ރައީސް ނަޝީދާއި މެންބަރު ހުސެއިން ޝަހީމް

ރައްޔިތުންގެ މަޖިލީހަކީ ރާއްޖޭގައި އެންމެ މުހިންމު އެއް މަސައްކަތް ކުރާ އެއްތަނެވެ. ރާއްޖޭގެ ގާނޫނުތައް ހެދުމާއި ބޮޑެތި މައްސަލަތައް ބަލާ ކަންކަމުގެ ހައްލު ހޯދުމަށް ވަކާލާތު ކުރާތަނެކެވެ. އެތަން ހިންގާނެ ގަވާއިދެއްވެސް އޮވެއެވެ. އިސްލާމްދީނާއި ފުށުނާރާ ރާއްޖޭގެ ގާނޫނާއި ގަވާއިދާ ހިލާފު ވާހަކައެއް ނުދައްކާނަމަ މެންބަރުންނަށް ކޮންމެ ވާހަކައެއްވެސް ދެއްކެއެވެ. ނަމަވެސް މުޅިއަކުން ފެންނަނީ އެ މަންޒަރެއް ނޫނެނެވެ. ފެންނަނީ ބައެއް މެންބަރުންނަށް ހިތުހުރި ވާހަކައެއް ދައްކަން ފުރުސަތުދޭ މަންޒަރެވެ. އަނެއް މެންބަރުން ވާހަކަ ދައްކަން ފެށީމާ އަވަށްޓެރިއަކާ ޖަދަލުކުރާ އުސޫލުން ވެސް ކަންކަން ހިނގާ މަންޒަރުވެސް ފެނެއެވެ.

މެންބަރުން ދައްކާ ވާހަކައިގައި މައްސަލައެއް އުޅޭނަމަ ނިޒާމީ ނުކުތާ ނަގަނީ އެހެން މެންބަރުންނެވެ. އެއީ ނިޒާމީ ނުކުތާއެއްތޯ ނުވަތަ ނޫންތޯ ނިންމަނީ ރިޔާސަތުން ނެވެ.

އަންގާރަ ދުވަހުގެ މަޖިލީހުގެ ޖަލްސާގައި އަދި މިއަށްވުރެ މާ މޮޅުކަމެއް ވެސް ހިނގައިފިއެވެ. އެ ޖަލްސާ ބަލަން އިން މީހަކު ވެސް ހައިރާން ވާނެއެވެ. އާންމުން ދައްކާ އެއް ވާހަކައަކީ ރިޔާސަތުން ބައެއް މެންބަރުންނަށް ހިތުހުރި ވާހަކައެއް ދައްކަން ފުރުސަތުދޭ ވާހަކައެވެ. އަނެއްބައި މެންބަރުންނަށް ދައްކަން ފުރުސަތު ނުދޭ ވާހަކައެވެ. މިއީ މެންބަރުންގެ ވެސް ޝަކުވާއެކެވެ.

އެއްސަހަރެއްގައި ކިޔާފައި މި ވާހަކަ ލިޔެވިދާނެއެވެ. އެއީ ހެންވޭރު ދެކުނު ދާއިރާގެ މެންބަރު ހުސައިން ޝަހީމާއި މަޖިލީހުގެ ރައީސް މުހައްމަދު ނަޝީދުގެ ވާހަކައެވެ. މިއަދަކު އިއްޔެއަކު ނޫނެވެ. ދެ ބޭފުޅުން ވެސް މަޒާޖީގޮތަކަށް މަޖިލީހުގެ ތަޅުމުގައި ޖަދަލުކުރާ މަންޒަރު ފެނިގެންދެއެވެ. އެހެން މެންބަރަކާއި ރައީސް ނަޝީދާއި މިކަމެއް އޮންނަތަން މާބޮޑަށް ފެނިގެން ނުދެއެވެ.

