ޑޭވިސް ކަޕްގެ ކޮލިފައިންގައި ފުރަތަމަ ފަހަރަށް ބައިވެރިވެ ރާއްޖޭގެ ޤައުމީ ޓެނިސް ފިރިހެން ޓީމުން ރަނގަޅު ވާދައެއްކޮށްފިއެވެ.

މިއީ ދުނިޔޭގައި ބާއްވާ ފިރިހެން ޓެނިސްގެ އެންމެ ބޮޑު މުބާރާތެވެ. ސްރީ ލަންކާގައި ކުރިއަށް ދިޔަ ކޮލިފައިންގައި ރާއްޖޭގެ އިތުރުން ނުވަ ޤައުމަކުން ވަނީ ވާދަކޮށްފައެވެ. ކޮލިފައިންގައި ރާއްޖެ ހިމެނުނީ ޔަމަން، ބުރުނާއީ އަދި އިރާގާ އެއް ގްރޫޕެއްގައެވެ. ރާއްޖޭގެ ޓީމުގައ ހިމެނުނު ކުޅުންތެރިންނަކީ ޙުސެއިން ނާޒިފް، ޢަބްދުﷲ ފާއިހް އަދި އައިހަމް ޝިޔާމްއެވެ.

ކޮލިފައިންގައި ކުޅުނު ތިން މެޗުން ބަލިވި ނަމަވެސް، ޖުމުލަ ގޮތެއްގައި ރާއްޖެއިން ވަނީ ރަނގަޅު ކުޅުމެއް ދައްކާފައެވެ. ފުރަތަމަ މެޗުގައި ރާއްޖެ ނިކުތީ ޔަމަނާ ދެކޮޅަށެވެ. އެ މެޗުން ރާއްޖެ ބަލިވީ 2-1 އިންނެވެ. މި މެޗުގެ ފުރަތަމަ ގޭމުގައި ރާއްޖެއިން ކުޅެން ނިކުތީ އައިހަމްއެވެ. އޭނާ ސީދާ ދެ ސެޓުން ޔަމަންގެ ކުޅުންތެރިޔާގެ މައްޗަށް 6-4 އަދި 6-3 އިން ކުރި ހޯދާފައެވެ. ދެ ވަނަ ގޭމުގައި ރާއްޖޭގެ ފާއީ ވަނީ ޔަމަންގެ އެއް ވަނަ ކުޅުންތެރިޔާ އަތުން ބަލިވެފައެވެ. އެއީ 4-6 އަދި 4-6 އިންނެވެ. ފަހު ގޭމުގައި ރާއްޖޭގެ ޑަބަލްސް ޓީމު ޔަމަން ޓީމު އަތުން ވަނީ ބަލިވެފައެވެ. އެއީ 6-4 އަދި 6-2 އިންނެވެ.

ދެ ވަނަ މެޗުގައި ރާއްޖެއިން ވާދަކުރީ އީރާނާއެވެ. ފުރަތަމަ ގޭމުގައި އައިހަމް ވަނީ 6-0 އަދި 6-0 އިން ބަލިވެފައެވެ. ދެ ވަނަ ގޭމަށް ނިކުމެ ރާއްޖޭގެ ފާއީ ވަނީ ވާދަވެރި ކުޅުމެއް ދައްކާފައެވެ. އީރާނުގެ އެއް ނަންބަރު ކުޅުންތެރިޔާ އަތުން އޭނާ ވަނީ އެއް ސެޓު ހޯދާފައެވެ. ފުރަތަމަ ސެޓު ފާއީ ހޯދީ 7-5 އިންނެވެ. ނަމަވެސް އީރާން ކުޅުންތެރިޔާ ވަނީ 6-2 އިން ދެ ވަނަ ސެޓު ހޯދާފައެވެ. ނަތީޖާ ނެރުމަށް ތިން ވަނަ ސެޓެއް ކުޅެން ޖެހުނުއިރު، މި ސެޓުގައި އަނިޔާގެ ސަބަބުން ފާއީ އަށް ނުކުޅެވުނެވެ. އޭނާ އަށް ޖެހުނީ މެޗު ދޫކޮށްލާށެވެ. ފަހު ޑަބަލްސް މެޗުގައި ރާއްޖެއިން ބަލިވީ 6-0 އަދި 6-0 އިންނެވެ.

ގްރޫޕްގެ ފަހު މެޗުގައި ރާއްޖެއިން ނުކުތީ ބުރުނާއީއާ ދެކޮޅަށެވެ. މި މެޗުން ރާއްޖެ ބަލިވީ ވާދަވެރި ކުޅުމަކަށްފަހު 2-1 އިންނެވެ. ފުރަތަމަ ޓައިގައި އައިހަމް ވަނީ ބަލިވެފައެވެ. އެއީ 6-1 އަދި 6-1 އިންނެވެ. ދެ ވަނަ ޓައިއަށް ނުކުމެ ފާއީ ވަނީ މޮޅުވެފައެވެ. އެއީ ދެ ސެޓު އެއް ސެޓުންނެވެ. ފާއީ ފުރަތަމަ ސެޓު ކާމިޔާބުކުރީ 6-1 އިންނެވެ. ނަމަވެސް ބުރުނާއީގެ ކުޅުންތެރިޔާ ވަނީ ދެ ވަނަ ސެޓު ހޯދީ 6-2 އިންނެވެ. ތިން ވަނަ ސެޓު ފާއީ ކާމިޔާބުކުރީ ވެސް 6-1 އިންނެވެ. ޑަބަލްސްގައި ރާއްޖެއިން ބަލިވީ 6-0 އަދި 6-4 އިންނެވެ.