ވުލްވްސް އަތުން ޓޮޓެންހަމް މޮޅުވި މެޗުގައި ކޭންއަށް ރެކޯޑެއް

އިނގިރޭސި ޕްރިމިއަރ ލީގުގައި ވުލްވްސްއާ ދެކޮޅަށް ކުޅުނު މެޗުން ޓޮޓެންހަމް މޮޅުވެއްޖެއެވެ.

ޓޮޓެންހަމްގެ އަމިއްލަ ދަނޑުގައި ކުޅުނު އެ މެޗު އެ ޓީމުން ކާމިޔާބުކުރީ 1-0 އިންނެވެ. މެޗުގެ ހަމައެކަނި ލަނޑު 64 ވަނަ މިނެޓުގައި ޖެހީ އިންގްލެންޑުގެ ފޯވާޑް ހެރީ ކޭންއެވެ. އޭނާ އެ ލަނޑު ޖެހީ އިވާން ޕެރިސިޗް ދިން ބޯޅައަކުންނެވެ. ކޭންގެ ލަނޑާއެކު އޭނާއަށް ވަނީ ޕްރިމިއަރ ލީގުގެ ރެކޯޑެއް ލިބިފައެވެ.

ކޭން ވަނީ ޕްރިމިއަރ ލީގުގައި އެންމެ ގިނަ ލަނޑު ޖެހި ކުޅުންތެރިންގެ ލިސްޓުގެ ހަތަރު ވަނަ ހޯދާފައެވެ. އެއީ ވުލްވްސްއާ ދެކޮޅަށް ކުޅުނު މެޗުގައި ޖެހި ލަނޑާއެކު، މިހާތަނަށް ލީގުގައި 185 ލަނޑު ޖަހައިގެންނެވެ. ކޭންގެ ފަހަތުން މި ލިސްޓުގައި އޮތީ މެންޗެސްޓަރ ސިޓީގެ ކުރީގެ ފޯވާޑް ސާޖިއޯ އަގުއޭރޯއެވެ. މީގެ އިތުރުން މިހާރު ކޭން އަކީ ޕްރިމިއަރ ލީގުގައި އެއް ކުލަބަކަށް އެންމެ ގިނަ ލަނޑު ޖަހައިދިން ކުޅުންތެރިޔާއެވެ. ކުރިން އެ ރެކޯޑު އޮތީ އަގުއޭރޯ އަތުގައެވެ.

މި ލިސްޓުގެ ގަދަ ތިން ކުޅުންތެރިންގެ ތެރޭގައި ހިމެނުމުގެ ފުރުސަތު ވެސް ކޭން އަށް އެބަ އޮތެވެ. ދެ ލަނޑު ޖަހައިގެން ތިން ވަނައިގައި އޮތް އެންޑްރޫ ކޯލް އެއްވަރުކުރެވޭއިރު، ތިން ލަނޑު ޖަހައިގެން ތިން ވަނަ އަށް އެރުމުގެ ފުރުސަތު ކޭން އަށް އެބަ އޮތެވެ.

ލީގުގައި ކުޅުނު ތިން މެޗުން ލިބުނު ހަތް ޕޮއިންޓާއެކު ޓޮޓެންހަމް އޮތީ ތާވަލްގެ ދެ ވަނަ މަގާމުގައެވެ.