ހޮކޭއަށް ރަށު ޓީމަކަށް ނުކުޅެވުނު، ފުރަތަމަ މެޗު އެއްވަރު!

ގައުމީ ޓީމުގެ ކުރީގެ ޑިފެންޑަރ މުހައްމަދު ރަޝީދު (ހޮކޭ)އަށް އުފަން ރަށް އަލިފުށި ޓީމަށް ނުކުޅެވި, ފުރަތަމަ މެޗު އެއްވަރުވެއްޖެއެވެ.

ގައުމީ ޓީމާއި ކްލަބް ފުޓްބޯޅައިންވެސް މިއަހަރު ރިޓަޔަރކުރި ހޮކޭއަށް އެމްޓީސީސީ ނޯތު ލީގު ދެވަނަ ޑިވިޝަންގެ ގްރޫޕް ޑީގައި ރަށު ޓީމަށް ނުކުޅެވުނީ މިއަހަރުގެ ޕްރެޒިޑެންޓްކަޕްގައި އޭނާ ކުޅެފައިވާތީއެވެ. ޕްރެޒިޑެންޓްކަޕްގައި އޭނާ ކުޅުނީ ސުޕަރ ޔުނައިޓެޑް ސްޕޯރޓްސް (ސަސް)އަށެވެ. ހޮކޭ ކުޅުން ހުއްޓާލިކަން ރަސްމީކޮށް އިއުލާނުކުރީ އޭނާގެ އުފަން ރަށުގައި ކުޅުނު ޕްރެޒިޑެންޓްކަޕް ފައިނަލް މެޗަށްފަހުއެވެ. އެ މެޗަށްފަހު އެފްއޭއެމްގެ ރައީސް ބައްސާމް އަދީލް ޖަލީން ވަނީ، ހޮކޭ ގައުމީ ޓީމުގައި ބޭނުންކުރި 19 ނަމްބަރ ޖަރޒީވެސް އޭނާއަށް ހަދިޔާކޮށްފައެވެ. ގަވާއިދު ހަމަޖެހިފައިވާގޮތުން، ފުރަތަމަ ޑިވިޝަންގައި ކުޅެފައިވާ ކުޅުންތެރިއަކަށް އެސީޒަންގައި އޭގެ ދަށް ޑިވިޝަނެއްގައި ކުޅުމުގެ ފުރުސަތެއް ނުލިބެއެވެ.

19 ނަމްބަރު ޖަރޒީގައި އުފަން ރަށް އަލިފުށީ ޓީމުގެ ކެޕްޓަނެއްގެ ގޮތުގައި ނޯތު ލީގު ދެވަނަ ޑިވިޝަންގައި ކުޅެން ހޮކޭ ހުރީ ތައްޔާރުވެގެންނެވެ. މިއަދު އޭނާގެ ފޭސްބުކް ޕޭޖް މެދުވެރިކޮށް އެކަން އިއުލާނުވެސްކުރިއެވެ. އޭނާ ބުނެފައިވަނީ، އުފަން ރަށު ޓީމަށް ކުޅެ އޭނާގެ ބެސްޓް ދިނުމަކީ ފަޚުރެއްކަމަށާއި, އޭނާގެ ކެޕްޓަންކަމުގެ ދަށުން އަލިފު ޓީމު އުހަށް ގެންދިއުމަށް އުއްމީދުކުރާކަމަށެވެ. އަލިފުށީ ޓީމުން ވަނީ ހޮކޭއާ ކެޕްޓަން ބޭންޑްވެސް ހަވާލުކޮށްފައެވެ. ނަމަވެސް އަލިފުށީގައި ފުރަތަމަ މެޗު ކުޅުނުއިރު ޓީމް ލިސްޓްގައި ހޮކޭގެ ނަން ޖަހަން ޚާއްސަ ގޮޅި އޮތީ ހުސްކޮށެވެ.

ގްރޫޕް ޑީގެ ފުރަތަމަ މެޗުގައި ވާދަކުރީ އަލިފުއްޓާއި ދުވާފަރެވެ. މެޗު ނިމުނީ 2-2ން އެއްވަރުވެގެންނެވެ. މިގްރޫޕްގައި ދެން ވާދަކުރާނީ އުނގޫފާރެވެ.