ފިއޮރެންޓީނާ ކައިރިން ޔުވެންޓަސް ފުއްދާލަން ޖެހުނީ ޕޮއިންޓަކުން
ފިއޮރެންޓީނާގެ ދަނޑުގައި ކުޅުނު މެޗުން ނިމުނީ 1-1 އިން އެއްވަރުވެގެން
ޔުވެންޓަސް އިން ކުޅުނު މެޗުގެ ތެރެއިން
އިޓާލިއަން ލީގުގައި ފިއޮރެންޓީނާއާ ދެކޮޅަށް ކުޅުނު މެޗުން ޔުވެންޓަސް އެއްވަރުވެއްޖެއެވެ.
ފިއޮރެންޓީނާގެ ދަނޑުގައި ކުޅުނު މެޗުން ނިމުނީ 1-1 އިން އެއްވަރުވެގެންނެވެ. މެޗުގައި ފުރަތަމަ ލަނޑު ޖަހައި ލީޑު ނެގީ ވެސް ޔުވެންޓަސް އިންނެވެ. މެޗުގެ ނުވަ ވަނަ މިނެޓުގައި ޔުވެންޓަސް އަށް ލީޑު ނަގައިދިނީ އާކަންޑިއުޝް މިލިކްއެވެ. އެ ލަނޑަށްފަހު ވެސް ޔުވެންޓަސް އިން އިތުރު ލަނޑެއް ޖެހުމަށް މަސައްކަތް ކުރަމުން ދަނިކޮށް، ފިއޮރެންޓީނާ އިން ވަނީ ލަނޑެއް ޖަހައި ނަތީޖާ ހަމަހަމަކޮށްފައެވެ. މެޗުގެ 29 ވަނަ މިނެޓުގައި ފޮއޮރެންޓީނާ އަށް ނަތީޖާ ހަމަހަމަކޮށްދިނީ ކްރިސްޓިއަން ކޯމޭއެވެ.
ލީޑު ނެގުމަށް ފިއޮރެންޓީނާއަށް ވަނީ ރަނގަޅު ފުރުސަތެއް ލިބިފައެވެ. މެޗުގެ 44 ވަނަ މިނެޓުގައި އެ ޓީމަށް ލިބުނު ޕެނަލްޓީއެއްގައި ލޫކަ ޔޯވިޗް ފޮނުވާލި ބޯޅަ ކާމިޔާބެއް ނުވިއެވެ. މެޗުގައި ދެ ޓީމަށް ވެސް ލަނޑު ޖަހާނެ އިތުރު ފުރުސަތު ލިބުނު ނަމަވެސް، ބޭނުމެއް ނުހިފުނެވެ.
ފަސް މެޗުން ލިބުނު ނުވަ ޕޮއިންޓާއެކު ޔުވެންޓަސް އޮތީ ތާވަލްގެ ފަސް ވަނަ މަގާމުގައެވެ. ހަ ޕޮއިންޓާއެކު ފިއޮރެންޓީނާ އޮތީ 10 ވަނަ މަގާމުގައެވެ.
