ރައީސް މުއިއްޒު، ރައީސް ޔާމީނުގެ ކެބިނެޓުގައި އިންނަވައިގެން ގެނައި ސިފައިންގެ ބަޔަކު ހޯދަންޖެހުމުން އެ އުޅުއްވަނީ ނުފެނިގެން - ޝަހީމް
މޯދީއާއެކު ވެވެޑައިގެންނެވި އެއްބަސްވުން ހާމަކުރުމަށް ވަނީ ގޮވާލާފައި
ރައީސް ޑރ. މުއިއްޒު، ރައީސް ޔާމީންގެ ވެރިކަމުގައި ކެބިނެޓް ބައްދަލުވުމެއްގައި
މިހާރުގެ ރައީސުލްޖުމްހުރިއްޔާ ޑރ. މުހައްމަދު މުއިއްޒު، ރައީސް އަބްދުﷲ ޔާމީންގެ ކެބިނެޓުގައި އިންނަވައިގެން، ފާސްކޮށްގެން ގެނައި އިންޑިއާ ސިފައިން ހޯދަން ޖެހުމުން، އެ ބަޔަކު ނުފެނިގެން އުޅުއްވަމުން ގެންދަވާކަމަށް ހެންވޭރު ދެކުނު ދާއިރާގެ ރައްޔިތުންގެ މަޖިލީހުގެ މެންބަރު ހުސައިން ޝަހީމް ވިދާޅުވެއްޖެއެވެ.
އިންޑިއާ ސިފައިން ރާއްޖެއިން ބޭލުމުގެ އެއްބަސްވުން ހާމަކުރުމަށް ގޮވާލާ ރައްޔިތުންގެ މަޖިލީހަށް ބުދަ ދުވަހު ހުށަހަޅާފައިވާ ކުއްލި މައްސަލައަށް ބަހުސްކުރައްވަމުން ހެންވޭރު ދެކުނު ދާއިރާގެ މެންބަރު ހުސައިން ޝަހީމް ވިދާޅުވީ ރައީސް ޑރ. މުއިއްޒަކީ، ކުރީގެ ސަރުކާރުން އިންޑިއާއާއެކު އަޑިނޭނގޭ އެއްބަސްވުންތަކެއް ވެފައިވާ ކަމަށް ވިދާޅުވެފައިވާ ބޭފުޅެއް ކަމަށެވެ. އަދި މި އެއްބަސްވުންތަކަކީ ދިވެހިރާއްޖޭގެ މިނިވަންކަމާއި އިސްތިގުލާލާއި ސިޔާދަތު ގެއްލި، ދިވެހި ދިދައާއި ގައުމު ދިވެހިންނަށް ގެއްލޭފަދަ އެއްބަސްވުންތަކެއް ކަމަށް ވިދާޅުވެ އެ ކަން ރައްޔިތުންނަށް ވިއްކަވައިގެން އިންތިހާބުވެވަޑައިގެންނެވި ރައީސެއް ކަމަށެވެ.
އަދި ރާއްޖޭގައި އިންޑިއާގެ ހަތިޔާރުއެޅި ސިފައިން ހާހުން އެބަތިބިކަމަށް ރައީސް ޑރ. މުއިއްޒު ވިދާޅުވި ކަމަށް ވެސް މެންބަރު ޝަހީމް ވިދާޅުވިއެވެ. އަދި އެ މަނިކުފާނުގެ ވެރިކަމުގެ ފުރަތަމަ ދުވަހު އެ ހުރިހާ ސިފައިން ދިވެހިރާއްޖެއިން ބާލާނެ ކަމަށް ވިދާޅުވެ، ކޮޕް28ށް ދުބާއީއަށް ވަޑައިގެން އިންޑިއާގެ ބޮޑުވަޒީރު ނަރެންދުރަ މޯދީއާއި ބައްދަލުކުރައްވާ އިންޑިއާގެ އެތައްހާސް ސިފައިންނެއް ރާއްޖެއިން ބޭލުމާ ބެހޭ މަޝްވަރާކުރެއްވި ކަމަށް ވެސް ޑރ. މުއިއްޒު ވިދާޅުވި ކަމަށް މެންބަރު ޝަހީމް ވިދާޅުވިއެވެ. އެހެންކަމުން ރާއްޖޭގައި ހާހުންތިބި އިންޑިއާ ސިފައިން ބޭލުމާއި ގުޅޭގޮތުން މޯދީއާއެކު ވެވެޑައިގެންނެވި އެއްބަސްވުން ހާމަކުރެއްވުމަށް މެންބަރު ޝަހީމް ގޮވާލެއްވިއެވެ.
