މުއިއްޒު އިމްޕީޗް ކުރުމަށް މެންބަރު ވަނީ ގޮވާލާފައި
މި ސަރުކާރު ހިންގަމުން ދަނީ އަބްދުއްރަހީމްގެ އާއިލާގެ ބޭފުޅުންނަށް ވަޒީފާ ދީގެން ކަމަށް މެންބަރު ޝަހީމް ވިދާޅުވި
މި ސަރުކާރު އައީ ދިވެހީންގެ ރާއްޖެއަށް ކަމަށް ބުނެ ނަމަވެސް، މި ރާއްޖެ އަދުރޭގެ ރާއްޖެއަށް ބަދަލުވެފައިވާ ކަމަށް ރައްޔިތުންގެ މަޖިލީހުގެ ހެންވޭރު ދެކުނު ދާއިރާގެ މެންބަރު ހުސައިން ޝަހީމް ވިދާޅުވެއްޖެއެވެ.
ފެނަކައިގެ މުވައްޒަފުން ވަޒީފާއިން ވަކިކުރަމުންދާ މައްސަލައިގައި އަންގާރަ ދުވަހު މަޖިލީހަށް ހުށަހަޅާފައިވާ ކުއްލި މައްސަލައަށް ބަހުސް ކުރައްވަމުން މެންބަރު ޝަހީމް ވިދާޅުވީ، މި މައްސަލައަކީ ރާއްޖޭގައި މީހުން ދިރިއުޅޭ ކޮންމެ ރަށެއްގެ ކޮންމެ ރައްޔިތެއްގެ ވެސް ކަންބޮޑުވުމެއް ކަމަށެވެ. އަދި މި ސަރުކާރު އައީ ދިވެހީންގެ ރާއްޖެއަށް ކަމަށް ބުނެ ނަމަވެސް، މި ރާއްޖެ ބަދަލުވެފައިވަނީ އަދުރޭގެ ރާއްޖެއަށް ކަމަށް ޝަހީމް ވިދާޅުވިއެވެ. އަދި އަދުރޭގެ އާއިލާއަށް ވަންހަ ދިދަކޮޅު ފޯރި އެންމެންނަށް މަގާމުތައް ދޭންޖެހިގެން ރައްޔިތުންގެ ވަޒީފާ ގެއްލެން ފަށާފައިވާކަމަށް ވެސް މެންބަރު ޝަހީމް ވިދާޅުވި އެވެ.
ޝަހީމް ވިދާޅުވީ މިކަން ބަލައި ނުގަނެވޭނެ ކަމަށާއި، މަޖިލީހުގައި ތިއްބަވާ މެންބަރުންނަކީ ވަޒީފާއިން ކަނޑާ އަނިޔާވެރިވެ ބޭއިންސާފުން ގެއަށް ފޮނުވާ ރައްޔިތުންގެ މަންދޫބުން ކަމަށެވެ. އަދި އެކަން ބަލައިގަނެގެން ނުތިއްބަވާނެ ކަމަށާއި، އެމެރިކާގެ ރައްޔިތުންނާއި އިނގިރޭސިވިލާތުގެ ރައްޔިތުންނާއި ކެނެޑާގެ ރައްޔިތުން ގެނެސް ކެބިނެޓަށް އައްޔަންކޮށް، ފެނަކައިގައި މަސައްކަތް ކުރާ ދިވެހިރައްޔިތުން ވަޒީފާއިން ވަކިކޮށް ގެއަށް ފޮނުވާތަން ބަލަން ނުތިއްބަވާނެ ކަމަށެވެ.
މެންބަރު ޝަހީމް ވިދާޅުވީ ނޭޝަނަލް ސެކިއުރިޓީގެ މަގާމަށް އައްޔަންކުރައްވާފައި ހުންނެވީ ވެސް އެހެން ގައުމެއްގެ ބޭފުޅެއް ކަމަށާއި، އެހެން ގައުމުތަކަށް ނޭޝަނަލް ސެކިއުރިޓީގެ އެޑްވައިޒް ދެއްވާ ބޭފުޅެއް ކަމަށެވެ. މިފަދަ ކަންކަން ކުރާ ސަރުކާރެއް ބާއްވަން ބޭނުން ނުވާ ކަމަށް ވެސް މެންބަރު ޝަހީމް ވިދާޅުވިއެވެ.
ޝަހީމް ވަނީ ރައީސް އަބްދުﷲ ޔާމިނަށް ތާއިދުކުރައްވާ މެންބަރުންނާއި އެމްޑީޕީގެ ޕާލަމެންޓްރީ ގްރޫޕުގެ މެންބަރުން ވެސް ރައީސް ޑރ. މުހައްމަދު މުއިއްޒު އިމްޕީޗް ކުރުމަށް ގޮވާލައްވާފައެވެ.
