މައްސަލަތަކުގައި ތުހުމަތުކުރެވޭ މީހުންނަށް އަނިޔާކުރާނަމަ ފިޔަވަޅުއަޅާނަން: ފުލުހުން
24 އޯގަސްޓު 2022 | ބުދަ 16:46ކުށަށް އަރައިގަންނަ މީހުންނާއި މައްސަލަތަކުގައި ތުހުމަތުކުރެވޭ މީހުންގެ މައްސަލަތައް ތަހުގީގުކޮށް އަދަބުދެވޭނެ ގޮތްތައް ގާނޫނުތަކާއި ގަވާއިދުތަކުގައި ކަނޑައަޅާފައިވޭ
މޯލްޑިވްސް ޕޮލިސް ސަރވިސްގެ ހެޑް ކުއާޓަރ، ޝަހީދު ހުސައިން އާދަމް ބިލްޑިންގ
އިންސާފު ހޯދުމަށްކަމަށްބުނެ, ޖިނާއީ މައްސަލަތަކުގައި ތުހުމަތުކުރެވޭ މީހުންނާމެދު ދިވެހިރާއްޖޭގެ ގާނޫނުތަކާ ޚިލާފު އަނިޔާވެރި އަމަލުތައް ހިންގުމަކީ ކަންބޮޑުވާކަމެއްކަމަށާއި، އެފަދަ ކަންކަން ހިންގާ ފަރާތްތަކުގެ މައްސަލަ ތަހުގީގުކޮށް ގާނޫނީ ފިޔަވަޅު އަޅާނެކަމަށް ފުލުހުން ބުނެފިއެވެ.
ފުލުހުން މިމޭރުމުން ޓްވީޓްކޮށްފައިވަނީ ކުއްޖަކަށް ޖިންސީ ގޯނާކުރިކަމަށް ބުނެ ހިޔާ ފްލެޓްތައް ކައިރީ މީހަކު ބަހައްޓައި އޭނާއާ ދިމާއަށް އެއްޗެހި ގޮވައި، އަތްފައިން އޭނާގެ ގައިގައި ތަޅާ ވީޑިއޯއެއް ރޭ އާންމުވެފައިވަނިކޮށެވެ.
އޭނާ "ކުއްޖަކާ ބެހުނު"ކަމަށް އެއްބަސްވުމަށާއި އެކަން ހިނގި ގޮތް ކިޔައިދިނުމަށް ގޮވަމުން އެ މީހާގެ ގައިގައި ތަޅާ ވީޑިއޯ އާންމުވެފައިވާއިރު، ފުލުހުން ބުނީ ކުށަށް އަރައިގަންނަ ފަރާތްތަކާއި މައްސަލަތަކުގައި ތުހުމަތުކުރެވޭ ފަރާތްތަކުގެ މައްސަލަތައް ތަހުގީގުކޮށް އަދަބު ދެވޭނެ ގޮތްތައް ގާނޫނުތަކާއި ގަވާއިދުތަކުގައި ކަނޑައަޅާ ބަޔާންކޮށްފައިވާކަމަށެވެ.
ނަމަވެސް އިންސާފު ހޯދުމަށް ކަމަށް ބުނެ، ޖިނާއީ މައްސަލަތަކުގައި ތުހުމަތުކުރެވޭ މީހުންނާމެދު އަނިޔާވެރި އަމަލުތައް ހިންގުމަކީ ފުލުހުން ވަރަށް ކަންބޮޑުވާ އަދި މުޖުތަމައުގެ މަސްލަހަތުވެސް ގެއްލިގެންދާ ކަމެއް ކަމަށް ފުލުހުން ބުނެއެވެ.
އެކަން ތަކުރާރު ނުކުރުމަށް އިލްތިމާސްކޮށް ފުލުހުން ވަނީ، އެފަދަ ކަންކަން ހިންގާ ފަރާތްތަކުގެ މައްސަލަ ތަހުގީގުކޮށް ގާނޫނީ ފިޔަވަޅު އަޅާނެކަމަށް ބުނެފައެވެ.
ވައްކަމާއި ފޭރުމުގެ މައްސަލަތަކުގައި ހިމެނޭ މީހުންނަށް އާންމުން އަނިޔާކޮށް ވީޑިއޯކުރުމަށްފަހު ސޯޝަލް މީޑިޔާއަށް އަންނަނީ ލަމުންނެވެ.
