ކުރީގެ ރައީސް އަދި ރައްޔިތުންގެ މަޖިލީހުގެ ރައީސް މުޙައްމަދު ނަޝީދަކީ ރައްޔިތުންނަށް ޚިދުމަތްކުރައްވަން އުއްޅުއްވާ ބޭފުޅެއްކަމަށް ގަބޫލުފުޅުނުކުރައްވާ ކަމަށް ހެންވޭރު ދެކުނު ދާއިރާގެ މެންބަރު ހުސައިން ޝަހީމް (އަނދުން ހުސައިން) ވިދާޅުވެއްޖެއެވެ.
"ރާއްޖެޓީވީ" ގެ ސިޔާސީ ވެށި ޕްރޮގްރާމުގައި ވާހަކަފުޅު ދައްކަވަމުން މެންބަރު ހުސައިން ޝަހީމް ވިދާޅުވީ އާއިލީ ދެ ބޭފުޅަކު މަޖިލީހުގެ ރައީސް އާއި ނާއިބު ރައީސްގެ ގޮތުގައި ތިއްބެވުމުގެ ސަބަބުން ޖަޒުބާތުގެ މައްސަލައެއް އުޅޭ ކަމަށް ގަބޫލުފުޅުކުރައްވާ ކަމަށެވެ. އަދި އެ ދެބޭފުޅުންގެ އިތުބާރު ނެތް ކަމުގެ މައްސަލަ މަޖިލީހަށް ހުށަހަޅާފައިވާއިރު އޭގެ ތެރެއިން އެއްމައްސަލަ މަޖިލީހުގެ ތަޅުމަށް ނުގެނެސް ބޭއްވުމަކީ މަޖިލީހުގެ ގަވާއިދު ތަންދޭ ކަމެއް ނޫން ކަމަށާއި މަޖިލީހުގެ ގަވާއިދާ ޚިލާފުވުމަކީ ޤާނޫނާ ޚިލާފުވުން ކަމަށް އޭނާ ވިދާޅުވިއެވެ.
މަޖިލީހުގެ ރައީސަށް ޤާނޫނުން ލާޒިމްކޮށްފައިވާ ކަންކަން ހުރިކަން ފާހަގަކުރައްވައި މެންބަރު ހުސައިން ޝަހީމް ވިދާޅުވީ އެކަންކަން ނުކޮށް، ސިޔާސީ ޕާޓީ އުފައްދަވައިގެން ރަށްރަށަށް ވަޑައިގެން ކެމްޕޭން ކުރެއްވުމަކީ ކޮށްގެންވާނެކަމެއް ކަމަށް ގަބޫލުފުޅު ނުކުރައްވާ ކަމަށެވެ. އަދި ރައްޔިތުންގެ މަޖިލީހުގެ ރައީސާއި ނާއިބުރައީސަކީ މެންބަރުންގެ އިތުބާރާއެކު ރިޔާސަތަށް ވަޑައިގަންނަވާ ބޭފުޅުންކަމަށާއި މަޖިލީހުގެ ބޮޑު އަގުލަބިއްޔަތެއްގެ ސޮޔާއެކު އިތުބާރު ނެތްކަމުގެ މައްސަލަ ހުށަހެޅުމުން އެއަށް ތަބާވާން ޖެހޭ ކަމަށް ވެސް ވިދާޅުވިއެވެ.
އޭނާ ވިދާޅުވީ އެމްޑީޕީ އާއި ނަޝީދާ ދެމެދު ޖެހުނު އެންމެ ބޮޑު މައްސަލައަކީ ވެރިކަން ކުރުމުގެ ނިޒާމު ބަރުލަމާނީ ނިޒާމަށް ބަދަލު ކުރުމަށް ލީޑަރޝިޕްގެ މެޖޯރިޓީ ގަބޫލުނުކުރުން ކަމަށެވެ. މިހާރުގެ ހާލަތު އޮތްގޮތުން އެމަނިކުފާނަށް ބޮޑުވަޒީރުކަން ދީފިނަމަ ޤައުމަށް ބޭނުންވާ ކަންކަން ނުކުރެވި ހުންނާނެ ކަން ވެސް އޭނާ ތުހުމަތުކުރެއްވިއެވެ.
ރައީސް ނަޝީދުގެ ވެރިކަމުގައި 2008ގައި ވެސް ވިދާޅުވި ޗާޓުން ބޭރުން ކުޅުއްވާނެ ވާހަކައާއި ޗާޓުން ބޭރުން އުޅުއްވާނެ ވާހަކަ، އޭގެ ހަގީގީ މާނައަކީ އަސްލު ޤާނޫނުން ބޭރުން ކަންކަން ކުރައްވާނެ، ޤާނޫނުން ބޭރުގަ އުޅުއްވާނެ ވާހަކަ. އެނާކިސްޓެކޭ ބައެއް ބޭފުޅުން ވިދާޅުވޭ. އެއީ އެއްގޮތަކަށްވެސް ޤާނޫނަށް ބޯނުލެނބުމަށް އަމިއްލައަށް ޤަބޫލުކުރާ މީހުން. އެއީ ޤާނޫނު ކަމަށް ހައްދަވަން އުޅުއްވާތަން އަޅުގަނޑުމެންނަށް ވެސް މި ފެންނަނީ. އެހެންމަ އަޅުގަނޑަކަށް ގަބޫލެއް ނުކުރެވޭ އެއްވެސް ހާލެއްގައި ރައްޔިތުންނަށް ޚިދުމަތް ކުރަން އުޅުއްވާ ބޭފުޅެއް ކަމަށް،ހުސައިން ޝަހީމް / ރައްޔިތުންގެ މަޖިލީހުގެ ހެންވޭރު ދެކުނު ދާއިރާގެ މެންބަރު
ނަޝީދަކީ އަމިއްލަ ފައިދާއަށް އުޅުއްވާ ބޭފުޅެއް ނޫންނަމަ މަޖިލީހުގެ ބޮޑު އިންސައްތައެއް އެމަނިކުފާނުގެ އިތުބާރު ނެތް ކަމަށް ހުށަހެޅުމުން އެ ނިންމުމަށް ތަބާވާނެ ކަމަށް މެންބަރު ހުސައިން ވިދާޅުވިއެވެ. ނަމަވެސް އެމަނިކުފާނު މަސައްކަތް ކުރައްވަނީ ރައްޔިތުންނަށް ގޮންޖައްސަވައި، ރައްޔިތުންގެ ވޯޓު ހޯއްދަވަންކަމަށާއި އެގޮތަށް އުޅުއްވުމުގެ ބޭނުމެއް ނެތް ކަމަށް ވިދާޅުވިއެވެ.
މީގެ އިތުރުން ނަޝީދުގެ އިތުބާރު ނެތް ކަމުގެ މައްސަލަ ހުށަހެޅުމަށް ނިންމީ ތަކުރާރުކޮށް ރައްޔިތުންނަށް ގެއްލުންވާ ކަންކަމާއި ރައްޔިތުންނަށް ނިކަމެތިކަން ލިބޭ އެތައް ކަމެއް މަޖިލީހުގެ ރައީސްގެ ހައިސިއްޔަތުން ލިބިވަޑައިގަންނަވާ އިމްތިޔާޒާއި ބާރުގެ ތެރެއިން ކުރައްވަމުން ގެންދަވާކަން ފާހަގަވާތީ ކަމަށް ވެސް މެންބަރު ހުސައިން ޝަހީމް ވިދާޅުވިއެވެ.