މަޖިލީހުގެ ޖަލްސާގެ ތެރެއިން ރީބްރޯޑްކާސްޓްކުރުމުގެ ގަވާއިދާ ގުޅޭގޮތުން މެންބަރު އިބްރާހިމް ރަޝީދަށް ބޭނުން ވަރަކަށް ފޯޅަވައްސާ ގުޅޭގޮތުން ވާހަކަ ދައްކަވަން ފުރުސަތު ލިބިވަޑައިގެންނެވިއެވެ. ނަމަވެސް ރިޔާސަތުން ބޭނުންނުވާ މެންބަރުންނަށް އެ ފުރުސަތެއް ނުލިބުނެވެ. އަންގާރަ ދުވަހުގެ ޖަލްސާގައި މެންބަރު ޝަހީމަށް ވާހަކަދައްކަވަން ދެވުނު ފުރުސަތު ދިޔައީ ރިޔާސަތާއި ޝަހީމާއި ދެމެދު ދިޔަ މަޒާޖީ ޖަދަލުކުރުމެއްގެ ތެރެއިންނެވެ. ސަބަބަކަށްވީ ފޯޅަވަހީގެ ވަހަކަ މެންބަރު ޝަހީމް ދެއްކެވުމުންނެވެ. ރިޔާސަތުން އެކަމަށް ހުރަސް ވެސް އަޅަމުން ދިޔަފަދަ ގޮތެއް ފެނުނު ކަމަށް ބައެއް މީހުން ބުނެފައި އެބަހުއްޓެވެ.

މެންބަރު ޝަހީމް ވިދާޅުވީ ރިބްރޯޑްކާސްޓިންގެ ވާހަކައިގެ ތެރެއިން އެހެން މެންބަރަކު ރާއްޖޭގެ ކަނޑު ވިއްކާލެއްވި ވާހަކައާއި މޮރިޝަސް އިން ރާއްޖެއަށް އިހާނެތި ގޮތް ހެދި ވާހަކަ ދެއްކެވި އިރު، އެކަމުގެ ހަގީގަށް ސަރުކާރާއި، ރައްޔިތުންނާއި އަދި މަސްވެރިންނަށް ވެސް ވާ ފާއިދާއެއް އެނގިވަޑައިގަންނަވާތޯއެވެ. އެހިސާބުން ރިޔާސަތުން މެންބަރުގެ ވާހަކަ ހުއްޓުވިއެވެ.

މިއީ މެންބަރު ޝަހީމްގެ ވާހަކަ ރިޔާސަތުން ހުއްޓުވި ފުރަތަމަ ބުރެވެ. ރިޔާސަތުގެ ވާހަކައާއި ގުޅިގެން މެންބަރު ޝަހީމް މަޖާޒީ ގޮތެއްގައި ވިދާޅުވީ އޭނާއަށް ކާމިޔާބުނުވާނެ ޕްރޮޖެކްޓަކަށް ރައީސާ ކުރިމަތިނުލާނެކަމުގެ ޔަގީންކަން ރައީސަށް އަރުއްވާ ކަމަށެވެ. އަދި ކުރިމަތިލައިފިއްޔާ އިރާދަކުރެއްވިއްޔާ އެކަމެއް ކާމިޔާބުކުރައްވާނެ ކަމަށެވެ.

މިހާ ހިސާބުން އަނެއްކާ ވެސް ރިޔާސަތުން މެންބަރުގެ ވާހަކަ ހުއްޓުވިއެވެ. ދެވަނަ ފަހަރަށެވެ. ފޯޅަވަހީގެ މައްސަލައިގައި ފުށުއަރާ ބައިން ދިވެހިރާއްޖޭގެ ކަނޑުގެ ސަރަހައްދުން 45000 އަކަ ކިލޯމީޓަރު ނުގެއްލި މިހާރު ދާނެ ގޮތެއް ކިޔައިދެއްވައިފިއްޔާ އެއީ ވަރަށް ރަނގަޅު ގޮތެއް ކަމަށް ވިދަޅުވުމުންނެވެ.

އެހިސާބުން މެންބަރު ޝަހީމް ވަނީ އޭނާއަށް ފުރުސަތު ދެއްވީތޯ ސުވާލު ކުރައްވާފައެވެ.

