މިއަހަރުގެ ވޯލްޑް ކަޕަށް 2.45 މިލިއަން ޓިކެޓު ވިއްކައިފި

މިއަހަރުގެ ފަހުކޮޅު ގަތަރުގައި އޮންނަ ފީފާ ވޯލްޑް ކަޕް 2022 ބެލުމަށް ސްޓޭޑިއަމަށް ވަންނަން ބޭނުންވާ ފަރާތްތަކަށް 2.45 މިލިއަން ޓިކެޓު ވިއްކައިފިއެވެ.

ފުޓްބޯޅައިގެ މައި އިދާރާ ފީފާއިން ބުނީ، މީގެ ތެރެއިން އެންމެ ގިނަ ޓިކެޓު ވިކިފައިވަނީ ޓިކެޓް ގަތުމަށް އެންމެ ފަހުން ހުޅުވާލި ފުރުސަތުގައި ކަމަށެވެ. ޓިކެޓު ގަތުމަށް އެންމެ ފަހުން ފުރުސަތު ހުޅުވާލީ ޖުލައި 5ން 16އަށެވެ. މި މުއްދަތުގެ ތެރޭގައި ބައި މިލިއަން ޓިކެޓު ވިކިފައިވާކަމަށް ފީފާއިން ބުނެއެވެ.

މިހާތަނަށް 2.45 މިލިއަން ސްޓޭޑިއަމް ޓިކެޓު ވިކިފައިވާއިރު، އޭގެ ތެރެއިން އެންމެ ގިނައިން ޓިކެޓު ގަނެފައިވަނީ ސައުދީ އަރަބިއްޔާ، އެމެރިކާ، މެކްސިކޯ، ޔުނައިޓެޑް އަރަބް އެމިރޭޓްސް، އިންގްލެންޑް، އާޖެންޓީނާ، ވޭލްސް އަދި އޮސްޓްރޭލިއާ ކުޅޭ މެޗުތަކަށެވެ.

ގަތަރުގައި ބޭއްވުމަށް ހަމަޖެހިފައިވާ މިއަހަރުގެ ވޯލްޑް ކަޕް ފަށާނީ ނޮވެމްބަރ 20 ވަނަ ދުވަހުއެވެ. ފުރަތަމަ މެޗުގައި ބައްދަލުކުރާނީ ގަތަރާއި އެކުއެޑޯއެވެ.