އެމްޑީޕީން އެއާ ދެކޮޅަށް ވޯޓު ދީގެން އެ ބޭރުކުރަން މަސައްކަތް ކުރުމަކީ ކަންބޮޑުވާ ކަމެއް
މެންބަރު ހަސަން ލަތީފް - އެމްޑީޕީ ޕީޖީން ވިޕްލައިނެއް ނެރުނުކަން ހާމަކުރެއްވީ މެންބަރު
ހުޅުމާލެއިން ގެއްލިގެން ހޯދަމުން ދިޔަ ޒުވާނާ މުހައްމަދު އަޒްހާނުގެ މަރުގެ މައްސަލައިގައި، އިދިކޮޅު ޕީއެންސީގެ މަޑުއްވަރީ ދާއިރާގެ މެންބަރު އާދަމް ޝަރީފް އުމަރު ހުށަހެޅުއްވި މައްސަލަ އާ ދެކޮޅަށް ވޯޓުދިނުމަށް އެމްޑީޕީ ޕާލަމެންޓްރީ ގްރޫޕުގެ ވިޕްލައިނެއް ނެރެފައިވާކަމަށް ހެންވޭރު ހުޅަނގު ދާއިރާގެ މެންބަރު ހަސަން ލަތީފް ވިދާޅުވެއްޖެއެވެ.
މެންބަރު އާދަމް ޝަރީފް ހުށަހެޅުއްވި މައްސަލައަށް ބަހުސްކުރައްވަމުން ހަސަން ލަތީފް ވިދާޅުވީ މަރުގެ މައްސަލަތަކަކީ އެންމެ ސީރިއަސް މައްސަލަތައް ކަމަށެވެ. އަދި އަޒްހާންގެ މަރުގެ މައްސަލައިގައި ހުށަހަޅާފައިވާ ކުއްލި މައްސަލަ ބަލައި ނުގަންނަން ވިޕްލައިނެއް ނެރެން އެންގީމާ އެކަމާއި ކަންބޮޑުވެވަޑައިގެން، ލަދުގަންނަ ކަމަށެވެ.
މެންބަރު ހަސަން ލަތީފް ވިދާލުވީ އުމުރުން 27 އަހަރުގެ ޒުވާނެއް ގެއްލިގެން 14 ދުވަސް ވީއިރު، ފުލުހުން އޭނާ ހޯދަމުން ދިޔަކަމަށް ބުނި އިރު، އެކަށީގެންވާގޮތަކަށް އެކަން ކުރިކަމަކަށް ގަބޫލެއް ނުކުރައްވާ ކަމަށެވެ. އެއީ އޭނާ ފެނިފައި އޮތް ތަނުގެ ގޮތުން ކަމަށާއި، އެކަން ފުލުހުން އެދެވޭގޮތަށް ކުރިނަމަ އެއަށްވުރެ ކުރިން ފެންނާނެ ކަމަށެވެ. މިކަމާއި، ގުޅޭގޮތުން މަޖިލީހުން ކުރެވެން ހުރި ކަންތައްތަކަކީ ކޮބައިތޯ ބައްލަވަން ބޭނުންވެވަޑައިގަންނަވާ ކަމަށާއި، މިކަމާއި ގުޅޭގޮތުން ސަލާމަތީ ހިދުމަތްތަކާއި ކޮމިޓީން ކުރެވެން ހުރި ކަންކަން ކުރުން މުހިންމު ކަމަށް މެންބަރު ވިދާޅުވިއެވެ.
އެމްޑީޕީ ޕީޖީން މި މައްސަލަ ބަލައި ނުގަތުމަށް ނިންމި ސަބަބު ހާމަކުރައްވަމުން ހެންވޭރު ދެކުނު ދާއިރާގެ އެމްޑީޕީ މެންބަރު ހުސައިން ޝަހީމް ވިދާޅުވީ މި މައްސަލަ ލިޔެފައި އޮތްގޮތުން ވިޕްލައިން ނެރުނު ކަމަށެވެ. އަދި މި މައްސަލައަކީ ތަހުގީގު ނިންމާ މައްސަލަ އިތުރަށް ނުބަލަން އަދި ތަހުގީގު އިތުރަށް ކުރިއަށް ނުގެންދެވޭނެ ކަމަށް އަމަލުކޮށްފައިވާ މައްސަލައަކަށް ނުވާތީ ކަމަށެވެ.
މެންބަރު ޝަހީމް ވިދާޅުވީ ހުޅުމާލެއަކީ މާ ކުޑަ ރަށެއް ނޫން ކަމަށާއި، އެތަނުގައި ކުއްޖަކު ގެއްލިގެން، ފުލުހުންގެ ވަސީލަތް ހުންނަ ގޮތުންނާއި، ފުލުހުންގެ އަދަދު ހުންނަ ގޮތުން މި މަސައްކަތް ކުރުމުގައި ފުލުހުންނަށް ދަތިތަކެއް ހުންނާނެ ކަމަށެވެ. ނަމަވެސް ފުލުހުން އޭނާގެ ހަށިގަނޑު ހޯދާފައިވާ ކަމަށާއި، ފުލުހުންނަށް އޭނާ ފެނުނީ އާންމު ފަރާތަކުން އަންގައިގެން ނޫން ކަމަށް މެންބަރު ޝަހީމު ވިދާޅުވިއެވެ.
މި ދައުރުގެ ތެރެގައި މީހުން ގެއްލުމާއި މަރާލާ ވާހަކައާއި ފޭރޭކަމަށް މެންބަރު ޝަރީފް ވިދާޅުވި ވާހަކައަށް ރައްދު ދެއްވަމުން މެންބަރު ޝަހީމް ވިދާޅުވީ ކުރީ ސަރުކާރުން ދައުލަތުގެ ފައިސާ ހޭދަކުރީ ގޭންގުތައް ހިންގުމަށް ކަމަށާއި، ނައިބް ރައީސް އަހުމަދު އަދީބު ޖަލަށްލުމާއި ގުޅިގެން، އެމީހުންނަށް ފައިސާ ނުދެވިގެން ގޭންގުތަކުގެ ކުދިން މައްސަލަ ޖައްސަން ފެށުމުން، އަދީބު ދެއްވަނީ ތިމަންނާގެ ފައިސާކަމަށް ރައީސް ޔާމީން ޓީވީއަށް އަރާވަޑައިގެން ވިދާޅުވި ކަމަށެވެ.
މެންބަރު ޝަހީމް ވިދާޅުވީ އަޒްހާންގެ މަރުގެ މައްސަލައަކީ ކަންބޮޑުވާ މައްސަލައެއް ކަމަށެވެ. ދިވެހި ކޮންމެ ރައްޔިތެއްގެ ފުރާނަ ގެއްލިގެން ދިއުމަކީ ކަންބޮޑުވާނެ ކަމެއް ކަމަށާއި، އެހެންނަމަވެސް ފުލުހުން މިކަން ނުބަލަން އުޅޭކަމެއް ގަބޫލެއް ނުކުރައްވާ ކަމަށެވެ.
ފުލުހުންގެ ބަޔާނުގައި އެ ހަށިގަނޑު ޕޯސްޓްމޯޓަމް ހަދަން ބޭރަށް ފޮނުވަން މަސައްކަތްކުރަމުންދާ ކަމަށް ބުނެފައިވާ ކަމަށާއި، މިއީ އިތުރަށް ތަހުގީގުކުރިއަށްދާ މައްސަލައެއް ކަމަށް ވެސް މެންބަރު ޝަހީމު ވިދާޅުވިއެވެ.
