މާލީ ކަންކަން ބެލެހެއްޓުމުގައި ސަރުކާރުގެ ތެރޭގައި އިންޓަރނަލް އޮޑިޓް ޔުނިޓެއް ނުވަތަ އިންޓަރނަލް އޮޑިޓެއް ކުރެވޭނެ އިތުރު ހަރުދަނާ ކަމެއް ގެނައުމަށް ދައުލަތުގެ މާލިއްޔަތުގެ ގާނޫނަށް އިސްލާހުގެނައުމުގެ ބިލުގައި ބަޔާންކޮށްފައި އޮތުމަކީ، އެކަމަށް ހިތްވަރުދެއްވާކަމެއްކަމަށް ހެންވޭރު ދެކުނު ދާއިރާގެ މެންބަރު ހުސައިން ޝަހީމް ވިދާޅުވެއްޖެއެވެ.
މެންބަރު ހުސައިން ޝަހީމް މިހެން ވިދާޅުވީ ސަރުކާރުގެ ފަރާތުން، ފުވައްމުލަކު ދެކުނު ދާއިރާގެ މެންބަރު މުހައްމަދު މުމްތާޒް ހުށަހަޅުއްވާފައިވާ، ގާނޫނު ނަންބަރު 3/2006 (ދައުލަތުގެ މާލިއްޔަތުގެ ގާނޫނު)އަށް އިސްލާހުގެނައުމުގެ ބިލުގެ އިބްތިދާއީ ބަހުސްގައި ވާހަކަދައްކަވަމުންނެވެ.
މެންބަރު ޝަހީމް ވިދާޅުވީ، މާލިއްޔަތު ގާނޫނުގެ ދަށުން މާލީ އެކި ކަންކަން ހިންގެވުމުގައި ހުރި ދަތިތައް ހައްލުކުރުމަށް އަދި ވަކިން ޚާއްސަކޮށް ކޮވިޑަށްފަހު ދުނިޔެއަށް އައި މާލީ ދަތިކަމުގެ ބޮޑުކަމާއި އަދި މާލިއްޔަތަށް ފައިސާ ހޯދުމުގައި ހުރި ދަތިކަންތައްތައް ރާއްޖޭގެ ރައޔިތުންނަށާއި މުޅި ދުނިޔެއަށް އެނގޭ ކަމަށެވެ. އަދި ރައީސް މުހައްމަދު ނަޝީދަށް މާބޮޑަށް ވެސް އެނގިވަޑައިގަންނަވާނެ ކަމަށާއި، ސްރީލަންކާއަށް ފައިސާ ހޯދައި ދެއްވުމަށް ރައީސް ކުރައްވާ މަސައްކަތުގައި ކުރިއެރުން ލިބޭ މިންވަރާއި، ކުރިއެރުން ނުލިބޭ މިންވަރު އެނގިވަޑައިގަންނަވާނެ ކަމަށެވެ.
މިފަދަ ހާލަތެއްގަ ދުނިޔެ އޮތްއިރު، ދިވެހިރާއްޖޭގެ މާލިއްޔަތު ގާނޫނުގައި ލިޔެފަ ހުރި ބައެއް ކަންތައްތައް ތަންފީޒުކުރުމުގަ ހުރި ދަތިތަކާ އަދި އެފަދަ ފަންޑެއްގަ މާލީ ކަންކަން ބެލެހެއްޓުމުގައި ސަރުކާރުގެ ތެރޭގައި އިންޓަރނަލް އޮޑިޓް ޔުނިޓެއް ނުވަތަ އިންޓަރނަލް އޮޑިޓެއް ކުރެވޭނެ އިތުރު ހަރުދަނާ ކަމެއް ގެނައުމަށް ބިލުގަ ބަޔާންކޮށްފައި އޮތުމަކީ އަޅުގަނޑު އެކަމަށް ހިތްވަރުދޭ ކަމެއް. ޕީޕީއެމުން ވިދާޅުވާފަދައިން، ނިމިދިޔަ ސަރުކާރުން އޮތީ މާލީ ކަންކަމުގެ ތެރޭގައި ރާއްޖެއިން ބޭރުން ރާއްޖޭގެ ވިޔަފާރިވެރިންނަށް ސޮވެރިން ގެރެންޓީ ދީގެން ލޯނު ނެގުމުގެ ކަންކަން ކުރިއަށް ގެންގޮއްސަ.ހެންވޭރު ދެކުނު ދާއިރާގެ މެންބަރު ހުސައިން ޝަހީމް
މެންބަރު ޝަހީމް ވިދާޅުވީ، ޕީޕީއެމްގެ ސަރުކާރުގައި އޮތީ ރައްޔިތުންގެ މަޖިލީހުން ފާސްކޮށްގެން ލޯނު ނެގުމުގެ ކަންކަން އަނބުރާ ރައީސުލްޖުމްހޫރިއްޔާގެ އަތްޕުޅަށާއި ސަރުކާރަށާއި ފިނޭންސް މިނިސްޓްރީއަށް ގެންގޮސްފައިކަމަށެވެ. އެކަން އެގޮތަށް ގެންގޮސްފައި އެގޮތަށް ކަންކަން ކުރައްވާފައި މާވަށު ދާއިރާގެ މެންބަރު މުހައްމަދު ސައީދު ވާހަކަފުޅު ދެއްކެވީމާ ރައްޔިތުންނަށް އޮޅުންތަކެއް އަރާކަމަށެވެ.