މެންބަރު ޝަހީމް ވިދާޅުވީ ވެގެން އުޅޭގޮތަކީ އިންޑިއާ ސިފައިން ގެންނަން ފާސްކުރީ މިހާރުގެ ރައީސުލްޖުމްހޫރިއްޔާ، ކުރީގެ ރައީސް އަބްދުﷲ ޔާމީންގެ ކެބިނެޓުގައި އިންނަވައިގެން ކަމަށް ވުމެވެ.
މެންބަރު ޝަހީމް ވިދާޅުވީ އަމިއްލަފުޅަށް ކެބިނެޓުގައި އިންނަވައި ފާސްކޮށްގެން ގެނައި ބަޔަކު ރާއްޖެއިން ހޯދަން ޖެހުމުން، ދެން އުޅެންޖެހޭނީ ނުފެނިގެން ކަމަށެވެ. އަދި އޭގެ ނަތީޖާއަކީ ވެރިކަމުގައި 18 ދުވަސްވެގެން ދިޔައިރު، ނޫސްވެރިޔަކު ސުވާލެއް ދެންނެވުމުން އަދި ތިމަން މަނިކުފާނު ޖެހޭނީ ކިހާބައެއް ތިބިތޯ ބައްލަވަން ކަމަށް ވިދާޅުވުން ކަމަށެވެ.
މެންބަރު ޝަހީމް ވިދާޅުވީ އިންޑިއާ ރައްޔިތުންނަކީ ދިވެހި ރައްޔިތުންނަށް އިންތިހާއަށް އޯގާތެރި ބައެއް ކަމަށާއި، އިންޑިއާގެ ސަރުކާރަކީ ދިވެހި ރައްޔިތުންނަށް އިންތިހާއަށް އޯގާތެރި ސަރުކާރެއް ކަމަށެވެ. އަދި ކޮންމެފަދަ ވެރިޔަކު އިންޑިއާގައި ހުރިކަމުގައިވީނަމަވެސް، އެއިރެއްގައި އެ ހުންނަވާ ވެރިޔަކީ ދިވެހި ރައްޔިތުންދެކެ ލޯބިވާ، ދިވެހި ރައްޔިތުންނަށް އޯގާތެރި ބައެއް ކަމަށެވެ.
އަދި ދިވެހި ރައްޔިތުންނާ މެދު އެ ގައުމުގެ ރައްޔިތުންނާއި އެ ގައުމުގެ ސަރުކާރުގެ ވެރިން ހިތްތައް ކަޅުވެ، ނަފުރަތު އުފެދޭ ފަދަ ވާހަކަ އެގޮތަށް ދެއްކެވުމުން އެއީ އުނބަށް ޖެހުން ކަމަށް މެންބަރު ވިދާޅުވިއެވެ. އަދި މިހާރު ރައީސް މުއިއްޒު އެ ހުންނެވީ އުނބަށް ޖައްސަވައިގެން ކަމަށާއި، އިންޑިއާގެ ބޮޑުވަޒީރާއެކު ވެވަޑައިގެންނެވި އެއްބަސްވުމަކާއި އިންޑިއާ ސިފައިންގެ އަދަަދާއި ކުރިން ދެއްކެވި ވާހަކަފުޅުތަކުގައި ވިދާޅުވި އެއްބަސްވުންތައް ވެސް ހާމަކުރެއްވުމަށް މެންބަރު ޝަހީމް ވަނީ ގޮވާލައްވާފައެވެ.
