އެމްއެންޔޫއަށް 49 އަހަރު ފުރުން ފާހަގަކޮށްފި

މޯލްޑިވްސް ނޭޝަނަލް ޔުނިވަރސިޓީ (އެމްއެންޔޫ) އަށް 49 އަހަރު ފުރުން ފާހަގަކޮށްފިއެވެ.

އެމް.އެން.ޔޫ އަށް 49 އަހަރު ފުރުމަށް ބުރާސްފަތި ދުވަހު ޚާއްސަ ހަރަކާތެއް ވަނީ ބާއްވާފައެވެ. މިގޮތުން ކުޅިވަރުގެ އެކި ހަރަކާތްތަކާއި ހިނގާލުމެއް ވެސް ވަނީ ބާއްވާފައެވެ. މި ހަރަކާތްތަކުގައި އެމް.އެން.ޔޫ ގެ 400 ވަރަކަށް ދަރިވަރުންނާއި މުވައްޒަފުން ވަނީ ބައިވެރިވެފައެވެ.

އެމް.އެން.ޔޫ އަށް މި އަހަރު ކަނޑައަޅާފައިވާ ޝިއާރަކީ "އެމްއެންޔޫ އެކުގައި ކުރިއަށް" މި ޝިޔާރެވެ. ރާއްޖެއެމްވީއަށް ދެއްވި އިންޓަވިއުއެއްގައި އެމްއެންޔޫގެ ވައިސް ޗާންސެލަރ ޑރ. މުހައްމަދު ޝަރީފް ވިދާޅުވީ މިފަދަ ހަރަކާތެއް ބޭއްވުމުގެ މަޤްސަދަކީ ކުރިއަށް އޮތް ޖުބްލީ އަހަރަށް ދަރިވަރުންނާއި މުވައްޒަފުން ބައިވެރިވެގެން ހަރަކާތްތައް ކުރިއަށް ގެންދިޔުން ކަމަށެވެ.

މީގެ އިތުރުން ޔުނިވަރސިޓީގައި ވަރަށް އެކުވެރި މާހައުލެއް ޤާއިމުކޮށް އެންމެން ގުޅިގެން މަސައްކަތް ކުރުމަށް ބާރު އަޅުއްވާ ކަމަށާއި މިއަހަރު ތެރޭގައި ޔުނިވަރސިޓީ ޕްރޮމޯޓް ކުރުމަށް ގިނަ ހަރަކާތްތަކެއް ހިންގާނެ ކަމަށް ވެސް އޭނާ ވިދާޅުވިއެވެ. އަދި މިއީ ކަމިޔާބު އިވެންޓެއްކަމަށް ދެކިވަޑައިގަންނަވާ ކަމަށް ޑރ. މުހައްމަދު ޝަރީފް ވިދާޅުވިއެވެ.

މި ހަރަކާތާއި ގުޅޭގޮތުން އެމް.އެން.ޔޫ ގެ ޑެޕިއުޓީ ވައިސް ޗާންސެލަރ ޑރ. އައިޝަތު ޝެހެނާޒް އާދަމް ވިދާޅުވީ  މިފަދަ ހަރަކާތްތައް ހިންގުމަށް މުވައްޒަފުންނާއި ދަރިވަރުންގެ އެއްބާރުލުން ވަރަށް ބޮޑަށް ލިބުނު ކަމަށެވެ. އަދި އެމް.އެން.ޔޫ އިން ގްރެޖުއޭޓްވެގެން ނިކުންނަ ދަރިވަރުންނަކީ ޤައުމު ބިނާ ކުރުމަށް އިސް ސަފުގައި ހަރަކާތްތެރިވާނެ ބަޔަކަށްވެގެންދާނެ ކަމަށް އުންމީދު ކުރައްވާ ކަމަށެވެ.

އެމް.އެން.ޔޫ އިން ވަނީ ބުރާސްފަތި ދުވަހު ހެނދުނު ކޭކު ފެޅުމުގެ ބައްދަލް ވުމެއް ވެސް ބާއްވާފައެވެ. މި ހަރަކާތުގެ ތެރެއިން އެމް.އެން.ޔޫ ވެބްސައިޓް އަޕްގްރޭޑް ކުރުމަށްފަހު ވަނީ ލޯންޗުކޮށްފައެވެ.

އެމް.އެން.ޔޫ ގައި މިހާރު ގާތްގަނޑަކަށް 5،000 ދަރިވަރުން ތައުލީމް ހާސިލް ކުރަމުންދާއިރު އަތޮޅު ތެރޭގައި އެމް.އެން.ޔޫ ގެ ހަތަރު ކެމްޕަސް ވަނީ ޤާއިމުކޮށްފައެވެ.