ޔުވެންޓަސް ޗެމްޕިއަންސް ލީގުގެ ފައިނަލަށް

ނުވަދިހަ ހަ ވަނަ އަހަރުގެ ޔޫއެފާ ޗެމްޕިއަންސް ލީގަށްފަހު މިހާތަނަށް އެ މުބާރާތުގެ ތައްޓެއްގައި އަތްލެވިފައިނުވާ އިޓަލީގެ ޔޫވެންޓަސް އިން ފްރާންސްގެ މޮނާކޯ ބަލިކުރުމަށްފަހު ޗެމްޕިއަންސް ލީގުގެ ފައިނަލަށް ދަތުރުކޮށްފިއެވެ.

ޔުވެންޓަސް އިން ވަނީ 1985 ވަނަ އަހަރާއި 1996 ޗެމްޕިއަންސް ލީގުގެ ތަށި ކާމިޔާބު ކޮށްފައެވެ. އަދި އޭގެ ފަހުން ހަތަރު ފަހަރަކު ޗެމްޕިއަންސް ލީގުގެ ފައިނަލްގައި ޔުވެންޓަސް އިން ކުޅެފައިވެއެވެ.

އެގޮތުން 1997 އަހަރާއި 1998 އަހަރާއި 2003 އަދި 2015 ވަނަ އަހަރުވެސް މިމުބާރާތުގެ ފައިނަލްގައި ކުޅެފައިވެއެވެ. ނަމަވެސް އޭގެން އެއްވެސް ފަހަރެއްގައި ޗެމްޕިއަންސް ލީގު ތަށި ހިއްލާލެވޭ ވަރެއް ނުވިއެވެ.

މިފަހަރުގެ މުބާރާތުގެ ފައިނަލަށް ޔުވެންޓަސް ދަތުރުކުރީ ސެމީ ފައިނަލްގެ ދެ ލެގުވެސް ކާމިޔާބުކޮށްގެންނެވެ.

ފުރަތަމަ ރަށުން ބޭރުގައި މޮނާކޯއާ ކުޅެ 0-2 އިން މޮޅުވިއިރު އަމިއްލަ ދަނޑުގައި ކުޅުނު މެޗުވެސް ކާމިޔާބުކުރީ ހަމަ އެނަތީޖާއިންނެވެ.

އަންގާރަ ދުވަހުގެ ރޭ ޔުވެންޓަސްގެ ދަނޑުގައި ކުޅުނު މެޗުގައި އެޓީމަށް ފުރަތަމަ ހާފްގައި ލީޑް ނަގައިދިނީ 33 ވަނަ މިނެޓުގައި މާރިއޯ މަންޒުކިޗެވެ. ދެވަނަ ލަނޑު ކާމިޔާބުކޮށްދިނީ ފަހު ހާފުގައި ޑެނި އަލްވޭޒްއެވެ.

މޮނާކޯއިން ވެސް ވަނީ ފަހުހާފްގައި ލަނޑެއް ޖަހާފައެވެ. ކީލިއަން އެމްބާޕޭ 69 ވަނަ މިނެޓުގައި ޖެހި ލަނޑުން ޔުވެންޓަސް މާބޮޑު ޕްރެޝަރެއް ކުރިމަތި ކުރުވޭ ގޮތެއް ނުވިއެވެ.

އެމްބާޕޭގެ ލަނޑުން ނަތީޖާއަށް މާބޮޑު ބަދަލުތަކެއް ނަޔަސް އެއީ ފާހަގަކޮށްލެވޭ ވަރުގެ ލަނޑެކެވެ. އެއީ ޗެމްޕިއަންސް ލީގުގެ ނޮކްއައުޓް ބުރުގައި ޔުވެންޓަސް ކޮޅަށް ވަން ހަމައެކަނި ގޯލަށްވާތީއެވެ.

މި ލަނޑާއިއެކު އުމުރުން 18 އަހަރުގެ އެމްބާޕޭ ވެފައިވަނީ ޗެމްޕިއަންސް ލީގުގެ ސެމީ ފައިނަލުގައި ލަނޑު ޖެހި އެންމެ ޒުވާން ކުޅުންތެރިއާއަށެވެ.

މި ސީޒަނުގެ ޗެމްޕިއަން ލީގުގެ ތަށްޓަށް ސީދާ އަމާޒުކޮށްގެން ނުކުތް ޔުވެންޓަސް އެންމެ ފަހުން ކުޅުނު ހަތަރު ފައިނަލުގައި ބަލިވެފައިވަނީ ވަނީ ބޮރޫޝިއާ ޑޯޓްމަންޑް، ރެއާލް މެޑްރިޑް، އޭސީ މިލާން، ބާސެލޯނާ އަތުންނެވެ.

މިފަހަރުގެ ފައިނަލުގައި ޔުވެންޓަސްއަށް ކުރިމަތިލާން ޖެހޭނީ 1998 ވަނަ އަހަރުގެ ޗެމްޕިއަންސް ލީގުގެ ފައިނަލުން ބަލިވި ރެއާލް މެޑްރިޑާއި ނުވަތަ އެތުލެޓިކޯ މެޑްރިޑާ އެވެ.