މާޒިޔާއަތުން ޕޮއިންޓަކުން ފުއްދާލަން ޖެހުނަސް ހިތްހަމަ ޖެހޭނެ: ސުޒޭން

މާލެ ލީގުގެ ދެވަނަ ބުރުގެ ފުރަތަމަ މެޗުގައި އެންމެ މޮޅު ޓީމާއި ދެކޮޅަށް ނިކުންނަން ޖެހުމަކީ ވަރުގަދަ ޗެލެންޖެއް ކަމަށާ، އެ މެޗުން ޕޮއިންޓަކުން ފުއަދާލަން ޖެހުނަސް ހިތްހަމަ ޖެހޭނެ ކަމަށް ވިކްޓްރީގެ ކޯޗް އަލީ ސުޒޭން ބުނެފި އެވެ.

އެސްޓީއޯ މާލެ ލީގުގައި ވިކްޓްރީ އާއި މާޒިޔާ ކުޅޭ މެޗުގެ ކުރުން، ހޮނިހިރު ދުވަހު އެފްއޭއެމް ހައުސްގައި ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަމުން ސުޒޭން ބުނީ، މާޒިޔާ އަކީ ލީގުގައި އޮތް އެންމެ ވަރުދަގަ ޓީމު ކަމަށާއި، ދެވަނަ ބުރަށް ކުރިމަތިލާއިރު އެންމެ ފުރަތަމަވެސް އެންމެ މޮޅު ޓީމާއި ދެކޮޅަށް ނިކުންނަން ޖެހުމަކީ ބޮޑު ޗެލެންޖެއް ކަމަށެވެ. ފާއިތުވި ބުރުގައިވެސް އެއްވެސް ޓީމަކަށް މާޒިޔާ ހިފެހެއްޓިފައި ނެތުމުން، މާޒިޔާއާއި ދެކޮޅަށް ކުޅޭމެޗުން ޕޮއިންޓަކުން ފުއްދާލަން ޖެހުނަސް ހިތްހަމަ ޖެހޭނެ ކަމަށްވެސް ސުޒޭން ބުންޏެވެ.

ސުޒޭން ބުނީ އެޓީމުގެ އަމާޒަކީ ރޯދައިގެ ކުރިން އޮތް ދެ މެޗުން މަދުވެގެން 4 ޕޮއިންޓް ހޯދުން ކަމަށާއި، ނަމަވެސް އެންމެ ފުރަތަމަ މެޗުގައި މާޒިޔާއާއި ދެކޮޅަށް ކުޅެން ޖެހުމުން ޓާގެޓަށް ވާސިލްވުމަށް ޕްރެޝަރުތަކެއް ހުރިކަމަށެވެ. އެހެންނަމަވެސް ޓާގެޓަށް ވާސިލް ވެވިއްޖެނަމަ ވިކްޓްރީ ސަލާމަތް ވުމުގެ ފުރުސަތު 80 ޕަސަންޓު ހާސިލް ވީ ކަމަށެވެ.

އިތުރަށް ވާހަކަ ދައްކަމުން ސުޒޭން ބުނީ، މާޒިޔާއިން އަންނަނީ އެހެން ޓީމުތަކާ ޙިލާފަށް ފުލުފުލުގައި މެޗުތަށް ކުޅެމުން ކަމަށާއި، އެހެންކަމުން މެޗުގައި މާޒިޔާ ވަރުބަލި ވެއްޖެނަމަ އޭއީ ވިކްޓްރީއަށް ލިބޭ އެޑްވާންޓޭޖަކަށް ވެދާނެ ކަމަށެވެ. ނަމަވެސް މާޒިޔާގައި ތިބި ބިދޭސީ ކުޅުންތެރިންނާއި، ގައުމީ ޓީމަށް ނިސްބަތްވާ ކުޅުންތެރިން އެކުގައި އެ ނެރޭ ސްޓްރެންތް އެހެން ޓީމަކަށް ނެރެން އުނދަގޫ ވާނެކަމަށްވެސް ސުޒޭން ބުންޏެވެ. ސުޒޭން ބުނީ ކޮންމެ 4 ދަވަހަކުން 1 ދުވަހު މެޗު ކުޅެން ޖެހުމަކީ ދިވެހި ކުޅުންތެރިންނަށް އެހާ ފަސޭހަ ކަމެއް ނޫން ކަމަށާއި، ނަމަވެސް މާޒިޔާއިން އެގޮތަށް ކައިރިކައިރީގައި މެޗު ކުޅެން ޖެހުމުން އެހެން ޓީމުތަކަށް ކޮންމެވެސް ވަރެއްގެ އެޑަވާންޓޭޖެއް ލިބިގެންދާނެ ކަމަށެވެ.