ހިގުއައިންގެ ދެލަނޑާ އެކު ޔުވެންޓަސް ފައިނަލާ ގާތަށް

އާޖެންޓީނާގެ ފޯވަޑް ގޮންޒާލޯ ހިގުއައިން ކާމިޔާބުކޮށްދިން ހިތްގައިމު ދެލަނޑާއެކު ޗެމްޕިއަންސް ލީގުގެ ފައިނަލާ ގާތަށް ޔުވެންޓަސް އިން ޖެހިލައިފިއެވެ.

މޮނާކޯގެ ދަނޑުގައި ކުޅުނު މި މެޗުގެ ކުރީކޮޅު އެޓީމުގެ ޒުވާން ފޯވާޑް އެމްބާޕޭއަށް ވަނީ ލީޑު ނަގަން ރަނގަޅު ދެ ފުރުސަތެއް ލިބިގެން ގޮސްފައެވެ. ނަމަވެސް އޭނާ ފޮނުވާލި ދެ ހަމަލާ ވެސް ޔުވެންޓަސްގެ ތަޖުރިބާކާރު ގޯލްކީޕަރު އަދި ރޭގެ މެޗުގައި މޮޅު ކުޅުމެއް ދެއްކި، ޖިއާންލުއިޖީ ބުފޮން ވަނީ ދިފާއުކޮށްފައެވެ.

ގޯލްޖަހަން ލިބުނު ފުރުސަތުތަކުގެ ބޭނުން، މޮނާކޯއަށް ނުހިފުމުގެ ނަތީޖާއަކަށްވީ 29 ވަނަ މިނެޓްގައި ޔުވެންޓަސް އިން ލީޑު ނެގުމެވެ. ޑެނިއަލް އަލްވޭސް ދިން ރީތި ޕާހަކުން މި ގޯލު ކާމިޔާބުކޮށްދިނީ ހިގުއައިންއެވެ.

މި ގޯލަށްފަހު މޮނާކޯއިން ގިނަވަގުތު ބޯޅަ ހިފަހައްޓައިގެން ކުޅުނު ނަމަވެސް ޔުވެންޓަސްގެ ގޯލަށް ނުރައްކާތެރި ހަމަލާއެއް، އެޓީމަށް ވަނީ ފޮނުވާލެވޭ ގޮތް ނުވެފައެވެ.

އެއް ގޯލުގެ ލީޑަކާއެކީ ފުރަތަމަ ހާފް ޔުވެންޓަސް އިން ނިންމާލިއިރު ދެވަނަ ހާފްގެ ކުރީކޮޅު ރަޑަމެލް ފަލްކާއޯއަށް ވަނީ މޮނާކޯއަށް ނަތީޖާ އެއްވަރުކޮށްދޭން ރަނގަޅު ފުރުސަތެއް ލިބިފައެވެ. ނަމަވެސް އޭނާ ފޮނުވާލި ހަމަލާވެސް ބުފޮން ވަނީ ދިފާއުކޮށްފައެވެ.

ދެވަނަ ހާފްގައި ވެސް ގިނަވަގުތު ބޯޅަ ހިފަހައްޓައިގެން މޮނާކޯ އިން ކުޅުނު ނަމަވެސް ޔުވެންޓަސްގެ ގޯލަށް ނުރައްކާ ކުރެވޭ ގޮތް އެޓީމަށް ވަނީ ނުވެފައެވެ.

ޔުވެންޓަސްގެ ދެވަނަ ގޯލު 59 ވަނަ މިނެޓްގައި ކާމިޔާބުކޮށްދިނީ ފުރަތަމަ ގޯލުވެސް ކާމިޔާބުކޮށްދިން ހިގުއައިންނެވެ. މި ގޯލު ވެސް އޭނާ ކާމިޔާބުކުރީ އަލްވޭސް ދިން ބޯޅައަކުންނެވެ.

މި މޮޅާއެކީ ފައިނަލާއި ގާތަށް ޔުވެންޓަސް ޖެހިލާފައިވާއިރު މި ސީޒަނުގައި އެޓީމަށް ތިން ތަށި ކާމިޔާބުކުރުމުގެ ފުރުސަތު އޮތްކަން ފާހަގަކޮށްލެވެއެވެ. އެއީ ޗެމްޕިއަންސް ލީގުގެ އިތުރުން އިޓާލިއަން ލީގު އަދި އިޓާލިއަން ކަޕެވެ.

މޮނާކޯ އާއި ޔުވެންޓަސް ބައްދަލުކުރާ، ދެވަނަ ލެގުގެ މެޗު އޮންނާނީ، އަންނަ އަންގާރަ ދުވަހުގެ ރޭ ޔުވެންޓަސްގެ ދަނޑުގައެވެ.