މަސްތުވާތަކެތީގެ މައްސަލައަކާއި ގުޅިގެން ހައްޔަރުކުރި މަޝްހޫރު ރެޕް ލަވަކިޔުންތެރިޔާ ޏ. ފުވައްމުލައް-ދިގުވާނޑު، ނައި، އިސްމާއިލް އިފްހާމް މުހައްމަދު (ޕެސްޓު) ގެ މައްޗަށް ކުރާ ދައުވާގެ އަޑުއެހުމެއް ބުދަ ދުވަހު ކްރިމިނަލް ކޯޓުގައި ކުރިއަށް ގެންގޮސްފިއެވެ.

އިސްމާއިލް އިފްހާމް މުޙައްމަދުގެ އިތުރުން، މުހައްމަދު ސުއައިދުއާއި، އަހުމަދު ޝައްމޫނުއާއި، އަހުމަދު ހުޝާމްގެ މައްޗަށް މި މައްސަލައިގައި މަސްތުވާތަކެތި ޓްރެފިކް ކުރުމާ ގުޅޭ ދައުވާތައް ވަނީ އުފުލާފައެވެ.

އެހެންނަމަވެސް މި އަޑުއެހުމަށް އަހުމަދު ހުޝާމް ހާޒިރުކުރެވިފައެއް ނުވެއެވެ.

ކްރިމިނަލް ކޯޓުގައި މި މައްސަލަ ބައްލަވަނީ ގާޒީ ހުސައިން ފާއިޒު ރަޝާދެވެ.

ބުދަ ދުވަހުގެ އަޑުއެހުމަކީ މި މައްސަލައިގެ ޝަރީއަތް ފަށައި ހެކިބަސް ނެގުމަށް ބޭއްވި އަޑުއެހުމެކެވެ. އެގޮތުން ޝަރީއަތް ފެށުމުގެ ގޮތުން ދައުލަތުންނާއި ދިފާއުން ވަނީ އެންމެ ފުރަތަމަ އިފްތިތާޙީ ބަޔާން އިއްވާފައެވެ.

އެކި ދުވަސްމަތިން ޕެސްޓުގެ އެކައުންޓުން މި މައްސަލައިގައި ހިމެނޭ ސުއައިދުގެ އެކައުންޓަށް ދެލައްކައަށްވުރެ ގިނަ ރުފިޔާ ފޮނުވާފައިވާ ކަމަށާއި، ސުއައިދުގެ އެކައުންޓުންވެސް ފައިސާ ފޮނުވާފައިވާއިރު، އެ ފައިސާ ހޯދި ގޮތް އެ ފަރާތްތަކަށް ބުނެދެވިފައިނުވާކަމަށް ދައުލަތުން އިފްތިތާޙީ ބަޔާން އިއްވަމުން ބުނެފައިވެއެވެ.

ދައުލަތުން ތުހުމަތު ކުރާ ގޮތުގައި 13 ފެބްރުއަރީ 2021 ގައި ދިވެހިރާއްޖެއަށް މަސްތުވާތަކެތި އެތެރެކުރުމަށްފަހު އެތަކެތި މއ. ވީމާގޭގައާއި، ގ.ރިހިއަވިގޭގެ އިތުރުން މައްސަލާގައި ދައުވާލިބޭ މީހުންނާ ގުޅުންހުރި ތަންތަނުގައި ބޭނުންކޮށް، ގެންގުޅެ އަދި އެތަކެތީގެ ވިޔަފާރި ވަނީ ކޮށްފައެވެ.

ޕެސްޓުގެ ފަރާތުން އިފްތިތާޙީ ބަޔާން އިއްވަމުން ބުނެފައިވަނީ މަސްތުވާތަކެތި ފެނުނުކަމަށް ބުނާ ގެތަކަކީ އޭނާއާ ގުޅުންހުރި ގެތަކެއް ނޫން ކަމަށެވެ. އަދި އޭނާއަށް ލިބިފައިވާ ފައިސާގެ ތަފްސީލުވެސް ބުނެދީފައިވާނެކަމަށް ދިފާއުން ފާހަގަ ކުރެއެވެ.

މުޙައްމަދު ސުއައިދުގެ ފަރާތުންވެސް ވަނީ އޭނާގެ މައްޗަށް ކުރާ 4 ދައުވާއަށްވެސް އިންކާރު ކޮށްފައެވެ. އޭނާގެ ފަރާތުން ވަނީ އެކަން ސާބިތު ކުރުމަށް ދިފާއީ ހެކި ހުށައަޅާފައެވެ.

އަހުމަދު ޝަމްއޫނުގެ ފަރާތުންވެސް ވަނީ އޭނާ ދައުވާއަށް އިންކާރުކުރާކަން ފާހަގަކޮށްފައެވެ. ދައުލަތުން ދައުވާ ބިނާކޮށްފައިވާ ސަބަބުތަކަށް ބަލާއިރު، މައިގަނޑު ގޮތެއްގައި ހިމެނެނީ އެހެން ފަރާތްތަކެއްގެ އަމަލުތަކެއް ކަމަށާއި، އޭނާއަށް ދައުވާ ކޮށްފައިވަނީ އެ އަމަލުތަކުގެ ތެރެއިން ކުށް ކޮށްގެން އޭނާވެސް ފައިސާ ހޯދިކަމަށް ބުނެކަން ދިފާއުން ފާހަގަ ކުރެއެވެ. އެގޮތުން އޭނާއަށް ދައުވާކޮށްފައިވަނީ އޭނާގެ އެކައުންޓުގައި ކުށް ކޮށްގެން ހޯދާފައިވާ ފައިސާ ދައުުރުކޮށްފައިވާކަމަށް ބުނެއެވެ.

ދިފާއުން ވަނީ ކުށް ކޮށްގެން ހޯދާފައިވާ ފައިސާކަން ސާބިތު ކޮށްދިނުމަކީ ދައުލަތުގެ ބުރައެއް ކަމަށާއި، އެހެންނަމަވެސް އެ ފައިސާގެ ތަފްސީލު އޭނާގެ ފަރާތުން ސާފު ކޮށްދެވޭނެ ކަމަށެވެ. ދައުލަތުން ކޮށްފައިވަނީ އަސާސެއް ނެތް ދައުވާތަކެއްކަަމަށް ޝަމްއޫނުގެ ވަކީލު ވިދާޅުވިއެވެ.

އެއަށްފަހު ދެން ކުރިއަށްދިޔައީ މި މައްސަލައިގެ ހެކިބަސް ނެގުމެވެ. މައްސަލަ ބައްލަވާ ގާޒީ ހުސައިން ފާއިޒު ރަޝާދު ވިދާޅުވި ގޮތުގައި ބުދަ ދުވަހުގެ އަޑުއެހުމަށް ހާޒިރު ކުރެވިފައިވަނީ ހަމައެކަނި ޕެސްޓާއި ދެކޮޅަށް ދައުލަތުން ހުށައަޅާފައިވާ ހެކިންތަކެކެވެ.