ކުރީ ސަރުކާރުން އެމްބަސީތަަކަށް ކުރާ ޚަރަދަށްވުރެ މި ސަރުކާރުން ކުރާ ޚަރަދު އިިތުރު ނޫންކަމަށާއި، ސަރުކާރުން ޚާރިޖީ ގުޅުންތަކަށް ބޮޑެތި ޚަރަދުތައް ކުރާކަމަށް ބުނެ ދައްކަނީ ސައްހަ ވާހަކަތަކެއް ނޫންކަމަށް، ހެންވޭރު ދެކުނު ދާއިރާގެ އެމްޑީޕީގެ މެންބަރު ހުސައިން ޝަހީމް (އަނދުން ހުސެން) ވިދާޅުވެއްޖެއެވެ.
ބުރާސްފަތި ދުވަހުގެ މަޖިލީހުގެ ޖަލްސާގައި ވާހަކަފުޅުދައްކަވަމުން ރައްޔިތުންގެ މަޖިލީހުގެ ނައިފަރު ދާއިރާގެ މެމްބަރު އަދި ޕީޕިއެމްގެ ނައިބު ރައީސް އަހުމަދު ޝިޔާމް ވަނީ، މި ސަރުކާރުން ޚާރިޖިއްޔާއަށް ޚަރަދުކުރުމުގެ ނަމުގައި ގާތްތިމާގެ މީހުންނަށް ފައިދާވާގޮތަށް ބޮޑެތި މަގާމުތަކަށް މީހުން ލަމުން ގެންދާކަމަށް ވިދާޅުވިއެވެ. އަދި ބޭރު ގައުމުތަކުގައި އެމްބަސީތައް ގިނަ އަދަދަކަށް ހަދަމުން ދިޔަނަމަވެސް އެކަމުން ރާއްޖެއަށް ވާ ފައިދާއެއް ނެތްކަމަށް އޭނާ ވަނީ ވިދާޅުވެފައެވެ.
މަޖިލީހުގައި ވާހަކަދައްކަވަމުން މެމްބަރު ޝަހީމް ވަނީ، އެ ވާހަކަތަކަށް ރައްދުދެއްވާފައެވެ. އެގޮތުން މި ސަރުކާރުން ޚަރަދުކުރަމުންދާ އެމްބަސީތަކަކީ ރައީސް ޔާމީންގެ ސަރުކާރުގައި ހުރި އެމްބަސީތައް ކަމަށާއި، އިތުރު އެމްބަސީއަކަށް ސަރުކާރުން ޚަރަދުކުރަމުން ނުދާކަމަށް އޭނާ ވިދާޅުވިއެވެ. އަދި މުސާރައިގެ ގޮތުގައި ޚާރިޖީ މަގާމެއްގައި ހުރި އެއްވެސް ބޭފުޅަކަށް ކުރީ ސަރުކާރުން ޚަރަދުކުރި ވަރަށްވުރެ އިތުރަށް ޚަރަދުކޮށްފައި ނުވާކަމަށް އޭނާ ވިދާޅުވިއެވެ.
ޝަހީމް މިފަދައިން ވިދާޅުވެފައި މި ވަނީ ސަރުކާރުގެ އިސް މަޤާމުތަކުގައި ތިބި ފަރާތްތަކުގެ އާއިލީ ބޭފުޅުންނަށް ދިނުމަށް ޚާރިޖީ މަޤާމުތައް ކަމަށް ބުނެ ބައެއް މަޤާމުތައް އުފައްދަމުންދާކަމަށް އިދިކޮޅު ފަރާތްތަކުން ތުހުމަތުކުރަމުންދާ ދަނޑިވަޅެއްގައެވެ. އިދިކޮޅު ފަރާތްތަކުން ވަނީ ޚާރިޖީ ގުޅުންތަކަށް މި ސަރުކާރުން ކުރަނީ ބޭކާރު ޚަރަދުތަައް ކަމަށް ވެސް ސިފަކުރައްވާފައެވެ.
