ތައިލެންޑުގެ ބޮޑުވަޒީރު ޕްރަޔުތް ޗަނޯޗާ މަޤާމުގެ މަސްއޫލިއްޔަތުތަކުން އެކަހެރިކޮށް ސަސްޕެންޑް ކުރުމަށް އެ ޤައުމުގެ ކޮންސްޓިޓިއުޝަނަލް ކޯޓުން ނިންމައިފިއެވެ.
ކޯޓުން އެގޮތަށް ނިންމާފައިވަނީ އޭނާއާ ދެކޮޅަށް ހުށައެޅިފައިވާ ޕެޓިޝަނަކާއި ގުޅޭ މައްސަލައެއް ބެލުމަށް ނިންމާފައިވާތީއެވެ. އޭނާ ސަސްޕެންޑުކޮށްފައިވަނީ ކޯޓުގައި މި މައްސަލަ ބެއްލެވި 5 ފަނޑިޔާރުންގެ ތެރެއިން 4 ފަނޑިޔާރުންގެ އިއްތިފާޤުންނެވެ. އެގޮތުން ސަސްޕެންޝަންގެ މުއްދަތު ފެށިފައިވަނީ ބުދަ ދުވަހުން ފެށިގެންނެވެ.
ކޯޓުން މި މައްސަލައިގައި ގޮތް ނިންމިއިރު ބުނެފައިވަނީ، ޕެޓިޝަނުގައި ހުށައަޅާފައިވާ މައްސަލައަކީ ބެލޭނެ މައްސަލައެއް ކަމަށެވެ.
އެ ޕެޓިޝަން ހުށައަޅާފައިވަނީ އެ ޤައުމުގެ އިދިކޮޅު މައި ޕާޓީންނެވެ. އެގޮތުން 2014 ވަނަ އަހަރު އޭނާ އަސްކަރިއްޔާގެ ޗީފްގެ ގޮތުގައި ހުންނެވިއިރު ބަޣާވަތް ކުރެއްވި ކަމަށާއި، ބަޣާވާތުގެ މުއްދަތު އޭނާގެ ދައުރުން އުނިކުރަން ޖެހޭކަމަށް ޕެޓިޝަނުގައި ވަނީ ބަޔާންކޮށްފައެވެ.
ކޯޓުން ނިންމާ ގޮތެއްގެ ސަބަބުން އޭނާގެ މަޤާމު އަނބުރާ އިޔާދަވީކަމުގައިވީ ނަމަވެސް، މި މައްސަލައާއި ގުޅިގެން މުޅި އެ ޤައުމުގެ ސިޔާސީ މަސްރަހު ހަލަބޮލިވެފައިވާކަމަށް ބޭރުގެ ނޫސްތަކުން ވަނީ ރިޕޯޓުކޮށްފައެވެ.