މެންބަރު ޝަހީމް ވިދާޅުވީ ރާއްޖޭގައި ތަކެތީގެ އަގު އުފުލިއްޖެކަމަށް ގަބޫލުކުރައްވާ ކަމަށެވެ. އަދި ތަކެތީގެ އަގު އުފުލޭ ސަބަބަކީ، ކޮވިޑާގުޅިގެން ދުނިޔޭގެ ގިނަ ގައުމުތަކެއްގެ ބޯޑަރު އަދިވެސް ބަންދުވެފައި އޮތުމާއި، ޗައިނާއަށް ދަތުރުފަތުރު ކުރުން އަދިވެސް ހުޅުވާނުލުންކަމަށެވެ. މީގެ އިތުރުން ޗައިނާގެ ފަތުރުވެރިންނަށް އެގައުމުން ބޭރަށް ފުރުމުގެ ހުއްދައެއް އަދި ދީފައި ނެތްކަމަށްވެސް މެންބަރު ޝަހީމް ވިދާޅުވިއެވެ.
ގިނަ ފެކްޓްރީތައް ހުރީ ބަންދުކުރެވިފަ. އެހެންކަމުން ފެކްޓްރީގަ އުފައްދާ ތަކެތީގެ ނިސްބަތް ދަށްވުމުން ތަކެތީގެ އަގު އުފުލެމުން އައިސްފައިވާ ދަނޑިވަޅެއްގަ، ޔޫކްރެއިނާ ރަޝިޔާ ކުރާ ހަނގުރާމައިގަ އެއްގައުމު އަނެއް ގައުމަށް ދަތިކުރުމުގެ ފިޔަވަޅު އެޅުމުގެ ގޮތުން ތަކެތި ހިފެހެއްޓުމާ، ނުވިއްކުމާ، އަދި ހަނގުރާމައިގަ ހަމަލާ އަމާޒުކުރެވޭ ތަންތަނުގެ ތެރޭގަ ކާބޯތަކެތި ރައްކާކުރެވިފަ ހުންނަ ބޮޑެތި ގުދަންތަކާ ހާބަރުތައް ހިމެނިގެން ގޮސްފަ ވާ ކަމީ ރާއްޖޭގަ ތަކެތީގެ އަގު އުފުލެންޖެހޭ ސަބަބެއް.ހެންވޭރު ދެކުނު ދާއިރާގެ މެންބަރު ހުސައިން ޝަހީމް
މެންބަރު ޝަހީމް ވިދާޅުވީ، ރާއްޖޭގެ ބާޒާރުގައި ތަކެތީގެ އަގު ނުއުފުލޭކަމަށް ވިދާޅުނުވާނެކަމަށެވެ. ނަމަވެސް އަގު އުފުލެނީ މިދެންނެވި ސަބަބުތަކާހުރެ ކަމަށާއި، ދިވެހި ސަރުކާރަށާއި ރައީސުލްޖުމްހޫރިއްޔާއަށް އަދި މި މަޖިލީހަށް، ތަކެތީގެ އަގު ހިފެހެއްޓުމުގެ ނުވަތަ ކޮންޓްރޯލްކުރުމުގެ ހުރިހާ މަސައްކަތެއް ކުރަމުން އަންނަ ކަމަށެވެ. ނަމަވެސް މިހާރު ފެންނަމުން މިދަނީ ދުނިޔޭގެ ކަންކަން ހިނގަމުންދާގޮތުގެ ސަބަބުން ތަކެތީގެ އަގު އުފުލެމުންދާތަން ކަމަށް މެންބަރު ވިދާޅުވިއެވެ.
