މަސްވެރިންނާއި ރައްޔިތުން ފެލައިގެން ރައީސުލްޖުމްހޫރިއްޔާ ޑރ.މުހައްމަދު މުއިއްޒުގެ ލެގަސީ ހިފަހައްޓަން ޕްރޮޖެކްޓްތައް ހިންގުމަކީ ޤަބޫލުކުރެވޭ ކަމެއް ނޫން ކަމަށް ހެންވޭރު ދެކުނު ދާއިރާގެ ކުރީގެ މެމްބަރު ހުސައިން ޝަހީމް (އަނދުން ހުސައިން) ވިދާޅުވެއްޖެއެވެ.
އެމްޑީޕީ ހަރުގެ ޖަލްސާގައި ވާހަކަދައްކަވަމުން އޭނާ ވަނީ މި ސަރުކާރަށް ވަރަށް ބޮޑަށް ފާޑު ވިދާޅުވެފައެވެ.
މި ސަރުކާރާއި ވެރިކަން ކުރީ މި ހާލަށް ރައްޔިތުން ވައްޓާލަން ނޫން ކަމަށް އޭނާ ވިދާޅުވިއެވެ. އެގޮތުން މި ސަރުކާރަށް ވެރިކަން ދިނުމުން ރައްޔިތުންނަށް ދިން މެސެޖަކީ ހިތި ބޭސް ބޯން ޖެހިދާނެކަމުގެ މެސެޖުކަމަށް އޭނާ ވިދާޅުވިއެވެ. ދިވެހިރައްޔިތުން މި ސަރުކާރާއި ވެރިކަން ހަވާލުކުރީ މި ތަން ދެކެން ނޫން ކަމަށް އޭނާ ވަނީ ވިދާޅުވެފައެވެ. މިހާރުގެ އިގްތިޞާދީ ހާލަތާއި ގުޅޭގޮތުން ވެސް އަނދުން ހުސައިން ވަނީ ވާހަކަދައްކަވާފައެވެ. ފަތުރުވެރިކަން މިހާރު ކުރިއަށް ވުރެ ހީނަރުވެފައިވާ ކަމަށް ފާހަގަކުރައްވާ އޭނާ ވަނީ އެކަމާއި މެދު ކަންބޮޑުވުން ފާޅުކުރައްވާފައެވެ. މީގެ އިތުރުން މިހާރުވެސް ރާއްޖޭގައި ފައިސާ ނެތީ ނޫން ކަމަށާއި ސަރުކާރުން ބޭކާރު ޚަރަދު ކުރަނީ ކަމަށް އޭނާ ވިދާޅުވިއެވެ. އެކަމަކީ އިގްތިޞާދު މެނޭޖްކުރުމަށް ދިމާވާ ގޮންޖެހުމެއް ކަމަށް އޭނާ ވަނީ ވިދާޅުވެފައެވެ. އަދި މި ސަރުކާރުން ވަނީ މަސްވެރިންގެ ކަރަށް ވެސް ފައިން އަރާ، ގޮހޮރުގައި ގޮށް ޖަހާފައި ކަމަށް އޭނާ ވަނީ ސިފަކުރައްވާފައެވެ.
5 އަހަރަށް ވުރެ ކުރު މުއްދަތެއްގައި އިންތިހާއަށް ބޮޑު ލެގަސީ ޕްރޮޖެކްޓްތަކެއް ހިންގަން ރައްޔިތުން ފެލަން ޖެހޭ ކަމަކަށް އަޅުގަނޑު ޤަބޫލެއް ނުކުރަން. ހަގީގަތުގައި މި އުޅެނީ ލާރި ނެތިގެނެއް ނޫން. ލާރި އިންސާފުކުރުން އިންތިހާ. އޭގެ ބޭރުން ރައީސް މުއިއްޒުގެ ޝާނާއި ޝައުގަތު، އޭނާގެ ބިނާތައް މިތާ ބެހެއްޓުމަށްޓަކާ ހިންގަން ޖެހޭ ޕްރޮޖެކްޓްތަކެއް ހިންގުމަށް 5 އަަހަރުގެ ކުރު މުއްދަތެއްގެ ތެރޭގައި ރައްޔިތުން ފެލައިގެން ލާރި ޚަރަދުކުރުމުގެ ވިސްނުމެއް މި ގެންގުޅެނީ.ހެންވޭރު ދެކުނު ދާއިރާގެ ކުރީގެ މެމްބަރު ހުސައިން ޝަހީމް (އަނދުން ހުސައިން)
އެ ޖަލްސާގައި ވާހަކަދައްކަވަމުން ޝަހީމް ވަނީ މަޖިލީހުގެ މެމްބަރުންނަށް ވެސް ފާޑު ވިދާޅުވެފައެވެ. އެގޮތުން މާމިގިލީ ދާއިރާގެ މެމްބަރު ޤާސިމް އިބްރާހިމް މެމްބަރުންނަށް ލިބޭ މުސާރަ އާއި އިނާތްތައް މަދުކަމަށް ފާހަގަކުރައްވާފައިވާތީ އެކަމަށް އޭނާ ވަނީ ރައްދު ދެއްވާފައެވެ. ރާއްޖޭގެ ރައްޔިތުންގެ މަޖިލީހުގެ މެމްބަރަކަށް 70000 ރުފިޔާ މުސާރައިގެ ގޮތުގައި ލިބޭ އިރު، ޤާސިމް އަކީ ޤައުމުގެ އެންމެ މުއްސަނދި އެކަކު ކަމަށް އޭނާ ވިދާޅުވިއެވެ. ދުނިޔޭގައި ފާހަގަކޮށްލެވޭ މުއްސަނދިންނަކީ އެހެން އާއްމުންނަށް ލިބޭ އިނާޔަތްތައް ލިބޭ ބައެއް ނޫން ކަމަށް އަނދުން ހުސައިން ވިދާޅުވިއެވެ. އެހެންކަމުން ރާއްޖޭގައި އެކަން ތަފާތު ވާން ޖެހޭ ސަބަބާއި މެދު އޭނާ ވަނީ ސުވާލު އުފައްދަވާފައެވެ. އަދި ރައްޔިތުންގެ ހައްގުގައި ވަކާލާތުކުރަން ތިބި ބަޔަކު ރައްޔިތުން ހަނާވާއިރު ރައްޔިތުންނަށް ވުރެ މަތީގައި ތިބެވިގެން ނުވާނެ ކަމަށް އޭނާ ވިދާޅުވިއެވެ.
މީގެ އިތުރުން ރާއްޖޭގައި އޮތް ސަޤާފަތް ބަދަލުކުރަން ޖެހޭ ކަމަށާއި ސިޔާސީ މަޤާމުތަކަށް މީހުން އައްޔަންކުރަން ވާނީ ސިވިލް ސަރވިސްގައި މީހުން ތިބި މިންވަރަށް ބެލުމަށް ފަހު އިންސައްތަ އެއް ކަނޑައަޅައިގެން ކަމަށް އޭނާ ވިދާޅުވިއެވެ. ރާއްޖޭގައި ފައިސާ އެބަ ހުރި ކަމަށާއި އުޅެނީ ފިތުނަ އުފައްދަން ކަމަށް އޭނާ ވަނީ ވިދާޅުވެފައެވެ. އަދި އެ ބަހަނާ ދައްކައިގެން ރައްޔިތުންނަށް ދޭ ޚިދުމަތްތައް މެދުކަނޑާލާ، ޓެކްސްތައް އިތުރުކޮށްގެން ނުވާނެ ކަމަށް އޭނާ ވިދާޅުވިއެވެ.
