފުޅު ގެކޮޅުން ފެނިފައިވުމުން އެމައްސަލަ މިހާރު ގެންދަނީ ސީރިއަސް ގޮތެއްގައި ތަހުގީގުކުރަމުންނެވެ.
