ޔުވެންޓަސް ކޮޅަށް ގޯލު ޖެހުމަކީ އެހާ ފަސޭހަ ކަމެއް ނޫން ކަމަށް މޮނާކޯގެ ކެޕްޓަންގެ ޒިންމާ އަދާކުރަމުން އަންނަ އިތުބާރު ފޯވާޑް ރަޑަމެލް ފަލްކާއޯ ބުނެފިއެވެ.

ޗެމްޕިއަންސް ލީގުގެ ސެމީ ފައިނަލްގެ ފުރަތަމަ ލެގުގައި ޔުވެންޓަސް އާއި މޮނާކޯ ބައްދަލުކުރާއިރު މިވަގުތު ޔޫރަޕްގައި ކުޅޭ ޓީމުތަކުގެ ތެރެއިން އެންމެ ވަރުގަދަ ޑިފެންސްލައިނެއް އޮތީ ޔުވެންޓަސްގައި ކަމަށް ގިނަ ބަޔަކު ގަބޫލުކުރެއެވެ.

އެގޮތުން އެޓީމުން ވަނީ ކުއާޓާ ފައިނަލްގައި ވަރުގަދަ ފޯވާޑް ލައިނެއް އޮތް ބާސެލޯނާ އާއި ބައްދަލުކޮށް ބައިކޮޅަށް އެންމެ ގޯލެއް ވެސް ނުވައްދާ މުބާރާތުން އެޓީމު ކަޓުވާލާފައެވެ.

މި މެޗާ ގުޅޭގޮތުން ވާހަކަދައްކަމުން ފަލްކާއޯ ބުނީ ޔުވެންޓަސްއަކީ ޓީމެއްގެ ގޮތުގައި ވަރަށް ރަނގަޅަށް ޑިފެންސްކުރާ ޓީމެއް ކަމަށާއި އެހެންކަމުން އެޓީމު ކޮޅަށް ގޯލު ޖެހުމަކީ ފަސޭހަ ކަމަކަށް ނުވާނެ ކަމަށެވެ. ނަމަވެސް ފުޓްބޯޅައިގައި ކޮންމެ ކަމެއް ވެސް ވެދާނެކަން ފަލްކާއޯ ފާހަގަކުރިއެވެ.

މި ސީޒަނުގެ ޗެމްޕިއަންސް ލީގުގައި، ކުޅުނު ހަ މެޗުގައި ފަސް ގޯލު ފަލްކާއޯ ކާމިޔާބުކޮށްފައިވާއިރު، އޭނާ ހުރީ ޔުވެންޓަސްގެ ތަޖުރިބާކާރު ގޯލްކީޕަރު، ޖިއާންލުއިޖީ ބުފޮން ކޮޅަށް ވެސް މިރޭ ގޯލެއް، ކާމިޔާބުކުރުމަށް ކެތްމަދުވެފައެވެ.

ޔުވެންޓަސް އާއި މޮނާކޯ ވެސް މިވަގުތު އޮތީ ރަނގަޅު ފޯމެއްގައި ކަމަށްވާއިރު، މުބާރާތުގެ ސެމީގައި މި ދެ ޓީމު އެންމެފަހުން ބައްދަލުކޮށްފައިވަނީ 1998 ވަނަ އަހަރުގައެވެ. އެފަހަރު 4-6 ގެ ނަތީޖާއަކުން، ޔުވެންޓަސްއިން ވަނީ މޮނާކޯ ބަލިކޮށްފައެވެ.