ތިންވަނަ ފަހަރަށް މެންބަރުގެ ވާހަކަ ހުއްޓުވާ ރިޔާސަތުން ވަނީ ޗާގޯސްގެ ރަށްތަކަކީ އެއްވެސް ގައުމެއްގެ ސަރަހައްދުގައި ހިމެނޭ ރަށްތަކެއްގެ ގޮތުގައި ބައިނަލްއަގުވާމީ އެއްވެސް ތަނެއްގައި ކަނޑައެޅިފައި ނެތްކަމަށް ވިދާޅުވެ އެ ވާހަކަ މެންބަރަށް ހަނދާންކޮށް ދެއްވާފައެވެ.

ރައީސް ނަޝީދުގެ ވާހަކަ ނިމުމުން އަނެއްކާވެސް މަޒާޖީ ރާގެއްގައި މެންބަރު ޝަހީމް ވިދާޅުވީ ރައީސް އަޅުގަނޑަށް ފުރުސަތު ދެއްވީތޯއެވެ. މެންބަރު ވިދާޅުވީ މަޖިލިސް މިހާރު ހިނގަމުން މިދާގޮތް ވަރށް ރަނގަޅުކަމަށް ދެކެވަޑައިގަންނަވާ ކަމަށެވެ. އެއީ ސުވާލާއި ޖަވާބުގެ ގޮތަކަށް މެންބަރުންގެ ފުރުސަތު ބަދަލުވެގެން ދިއުމުން ކަމަށެވެ.

މެންބަރު ޝަހީމްގެ ވާހަކައިގެ ތެރެއިން ކެޔޮދޫ ދާއިރާގެ މެންބަރު ހުސައިން ގާސިމް ނިޒާމީ ނުކުތާއެއް ނެންގެވިއެވެ. މެންބަރު ގާސިމް ވިދާޅުވީ އެޖެންޑާއަށް ބަލާލާއިރު ފެންނަނީ، ބްރޯޑްކާސްޓިންއާ ބެހޭ ގޮތުން ނައިފަރު ދާއިރާގެ މެންބަރު ހުށަހަޅުއްވާފައި ގަރާރެއް ކަމަށެވެ. އެކަމަށް މައުޟޫ އެއްގޮތަކަށްވެސް...

މިހާ ހިސާބުން ރައީސް ނަޝީދު ވަނީ މެންބަރަށް ޝުކުރު ދަންނަވާފައި މެންބަރު ޝަހީމް ކޮންމެވެސް މިންވަރަކަށް އެކަމަށް އިޖާބަ ދެއްވުން ވަރަށް އެދެވޭ ކަމަށް ވިދާޅުވެފައެވެ.

އަނެއްކާވެސް މެންބަރު ޝަހީމްގެ ވާހަކަ ކުރިއަށް ގެންދަވަމުން ވިދާޅުވީ އޭނާ މަޖިލީހަށް އައީ އެކަނި ކާރު ދުއްވާފައި ކަމަށެވެ. މީހަކު އަތުގައި ހިފައިގެން ނޫން ކަމަށާއި، ރީބްރޯޑްކާސްޓްކުރުމުގެ ބިލުގެ ގަރާރަށް ވާހަކަ ދައްކަވަމުން ގެންދަވާ ކަމަށެވެ.

މެންބަރު ޝަހީމްގެ ވާހަކަ ނިންމަވާލައްވަމުން ވިދާޅުވީ ރައީސް (ރިޔާސަތް) ހީފުޅުކުރެއްވި އެއްވެސް ވާހަކައެއް އެތަނުގައި ދައްކަވަން ނޫޅުއްވާކަމަށެވެ.

ރިޔާސަތުން ތަކުރާރުކޮށް މަޖިލީހުގެ ބަހުސްގައި ވާހަކަ ދައްކަވާތީ މެންބަރުން އަންނަނީ ކަންބޮޑުވުން ފާޅުކުރަމުންނެވެ. މިކަމާއި މެންބަރުން ކަންބޮޑުވުން ފާޅުކުރެއްވި ނަމަވެސް ރިޔާސަތުން އަމަލުކުރަމުން އަންނަ ގޮތަކަށް ބަދަލެއް އައިސްފައި ނުވެއެވެ.